૧. પઠમસિક્ખાપદં

૮૩૮. તેન સમયેન બુદ્ધો ભગવા સાવત્થિયં વિહરતિ જેતવને અનાથપિણ્ડિકસ્સ આરામે. તેન ખો પન સમયેન ભદ્દાય કાપિલાનિયા અન્તેવાસિનિયા ભિક્ખુનિયા ઞાતકો પુરિસો ગામકા સાવત્થિં અગમાસિ કેનચિદેવ કરણીયેન. અથ ખો સા ભિક્ખુની તેન પુરિસેન સદ્ધિં રત્તન્ધકારે અપ્પદીપે એકેનેકા સન્તિટ્ઠતિપિ સલ્લપતિપિ. યા તા ભિક્ખુનિયો અપ્પિચ્છા…પે… તા ઉજ્ઝાયન્તિ ખિય્યન્તિ વિપાચેન્તિ – ‘‘કથઞ્હિ નામ ભિક્ખુની રત્તન્ધકારે અપ્પદીપે પુરિસેન સદ્ધિં એકેનેકા સન્તિટ્ઠિસ્સતિપિ સલ્લપિસ્સતિપી’’તિ…પે… સચ્ચં કિર, ભિક્ખવે, ભિક્ખુની રત્તન્ધકારે અપ્પદીપે પુરિસેન સદ્ધિં એકેનેકા સન્તિટ્ઠતિપિ સલ્લપતિપીતિ? ‘‘સચ્ચં, ભગવા’’તિ. વિગરહિ બુદ્ધો ભગવા…પે… કથઞ્હિ નામ, ભિક્ખવે, ભિક્ખુની રત્તન્ધકારે અપ્પદીપે પુરિસેન સદ્ધિં એકેનેકા સન્તિટ્ઠિસ્સતિપિ સલ્લપિસ્સતિપિ! નેતં, ભિક્ખવે, અપ્પસન્નાનં વા પસાદાય…પે… એવઞ્ચ પન, ભિક્ખવે, ભિક્ખુનિયો ઇમં સિક્ખાપદં ઉદ્દિસન્તુ –

૮૩૯. ‘‘યા પન ભિક્ખુની રત્તન્ધકારે અપ્પદીપે પુરિસેન સદ્ધિં એકેનેકા સન્તિટ્ઠેય્ય વા સલ્લપેય્ય વા, પાચિત્તિય’’ન્તિ.

૮૪૦. યા પનાતિ યા યાદિસા…પે… ભિક્ખુનીતિ…પે… અયં ઇમસ્મિં અત્થે અધિપ્પેતા ભિક્ખુનીતિ.

રત્તન્ધકારેતિ ઓગ્ગતે સૂરિયે. અપ્પદીપેતિ અનાલોકે.

પુરિસો નામ મનુસ્સપુરિસો ન યક્ખો ન પેતો ન તિરચ્છાનગતો વિઞ્ઞૂ પટિબલો સન્તિટ્ઠિતું સલ્લપિતું.

સદ્ધિન્તિ એકતો. એકેનેકાતિ પુરિસો ચેવ હોતિ ભિક્ખુની ચ.

સન્તિટ્ઠેય્ય વાતિ પુરિસસ્સ હત્થપાસે તિટ્ઠતિ, આપત્તિ પાચિત્તિયસ્સ.

સલ્લપેય્ય વાતિ પુરિસસ્સ હત્થપાસે ઠિતા સલ્લપતિ, આપત્તિ પાચિત્તિયસ્સ.

હત્થપાસં વિજહિત્વા સન્તિટ્ઠતિ વા સલ્લપતિ વા, આપત્તિ દુક્કટસ્સ. યક્ખેન વા પેતેન વા પણ્ડકેન વા તિરચ્છાનગતમનુસ્સવિગ્ગહેન વા સદ્ધિં સન્તિટ્ઠતિ વા સલ્લપતિ વા, આપત્તિ દુક્કટસ્સ.

૮૪૧. અનાપત્તિ યો કોચિ વિઞ્ઞૂ દુતિયો [યા કાચિ વિઞ્ઞૂ દુતિયા (સ્યા.)] હોતિ, અરહોપેક્ખા, અઞ્ઞવિહિતા સન્તિટ્ઠતિ વા સલ્લપતિ વા, ઉમ્મત્તિકાય, આદિકમ્મિકાયાતિ.

પઠમસિક્ખાપદં નિટ્ઠિતં.