૯. સેનાવાસસિક્ખાપદં

૩૧૭. તેન સમયેન બુદ્ધો ભગવા સાવત્થિયં વિહરતિ જેતવને અનાથપિણ્ડિકસ્સ આરામે. તેન ખો પન સમયેન છબ્બગ્ગિયા ભિક્ખૂ સતિ કરણીયે સેનં ગન્ત્વા અતિરેકતિરત્તં સેનાય વસન્તિ. મનુસ્સા ઉજ્ઝાયન્તિ ખિય્યન્તિ વિપાચેન્તિ – ‘‘કથઞ્હિ નામ સમણા સક્યપુત્તિયા સેનાય વસિસ્સન્તિ! અમ્હાકમ્પિ અલાભા, અમ્હાકમ્પિ દુલ્લદ્ધં, યે મયં આજીવસ્સ હેતુ પુત્તદારસ્સ કારણા સેનાય પટિવસામા’’તિ. અસ્સોસું ખો ભિક્ખૂ તેસં મનુસ્સાનં ઉજ્ઝાયન્તાનં ખિય્યન્તાનં વિપાચેન્તાનં. યે તે ભિક્ખૂ અપ્પિચ્છા…પે… તે ઉજ્ઝાયન્તિ ખિય્યન્તિ વિપાચેન્તિ – ‘‘કથઞ્હિ નામ છબ્બગ્ગિયા ભિક્ખૂ અતિરેકતિરત્તં સેનાય વસિસ્સન્તી’’તિ…પે… સચ્ચં કિર તુમ્હે, ભિક્ખવે, અતિરેકતિરત્તં સેનાય વસથાતિ? ‘‘સચ્ચં, ભગવા’’તિ. વિગરહિ બુદ્ધો ભગવા…પે… કથઞ્હિ નામ તુમ્હે, મોઘપુરિસા, અતિરેકતિરત્તં સેનાય વસિસ્સથ! નેતં, મોઘપુરિસા, અપ્પસન્નાનં વા પસાદાય…પે… એવઞ્ચ પન, ભિક્ખવે, ઇમં સિક્ખાપદં ઉદ્દિસેય્યાથ –

૩૧૮. ‘‘સિયા ચ તસ્સ ભિક્ખુનો કોચિદેવ પચ્ચયો સેનં ગમનાય, દિરત્તતિરત્તં તેન ભિક્ખુના સેનાય વસિતબ્બં. તતો ચે ઉત્તરિં વસેય્ય, પાચિત્તિય’’ન્તિ.

૩૧૯. સિયા ચ તસ્સ ભિક્ખુનો કોચિદેવ પચ્ચયો સેનં ગમનાયાતિ સિયા પચ્ચયો સિયા કરણીયં.

દિરત્તતિરત્તં તેન ભિક્ખુના સેનાય વસિતબ્બન્તિ દ્વેતિસ્સો રત્તિયો વસિતબ્બં.

તતો ચે ઉત્તરિ વસેય્યાતિ ચતુત્થે દિવસે અત્થઙ્ગતે સૂરિયે સેનાય વસતિ, આપત્તિ પાચિત્તિયસ્સ.

૩૨૦. અતિરેકતિરત્તે અતિરેકસઞ્ઞી સેનાય વસતિ, આપત્તિ પાચિત્તિયસ્સ. અતિરેકતિરત્તે વેમતિકો સેનાય વસતિ, આપત્તિ પાચિત્તિયસ્સ. અતિરેકતિરત્તે ઊનકસઞ્ઞી સેનાય વસતિ, આપત્તિ પાચિત્તિયસ્સ.

ઊનકતિરત્તે અતિરેકસઞ્ઞી, આપત્તિ દુક્કટસ્સ. ઊનકતિરત્તે વેમતિકો, આપત્તિ દુક્કટસ્સ. ઊનકતિરત્તે ઊનકસઞ્ઞી, અનાપત્તિ.

૩૨૧. અનાપત્તિ દ્વેતિસ્સો રત્તિયો વસતિ, ઊનકદ્વેતિસ્સો રત્તિયો વસતિ, દ્વે રત્તિયો વસિત્વા તતિયાય રત્તિયા પુરારુણા નિક્ખમિત્વા પુન વસતિ, ગિલાનો વસતિ, ગિલાનસ્સ કરણીયેન વસતિ, સેના વા પટિસેનાય રુદ્ધા હોતિ, કેનચિ પલિબુદ્ધો હોતિ, આપદાસુ, ઉમ્મત્તકસ્સ, આદિકમ્મિકસ્સાતિ.

સેનાવાસસિક્ખાપદં નિટ્ઠિતં નવમં.