૧૩. તેરસમસિક્ખાપદં

૧૨૨૪. તેન સમયેન બુદ્ધો ભગવા સાવત્થિયં વિહરતિ જેતવને અનાથપિણ્ડિકસ્સ આરામે. તેન ખો પન સમયેન અઞ્ઞતરા ભિક્ખુની અસઙ્કચ્ચિકા [અસઙ્કચ્છિકા (સ્યા.)] ગામં પિણ્ડાય પાવિસિ. તસ્સા રથિકાય વાતમણ્ડલિકા સઙ્ઘાટિયો ઉક્ખિપિંસુ. મનુસ્સા ઉક્કુટ્ઠિં અકંસુ – ‘‘સુન્દરા અય્યાય થનુદરા’’તિ. સા ભિક્ખુની તેહિ મનુસ્સેહિ ઉપ્પણ્ડિયમાના મઙ્કુ અહોસિ. અથ ખો સા ભિક્ખુની ઉપસ્સયં ગન્ત્વા ભિક્ખુનીનં એતમત્થં આરોચેસિ. યા તા ભિક્ખુનિયો અપ્પિચ્છા…પે… તા ઉજ્ઝાયન્તિ ખિય્યન્તિ વિપાચેન્તિ – ‘‘કથઞ્હિ નામ ભિક્ખુની અસઙ્કચ્ચિકા ગામં પવિસિસ્સતી’’તિ…પે… સચ્ચં કિર, ભિક્ખવે, ભિક્ખુની અસઙ્કચ્ચિકા ગામં પાવિસીતિ? ‘‘સચ્ચં, ભગવા’’તિ. વિગરહિ બુદ્ધો ભગવા…પે… કથઞ્હિ નામ, ભિક્ખવે, ભિક્ખુની અસઙ્કચ્ચિકા ગામં પવિસિસ્સતિ! નેતં, ભિક્ખવે, અપ્પસન્નાનં વા પસાદાય…પે… એવઞ્ચ પન, ભિક્ખવે, ભિક્ખુનિયો ઇમં સિક્ખાપદં ઉદ્દિસન્તુ –

૧૨૨૫. ‘‘યા પન ભિક્ખુની અસઙ્કચ્ચિકા [અસઙ્કચ્છિકા (સ્યા.)] ગામં પવિસેય્ય, પાચિત્તિય’’ન્તિ.

૧૨૨૬. યા પનાતિ યા યાદિસા…પે… ભિક્ખુનીતિ…પે… અયં ઇમસ્મિં અત્થે અધિપ્પેતા ભિક્ખુનીતિ.

અસઙ્કચ્ચિકાતિ વિના સઙ્કચ્ચિકં.

સઙ્કચ્ચિકં નામ અધક્ખકં ઉબ્ભનાભિ, તસ્સ પટિચ્છાદનત્થાય.

ગામં પવિસેય્યાતિ પરિક્ખિત્તસ્સ ગામસ્સ પરિક્ખેપં અતિક્કામેન્તિયા આપત્તિ પાચિત્તિયસ્સ. અપરિક્ખિત્તસ્સ ગામસ્સ ઉપચારં ઓક્કમન્તિયા આપત્તિ પાચિત્તિયસ્સ.

૧૨૨૭. અનાપત્તિ અચ્છિન્નચીવરિકાય, નટ્ઠચીવરિકાય, ગિલાનાય, અસ્સતિયા, અજાનન્તિયા, આપદાસુ, ઉમ્મત્તિકાય, આદિકમ્મિકાયાતિ.

તેરસમસિક્ખાપદં નિટ્ઠિતં.

છત્તુપાહનવગ્ગો નવમો.

ઉદ્દિટ્ઠા ખો, અય્યાયો, છસટ્ઠિસતા પાચિત્તિયા ધમ્મા. તત્થાય્યાયો પુચ્છામિ – ‘‘કચ્ચિત્થ પરિસુદ્ધા’’? દુતિયમ્પિ પુચ્છામિ – ‘‘કચ્ચિત્થ પરિસુદ્ધા’’? તતિયમ્પિ પુચ્છામિ – ‘‘કચ્ચિત્થ પરિસુદ્ધા’’? પરિસુદ્ધેત્થાય્યાયો, તસ્મા તુણ્હી, એવમેતં ધારયામીતિ.

ખુદ્દકં સમત્તં.

ભિક્ખુનિવિભઙ્ગે પાચિત્તિયકણ્ડં નિટ્ઠિતં.