૪. ચતુત્થસિક્ખાપદં

૯૪૬. તેન સમયેન બુદ્ધો ભગવા સાવત્થિયં વિહરતિ જેતવને અનાથપિણ્ડિકસ્સ આરામે. તેન ખો પન સમયેન થુલ્લનન્દા ભિક્ખુની દુક્ખિતં સહજીવિનિં નેવ ઉપટ્ઠેતિ ન ઉપટ્ઠાપનાય ઉસ્સુક્કં કરોતિ. યા તા ભિક્ખુનિયો અપ્પિચ્છા…પે… તા ઉજ્ઝાયન્તિ ખિય્યન્તિ વિપાચેન્તિ – ‘‘કથઞ્હિ નામ અય્યા થુલ્લનન્દા દુક્ખિતં સહજીવિનિં નેવ ઉપટ્ઠેસ્સતિ ન ઉપટ્ઠાપનાય ઉસ્સુક્કં કરિસ્સતી’’તિ…પે… સચ્ચં કિર, ભિક્ખવે, થુલ્લનન્દા ભિક્ખુની દુક્ખિતં સહજીવિનિં નેવ ઉપટ્ઠેતિ ન ઉપટ્ઠાપનાય ઉસ્સુક્કં કરોતીતિ? ‘‘સચ્ચં, ભગવા’’તિ. વિગરહિ બુદ્ધો ભગવા…પે… કથઞ્હિ નામ, ભિક્ખવે, થુલ્લનન્દા ભિક્ખુની દુક્ખિતં સહજીવિનિં નેવ ઉપટ્ઠેસ્સતિ ન ઉપટ્ઠાપનાય ઉસ્સુક્કં કરિસ્સતિ! નેતં, ભિક્ખવે, અપ્પસન્નાનં વા પસાદાય…પે… એવઞ્ચ પન, ભિક્ખવે, ભિક્ખુનિયો ઇમં સિક્ખાપદં ઉદ્દિસન્તુ –

૯૪૭. ‘‘યા પન ભિક્ખુની દુક્ખિતં સહજીવિનિં નેવ ઉપટ્ઠેય્ય ન ઉપટ્ઠાપનાય ઉસ્સુક્કં કરેય્ય, પાચિત્તિય’’ન્તિ.

૯૪૮. યા પનાતિ યા યાદિસા…પે… ભિક્ખુનીતિ…પે… અયં ઇમસ્મિં અત્થે અધિપ્પેતા ભિક્ખુનીતિ.

દુક્ખિતા નામ ગિલાના વુચ્ચતિ.

સહજીવિની નામ સદ્ધિવિહારિની વુચ્ચતિ.

નેવ ઉપટ્ઠેય્યાતિ ન સયં ઉપટ્ઠેય્ય.

ન ઉપટ્ઠાપનાય ઉસ્સુક્કં કરેય્યાતિ ન અઞ્ઞં આણાપેય્ય.

‘‘નેવ ઉપટ્ઠેસ્સામિ, ન ઉપટ્ઠાપનાય ઉસ્સુક્કં કરિસ્સામી’’તિ ધુરં નિક્ખિત્તમત્તે આપત્તિ પાચિત્તિયસ્સ. અન્તેવાસિનિં વા અનુપસમ્પન્નં વા નેવ ઉપટ્ઠેતિ, ન ઉપટ્ઠાપનાય ઉસ્સુક્કં કરોતિ, આપત્તિ દુક્કટસ્સ.

૯૪૯. અનાપત્તિ સતિ અન્તરાયે, પરિયેસિત્વા ન લભતિ, ગિલાનાય, આપદાસુ, ઉમ્મત્તિકાય, આદિકમ્મિકાયાતિ.

ચતુત્થસિક્ખાપદં નિટ્ઠિતં.