૧૨. દ્વાદસમસિક્ખાપદં

૧૨૧૯. તેન સમયેન બુદ્ધો ભગવા સાવત્થિયં વિહરતિ જેતવને અનાથપિણ્ડિકસ્સ આરામે. તેન ખો પન સમયેન ભિક્ખુનિયો અનોકાસકતં ભિક્ખું પઞ્હં પુચ્છન્તિ. ભિક્ખૂ ઉજ્ઝાયન્તિ ખિય્યન્તિ વિપાચેન્તિ – ‘‘કથઞ્હિ નામ ભિક્ખુનિયો અનોકાસકતં ભિક્ખું પઞ્હં પુચ્છિસ્સન્તી’’તિ…પે… સચ્ચં કિર, ભિક્ખવે, ભિક્ખુનિયો અનોકાસકતં ભિક્ખું પઞ્હં પુચ્છન્તીતિ? ‘‘સચ્ચં, ભગવા’’તિ. વિગરહિ બુદ્ધો ભગવા…પે… કથઞ્હિ નામ, ભિક્ખવે, ભિક્ખુનિયો અનોકાસકતં ભિક્ખું પઞ્હં પુચ્છિસ્સન્તિ! નેતં, ભિક્ખવે, અપ્પસન્નાનં વા પસાદાય…પે… એવઞ્ચ પન, ભિક્ખવે, ભિક્ખુનિયો ઇમં સિક્ખાપદં ઉદ્દિસન્તુ –

૧૨૨૦. ‘‘યા પન ભિક્ખુની અનોકાસકતં ભિક્ખું પઞ્હં પુચ્છેય્ય, પાચિત્તિય’’ન્તિ.

૧૨૨૧. યા પનાતિ યા યાદિસા…પે… ભિક્ખુનીતિ…પે… અયં ઇમસ્મિં અત્થે અધિપ્પેતા ભિક્ખુનીતિ.

અનોકાસકતન્તિ અનાપુચ્છા. ભિક્ખુન્તિ ઉપસમ્પન્નં. પઞ્હં પુચ્છેય્યાતિ સુત્તન્તે ઓકાસં કારાપેત્વા વિનયં વા અભિધમ્મં વા પુચ્છતિ, આપત્તિ પાચિત્તિયસ્સ. વિનયે ઓકાસં કારાપેત્વા સુત્તન્તં વા અભિધમ્મં વા પુચ્છતિ, આપત્તિ પાચિત્તિયસ્સ. અભિધમ્મે ઓકાસં કારાપેત્વા સુત્તન્તં વા વિનયં વા પુચ્છતિ, આપત્તિ પાચિત્તિયસ્સ.

૧૨૨૨. અનાપુચ્છિતે અનાપુચ્છિતસઞ્ઞા પઞ્હં પુચ્છતિ, આપત્તિ પાચિત્તિયસ્સ. અનાપુચ્છિતે વેમતિકા પઞ્હં પુચ્છતિ, આપત્તિ પાચિત્તિયસ્સ. અનાપુચ્છિતે આપુચ્છિતસઞ્ઞા પઞ્હં પુચ્છતિ, આપત્તિ પાચિત્તિયસ્સ.

આપુચ્છિતે અનાપુચ્છિતસઞ્ઞા, આપત્તિ દુક્કટસ્સ. આપુચ્છિતે વેમતિકા, આપત્તિ દુક્કટસ્સ. આપુચ્છિતે આપુચ્છિતસઞ્ઞા, અનાપત્તિ.

૧૨૨૩. અનાપત્તિ ઓકાસં કારાપેત્વા પુચ્છતિ, અનોદિસ્સ ઓકાસં કારાપેત્વા યત્થ કત્થચિ પુચ્છતિ, ઉમ્મત્તિકાય, આદિકમ્મિકાયાતિ.

દ્વાદસમસિક્ખાપદં નિટ્ઠિતં.