૨. દુતિયસિક્ખાપદં

૮૪૨. તેન સમયેન બુદ્ધો ભગવા સાવત્થિયં વિહરતિ જેતવને અનાથપિણ્ડિકસ્સ આરામે. તેન ખો પન સમયેન ભદ્દાય કાપિલાનિયા અન્તેવાસિનિયા ભિક્ખુનિયા ઞાતકો પુરિસો ગામકા સાવત્થિં અગમાસિ કેનચિદેવ કરણીયેન. અથ ખો સા ભિક્ખુની – ‘‘ભગવતા પટિક્ખિત્તં રત્તન્ધકારે અપ્પદીપે પુરિસેન સદ્ધિં એકેનેકા સન્તિટ્ઠિતું સલ્લપિતુ’’ન્તિ તેનેવ પુરિસેન સદ્ધિં પટિચ્છન્ને ઓકાસે એકેનેકા સન્તિટ્ઠતિપિ સલ્લપતિપિ. યા તા ભિક્ખુનિયો અપ્પિચ્છા…પે… તા ઉજ્ઝાયન્તિ ખિય્યન્તિ વિપાચેન્તિ – ‘‘કથઞ્હિ નામ ભિક્ખુની પટિચ્છન્ને ઓકાસે પુરિસેન સદ્ધિં એકેનેકા સન્તિટ્ઠિસ્સતિપિ સલ્લપિસ્સતિપી’’તિ…પે… સચ્ચં કિર, ભિક્ખવે, ભિક્ખુની પટિચ્છન્ને ઓકાસે પુરિસેન સદ્ધિં એકેનેકા સન્તિટ્ઠતિપિ સલ્લપતિપીતિ? ‘‘સચ્ચં, ભગવા’’તિ. વિગરહિ બુદ્ધો ભગવા…પે… કથઞ્હિ નામ, ભિક્ખવે, ભિક્ખુની પટિચ્છન્ને ઓકાસે પુરિસેન સદ્ધિં એકેનેકા સન્તિટ્ઠિસ્સતિપિ સલ્લપિસ્સતિપિ! નેતં, ભિક્ખવે, અપ્પસન્નાનં વા પસાદાય…પે… એવઞ્ચ પન, ભિક્ખવે, ભિક્ખુનિયો ઇમં સિક્ખાપદં ઉદ્દિસન્તુ –

૮૪૩. ‘‘યા પન ભિક્ખુની પટિચ્છન્ને ઓકાસે પુરિસેન સદ્ધિં એકેનેકા સન્તિટ્ઠેય્ય વા સલ્લપેય્ય વા, પાચિત્તિય’’ન્તિ.

૮૪૪. યા પનાતિ યા યાદિસા…પે… ભિક્ખુનીતિ…પે… અયં ઇમસ્મિં અત્થે અધિપ્પેતા ભિક્ખુનીતિ.

પટિચ્છન્નો નામ ઓકાસો કુટ્ટેન વા કવાટેન વા કિલઞ્જેન વા સાણિપાકારેન વા રુક્ખેન વા થમ્ભેન વા કોત્થળિયા વા યેન કેનચિ પટિચ્છન્નો હોતિ.

પુરિસો નામ મનુસ્સપુરિસો ન યક્ખો ન પેતો ન તિરચ્છાનગતો વિઞ્ઞૂ પટિબલો સન્તિટ્ઠિતું સલ્લપિતું.

સદ્ધિન્તિ એકતો. એકેનેકાતિ પુરિસો ચેવ હોતિ ભિક્ખુની ચ.

સન્તિટ્ઠેય્ય વાતિ પુરિસસ્સ હત્થપાસે તિટ્ઠતિ, આપત્તિ પાચિત્તિયસ્સ.

સલ્લપેય્ય વાતિ પુરિસસ્સ હત્થપાસે ઠિતા સલ્લપતિ, આપત્તિ પાચિત્તિયસ્સ.

હત્થપાસં વિજહિત્વા સન્તિટ્ઠતિ વા સલ્લપતિ વા, આપત્તિ દુક્કટસ્સ. યક્ખેન વા પેતેન વા પણ્ડકેન વા તિરચ્છાનગતમનુસ્સવિગ્ગહેન વા સદ્ધિં સન્તિટ્ઠતિ વા સલ્લપતિ વા, આપત્તિ દુક્કટસ્સ.

૮૪૫. અનાપત્તિ યો કોચિ વિઞ્ઞૂ દુતિયો હોતિ, અરહોપેક્ખા, અઞ્ઞવિહિતા સન્તિટ્ઠતિ વા સલ્લપતિ વા, ઉમ્મત્તિકાય, આદિકમ્મિકાયાતિ.

દુતિયસિક્ખાપદં નિટ્ઠિતં.