૧૦. ચીવરઅપનિધાનસિક્ખાપદં

૩૭૭. તેન સમયેન બુદ્ધો ભગવા સાવત્થિયં વિહરતિ જેતવને અનાથપિણ્ડિકસ્સ આરામે. તેન ખો પન સમયેન સત્તરસવગ્ગિયા ભિક્ખૂ અસન્નિહિતપરિક્ખારા હોન્તિ. છબ્બગ્ગિયા ભિક્ખૂ સત્તરસવગ્ગિયાનં ભિક્ખૂનં પત્તમ્પિ ચીવરમ્પિ અપનિધેન્તિ. સત્તરસવગ્ગિયા ભિક્ખૂ છબ્બગ્ગિયે ભિક્ખૂ એતદવોચું – ‘‘દેથાવુસો, અમ્હાકં પત્તમ્પિ ચીવરમ્પી’’તિ. છબ્બગ્ગિયા ભિક્ખૂ હસન્તિ, તે રોદન્તિ. ભિક્ખૂ એવમાહંસુ – ‘‘કિસ્સ તુમ્હે, આવુસો, રોદથા’’તિ? ‘‘ઇમે, આવુસો, છબ્બગ્ગિયા ભિક્ખૂ અમ્હાકં પત્તમ્પિ ચીવરમ્પિ અપનિધેન્તી’’તિ. યે તે ભિક્ખૂ અપ્પિચ્છા…પે… તે ઉજ્ઝાયન્તિ ખિય્યન્તિ વિપાચેન્તિ – ‘‘કથઞ્હિ નામ છબ્બગ્ગિયા ભિક્ખૂ ભિક્ખૂનં પત્તમ્પિ ચીવરમ્પિ અપનિધેસ્સન્તી’’તિ…પે… સચ્ચં કિર તુમ્હે, ભિક્ખવે, ભિક્ખૂનં પત્તમ્પિ ચીવરમ્પિ અપનિધેથાતિ? ‘‘સચ્ચં, ભગવા’’તિ. વિગરહિ બુદ્ધો ભગવા…પે… કથઞ્હિ નામ તુમ્હે, મોઘપુરિસા, ભિક્ખૂનં પત્તમ્પિ ચીવરમ્પિ અપનિધેસ્સથ! નેતં, મોઘપુરિસા, અપ્પસન્નાનં વા પસાદાય…પે… એવઞ્ચ પન, ભિક્ખવે, ઇમં સિક્ખાપદં ઉદ્દિસેય્યાથ –

૩૭૮. ‘‘યો પન ભિક્ખુ ભિક્ખુસ્સ પત્તં વા ચીવરં વા નિસીદનં વા સૂચિઘરં વા કાયબન્ધનં વા અપનિધેય્ય વા અપનિધાપેય્ય વા, અન્તમસો હસાપેક્ખોપિ, પાચિત્તિય’’ન્તિ.

૩૭૯. યો પનાતિ યો યાદિસો…પે… ભિક્ખૂતિ…પે… અયં ઇમસ્મિં અત્થે અધિપ્પેતો ભિક્ખૂતિ.

ભિક્ખુસ્સાતિ અઞ્ઞસ્સ ભિક્ખુસ્સ.

પત્તો નામ દ્વે પત્તા – અયોપત્તો, મત્તિકાપત્તો.

ચીવરં નામ છન્નં ચીવરાનં અઞ્ઞતરં ચીવરં, વિકપ્પનુપગં પચ્છિમં.

નિસીદનં નામ સદસં વુચ્ચતિ.

સૂચિઘરં નામ સસૂચિકં વા અસૂચિકં વા.

કાયબન્ધનં નામ દ્વે કાયબન્ધનાનિ – પટ્ટિકા, સૂકરન્તકં.

અપનિધેય્ય વાતિ સયં અપનિધેતિ, આપત્તિ પાચિત્તિયસ્સ.

અપનિધાપેય્ય વાતિ અઞ્ઞં આણાપેસિ, આપત્તિ પાચિત્તિયસ્સ. અપનિધાપેય્ય વા તિ અય્યં આણાપેતિ, આપત્તિ પાચિત્તિયસ્સ. સકિં આણત્તો બહુકમ્પિ અપનિધેતિ, આપત્તિ પાચિત્તિયસ્સ.

અન્તમસો હસાપેક્ખોપીતિ કીળાધિપ્પાયો.

૩૮૦. ઉપસમ્પન્ને ઉપસમ્પન્નસઞ્ઞી પત્તં વા ચીવરં વા નિસીદનં વા સૂચિઘરં વા કાયબન્ધનં વા અપનિધેતિ વા અપનિધાપેતિ વા, અન્તમસો હસાપેક્ખોપિ, આપત્તિ પાચિત્તિયસ્સ. ઉપસમ્પન્ને વેમતિકો…પે… ઉપસમ્પન્ને અનુપસમ્પન્નસઞ્ઞી પત્તં વા ચીવરં વા નિસીદનં વા સૂચિઘરં વા કાયબન્ધનં વા અપનિધેતિ વા અપનિધાપેતિ વા, અન્તમસો હસાપેક્ખોપિ, આપત્તિ પાચિત્તિયસ્સ.

અઞ્ઞં પરિક્ખારં અપનિધેતિ વા અપનિધાપેતિ વા, અન્તમસો હસાપેક્ખોપિ, આપત્તિ દુક્કટસ્સ. અનુપસમ્પન્નસ્સ પત્તં વા ચીવરં વા અઞ્ઞં વા પરિક્ખારં અપનિધેતિ વા અપનિધાપેતિ વા, અન્તમસો હસાપેક્ખોપિ, આપત્તિ દુક્કટસ્સ. અનુપસમ્પન્ને ઉપસમ્પન્નસઞ્ઞી, આપત્તિ દુક્કટસ્સ. અનુપસમ્પન્ને વેમતિકો, આપત્તિ દુક્કટસ્સ. અનુપસમ્પન્ને અનુપસમ્પન્નસઞ્ઞી, આપત્તિ દુક્કટસ્સ.

૩૮૧. અનાપત્તિ નહસાધિપ્પાયો, દુન્નિક્ખિત્તં પટિસામેતિ, ‘‘ધમ્મિં કથં કત્વા દસ્સામી’’તિ પટિસામેતિ, ઉમ્મત્તકસ્સ, આદિકમ્મિકસ્સાતિ.

ચીવરઅપનિધાનસિક્ખાપદં નિટ્ઠિતં દસમં.

સુરાપાનવગ્ગો છટ્ઠો.

તસ્સુદ્દાનં –

સુરા અઙ્ગુલિ હાસો ચ [તોયઞ્ચ (ઇતિપિ)], અનાદરિયઞ્ચ ભિંસનં;

જોતિનહાનદુબ્બણ્ણં, સામં અપનિધેન ચાતિ.