૯. નવમસઙ્ઘાદિસેસસિક્ખાપદં

૭૨૧. તેન સમયેન બુદ્ધો ભગવા સાવત્થિયં વિહરતિ જેતવને અનાથપિણ્ડિકસ્સ આરામે. તેન ખો પન સમયેન થુલ્લનન્દાય ભિક્ખુનિયા અન્તેવાસિકા ભિક્ખુનિયો સંસટ્ઠા વિહરન્તિ પાપાચારા પાપસદ્દા પાપસિલોકા, ભિક્ખુનિસઙ્ઘસ્સ વિહેસિકા, અઞ્ઞમઞ્ઞિસ્સા વજ્જપ્પટિચ્છાદિકા. યા તા ભિક્ખુનિયો અપ્પિચ્છા…પે… તા ઉજ્ઝાયન્તિ ખિય્યન્તિ વિપાચેન્તિ – ‘‘કથઞ્હિ નામ ભિક્ખુનિયો સંસટ્ઠા વિહરિસ્સન્તિ પાપાચારા પાપસદ્દા પાપસિલોકા ભિક્ખુનિસઙ્ઘસ્સ વિહેસિકા અઞ્ઞમઞ્ઞિસ્સા વજ્જપ્પટિચ્છાદિકા’’તિ…પે… સચ્ચં કિર, ભિક્ખવે, ભિક્ખુનિયો સંસટ્ઠા વિહરન્તિ પાપાચારા પાપસદ્દા પાપસિલોકા ભિક્ખુનિસઙ્ઘસ્સ વિહેસિકા અઞ્ઞમઞ્ઞિસ્સા વજ્જપ્પટિચ્છાદિકાતિ? ‘‘સચ્ચં, ભગવા’’તિ. વિગરહિ બુદ્ધો ભગવા…પે… કથઞ્હિ નામ, ભિક્ખવે, ભિક્ખુનિયો સંસટ્ઠા વિહરિસ્સન્તિ પાપાચારા પાપસદ્દા પાપસિલોકા, ભિક્ખુનિસઙ્ઘસ્સ વિહેસિકા, અઞ્ઞમઞ્ઞિસ્સા વજ્જપ્પટિચ્છાદિકા! નેતં, ભિક્ખવે, અપ્પસન્નાનં વા પસાદાય…પે… એવઞ્ચ પન, ભિક્ખવે, ભિક્ખુનિયો ઇમં સિક્ખાપદં ઉદ્દિસન્તુ –

૭૨૨. ‘‘ભિક્ખુનિયો પનેવ સંસટ્ઠા વિહરન્તિ પાપાચારા પાપસદ્દા પાપસિલોકા, ભિક્ખુનિસઙ્ઘસ્સ વિહેસિકા, અઞ્ઞમઞ્ઞિસ્સા વજ્જપ્પટિચ્છાદિકા. તા ભિક્ખુનિયો ભિક્ખુનીહિ એવમસ્સુ વચનીયા – ‘ભગિનિયો ખો સંસટ્ઠા વિહરન્તિ પાપાચારા પાપસદ્દા પાપસિલોકા, ભિક્ખુનિસઙ્ઘસ્સ વિહેસિકા અઞ્ઞમઞ્ઞિસ્સા વજ્જપ્પટિચ્છાદિકા. વિવિચ્ચથાય્યે. વિવેકઞ્ઞેવ ભગિનીનં સઙ્ઘો વણ્ણેતી’તિ. એવઞ્ચ તા ભિક્ખુનિયો ભિક્ખુનીહિ વુચ્ચમાના તથેવ પગ્ગણ્હેય્યું, તા ભિક્ખુનિયો ભિક્ખુનીહિ યાવતતિયં સમનુભાસિતબ્બા તસ્સ પટિનિસ્સગ્ગાય. યાવતતિયઞ્ચે સમનુભાસીયમાના તં પટિનિસ્સજ્જેય્યું, ઇચ્ચેતં કુસલં; નો ચે પટિનિસ્સજ્જેય્યું, ઇમાપિ ભિક્ખુનિયો યાવતતિયકં ધમ્મં આપન્ના નિસ્સારણીયં સઙ્ઘાદિસેસ’’ન્તિ.

૭૨૩. ભિક્ખુનિયો પનેવાતિ ઉપસમ્પન્નાયો વુચ્ચન્તિ.

