૩. તતિયસિક્ખાપદં

૧૧૯૦. તેન સમયેન બુદ્ધો ભગવા સાવત્થિયં વિહરતિ જેતવને અનાથપિણ્ડિકસ્સ આરામે. તેન ખો પન સમયેન અઞ્ઞતરા ભિક્ખુની અઞ્ઞતરિસ્સા ઇત્થિયા કુલૂપિકા હોતિ. અથ ખો સા ઇત્થી તં ભિક્ખુનિં એતદવોચ – ‘‘હન્દાય્યે, ઇમં સઙ્ઘાણિં અમુકાય નામ ઇત્થિયા દેહી’’તિ. અથ ખો સા ભિક્ખુની – ‘‘સચાહં પત્તેન આદાય ગચ્છામિ વિસ્સરો મે ભવિસ્સતી’’તિ પટિમુઞ્ચિત્વા અગમાસિ. તસ્સા રથિકાય સુત્તકે છિન્ને વિપ્પકિરિયિંસુ. મનુસ્સા ઉજ્ઝાયન્તિ ખિય્યન્તિ વિપાચેન્તિ – ‘‘કથઞ્હિ નામ ભિક્ખુનિયો સઙ્ઘાણિં ધારેસ્સન્તિ, સેય્યથાપિ ગિહિનિયો કામભોગિનિયો’’તિ! અસ્સોસું ખો ભિક્ખુનિયો તેસં મનુસ્સાનં ઉજ્ઝાયન્તાનં ખિય્યન્તાનં વિપાચેન્તાનં. યા તા ભિક્ખુનિયો અપ્પિચ્છા…પે. … તા ઉજ્ઝાયન્તિ ખિય્યન્તિ વિપાચેન્તિ – ‘‘કથઞ્હિ નામ ભિક્ખુની સઙ્ઘાણિં ધારેસ્સતી’’તિ…પે… સચ્ચં કિર, ભિક્ખવે, ભિક્ખુની સઙ્ઘાણિં ધારેતી’’તિ [ધારેસીતિ (ક.)]? ‘‘સચ્ચં, ભગવા’’તિ. વિગરહિ બુદ્ધો ભગવા…પે… કથઞ્હિ નામ, ભિક્ખવે, ભિક્ખુની સઙ્ઘાણિં ધારેસ્સતિ! નેતં, ભિક્ખવે, અપ્પસન્નાનં વા પસાદાય…પે… એવઞ્ચ પન, ભિક્ખવે, ભિક્ખુનિયો ઇમં સિક્ખાપદં ઉદ્દિસન્તુ –

૧૧૯૧. ‘‘યા પન ભિક્ખુની સઙ્ઘાણિં ધારેય્ય, પાચિત્તિય’’ન્તિ.

૧૧૯૨. યા પનાતિ યા યાદિસા…પે… ભિક્ખુનીતિ…પે… અયં ઇમસ્મિં અત્થે અધિપ્પેતા ભિક્ખુનીતિ.

સઙ્ઘાણિ નામ યા કાચિ કટૂપગા.

ધારેય્યાતિ સકિમ્પિ ધારેતિ, આપત્તિ પાચિત્તિયસ્સ.

૧૧૯૩. અનાપત્તિ આબાધપ્પચ્ચયા, કટિસુત્તકં ધારેતિ, ઉમ્મત્તિકાય, આદિકમ્મિકાયાતિ.

તતિયસિક્ખાપદં નિટ્ઠિતં.