સંસટ્ઠા વિહરન્તીતિ સંસટ્ઠા નામ અનનુલોમિકેન કાયિકવાચસિકેન સંસટ્ઠા વિહરન્તિ.

પાપાચારાતિ પાપકેન આચારેન સમન્નાગતા.

પાપસદ્દાતિ પાપકેન કિત્તિસદ્દેન અબ્ભુગ્ગતા.

પાપસિલોકાતિ પાપકેન મિચ્છાજીવેન જીવિતં કપ્પેન્તિ.

ભિક્ખુનિસઙ્ઘસ્સ વિહેસિકાતિ અઞ્ઞમઞ્ઞિસ્સા કમ્મે કરીયમાને પટિક્કોસન્તિ.

અઞ્ઞમઞ્ઞિસ્સા વજ્જપ્પટિચ્છાદિકાતિ અઞ્ઞમઞ્ઞં વજ્જં પટિચ્છાદેન્તિ.

તા ભિક્ખુનિયોતિ યા તા સંસટ્ઠા ભિક્ખુનિયો.

ભિક્ખુનીહીતિ અઞ્ઞાહિ ભિક્ખુનીહિ.

યા પસ્સન્તિ યા સુણન્તિ તાહિ વત્તબ્બા – ‘‘ભગિનિયો ખો સંસટ્ઠા વિહરન્તિ પાપાચારા પાપસદ્દા પાપસિલોકા, ભિક્ખુનિસઙ્ઘસ્સ વિહેસિકા, અઞ્ઞમઞ્ઞિસ્સા વજ્જપ્પટિચ્છાદિકા. વિવિચ્ચથાય્યે. વિવેકઞ્ઞેવ ભગિનીનં સઙ્ઘો વણ્ણેતી’’તિ. દુતિયમ્પિ વત્તબ્બા. તતિયમ્પિ વત્તબ્બા. સચે પટિનિસ્સજ્જન્તિ, ઇચ્ચેતં કુસલં; નો ચે પટિનિસ્સજ્જન્તિ, આપત્તિ દુક્કટસ્સ. સુત્વા ન વદન્તિ, આપત્તિ દુક્કટસ્સ. તા ભિક્ખુનિયો સઙ્ઘમજ્ઝમ્પિ આકડ્ઢિત્વા વત્તબ્બા – ‘‘ભગિનિયો ખો સંસટ્ઠા વિહરન્તિ પાપાચારા પાપસદ્દા પાપસિલોકા, ભિક્ખુનિસઙ્ઘસ્સ વિહેસિકા, અઞ્ઞમઞ્ઞિસ્સા વજ્જપ્પટિચ્છાદિકા. વિવિચ્ચથાય્યે. વિવેકઞ્ઞેવ ભગિનીનં સઙ્ઘો વણ્ણેતી’’તિ. દુતિયમ્પિ વત્તબ્બા. તતિયમ્પિ વત્તબ્બા. સચે પટિનિસ્સજ્જન્તિ, ઇચ્ચેતં કુસલં; નો ચે પટિનિસ્સજ્જન્તિ, આપત્તિ દુક્કટસ્સ. તા ભિક્ખુનિયો સમનુભાસિતબ્બા. એવઞ્ચ પન, ભિક્ખવે, સમનુભાસિતબ્બા. બ્યત્તાય ભિક્ખુનિયા પટિબલાય સઙ્ઘો ઞાપેતબ્બો –

૭૨૪. ‘‘સુણાતુ મે, અય્યે, સઙ્ઘો. ઇત્થન્નામા ચ ઇત્થન્નામા ચ ભિક્ખુનિયો સંસટ્ઠા વિહરન્તિ પાપાચારા પાપસદ્દા પાપસિલોકા, ભિક્ખુનિસઙ્ઘસ્સ વિહેસિકા, અઞ્ઞમઞ્ઞિસ્સા વજ્જપ્પટિચ્છાદિકા. તા તં વત્થું ન પટિનિસ્સજ્જન્તિ. યદિ સઙ્ઘસ્સ પત્તકલ્લં, સઙ્ઘો ઇત્થન્નામઞ્ચ ઇત્થન્નામઞ્ચ ભિક્ખુનિયો સમનુભાસેય્ય તસ્સ વત્થુસ્સ પટિનિસ્સગ્ગાય. એસા ઞત્તિ.

‘‘સુણાતુ મે, અય્યે, સઙ્ઘો. ઇત્થન્નામા ચ ઇત્થન્નામા ચ ભિક્ખુનિયો સંસટ્ઠા વિહરન્તિ પાપાચારા પાપસદ્દા પાપસિલોકા, ભિક્ખુનિસઙ્ઘસ્સ વિહેસિકા, અઞ્ઞમઞ્ઞિસ્સા વજ્જપ્પટિચ્છાદિકા. તા તં વત્થું ન પટિનિસ્સજ્જન્તિ. સઙ્ઘો ઇત્થન્નામઞ્ચ ઇત્થન્નામઞ્ચ ભિક્ખુનિયો સમનુભાસતિ તસ્સ વત્થુસ્સ પટિનિસ્સગ્ગાય. યસ્સા અય્યાય ખમતિ ઇત્થન્નામાય ચ ઇત્થન્નામાય ચ ભિક્ખુનીનં સમનુભાસના તસ્સ વત્થુસ્સ પટિનિસ્સગ્ગાય, સા તુણ્હસ્સ; યસ્સા નક્ખમતિ, સા ભાસેય્ય.

‘‘દુતિયમ્પિ એતમત્થં વદામિ…પે… તતિયમ્પિ એતમત્થં વદામિ…પે….

‘‘સમનુભટ્ઠા સઙ્ઘેન, ઇત્થન્નામા ચ ઇત્થન્નામા ચ ભિક્ખુનિયો તસ્સ વત્થુસ્સ પટિનિસ્સગ્ગાય. ખમતિ સઙ્ઘસ્સ, તસ્મા તુણ્હી, એવમેતં ધારયામી’’તિ.

ઞત્તિયા દુક્કટં, દ્વીહિ કમ્મવાચાહિ થુલ્લચ્ચયા, કમ્મવાચાપરિયોસાને આપત્તિ સઙ્ઘાદિસેસસ્સ. સઙ્ઘાદિસેસં અજ્ઝાપજ્જન્તીનં ઞત્તિયા દુક્કટં દ્વીહિ કમ્મવાચાહિ થુલ્લચ્ચયા પટિપ્પસ્સમ્ભન્તિ. દ્વે તિસ્સો એકતો સમનુભાસિતબ્બા. તતુત્તરિ ન સમનુભાસિતબ્બા.

ઇમાપિ ભિક્ખુનિયોતિ પુરિમાયો ઉપાદાય વુચ્ચન્તિ.

યાવતતિયકન્તિ યાવતતિયં સમનુભાસનાય આપજ્જન્તિ, ન સહ વત્થુજ્ઝાચારા.

નિસ્સારણીયન્તિ સઙ્ઘમ્હા નિસ્સારીયતિ.

સઙ્ઘાદિસેસોતિ…પે… તેનપિ વુચ્ચતિ સઙ્ઘાદિસેસોતિ.

૭૨૫. ધમ્મકમ્મે ધમ્મકમ્મસઞ્ઞા ન પટિનિસ્સજ્જન્તિ, આપત્તિ સઙ્ઘાદિસેસસ્સ. ધમ્મકમ્મે વેમતિકા ન પટિનિસ્સજ્જન્તિ, આપત્તિ સઙ્ઘાદિસેસસ્સ. ધમ્મકમ્મે અધમ્મકમ્મસઞ્ઞા ન પટિનિસ્સજ્જન્તિ, આપત્તિ સઙ્ઘાદિસેસસ્સ.

અધમ્મકમ્મે ધમ્મકમ્મસઞ્ઞા, આપત્તિ દુક્કટસ્સ. અધમ્મકમ્મે વેમતિકા, આપત્તિ દુક્કટસ્સ. અધમ્મકમ્મે અધમ્મકમ્મસઞ્ઞા, આપત્તિ દુક્કટસ્સ.

૭૨૬. અનાપત્તિ અસમનુભાસન્તીનં, પટિનિસ્સજ્જન્તીનં, ઉમ્મત્તિકાનં, આદિકમ્મિકાનન્તિ.

નવમસઙ્ઘાદિસેસસિક્ખાપદં નિટ્ઠિતં.