૧. અચેલકસિક્ખાપદં

૨૬૯. તેન સમયેન બુદ્ધો ભગવા વેસાલિયં વિહરતિ મહાવને કૂટાગારસાલાયં. તેન ખો પન સમયેન સઙ્ઘસ્સ ખાદનીયં ઉસ્સન્નં હોતિ. અથ ખો આયસ્મા આનન્દો ભગવતો એતમત્થં આરોચેસિ. ‘‘તેનહાનન્દ, વિઘાસાદાનં પૂવં દેહી’’તિ. ‘‘એવં ભન્તે’’તિ ખો આયસ્મા આનન્દો ભગવતો પટિસ્સુણિત્વા વિઘાસાદે પટિપાટિયા નિસીદાપેત્વા એકેકં પૂવં દેન્તો અઞ્ઞતરિસ્સા પરિબ્બાજિકાય એકં મઞ્ઞમાનો દ્વે પૂવે અદાસિ. સામન્તા પરિબ્બાજિકાયો તં પરિબ્બાજિકં એતદવોચું – ‘‘જારો તે એસો સમણો’’તિ. ‘‘ન મે સો સમણો જારો, એકં મઞ્ઞમાનો દ્વે પૂવે અદાસી’’તિ. દુતિયમ્પિ ખો…પે… તતિયમ્પિ ખો આયસ્મા આનન્દો એકેકં પૂવં દેન્તો તસ્સાયેવ પરિબ્બાજિકાય એકં મઞ્ઞમાનો દ્વે પૂવે અદાસિ. સામન્તા પરિબ્બાજિકાયો તં પરિબ્બાજિકં એતદવોચું – ‘‘જારો તે એસો સમણો’’તિ. ‘‘ન મે સો સમણો જારો, એકં મઞ્ઞમાનો દ્વે પૂવે અદાસી’’તિ. ‘‘જારો ન જારો’’તિ ભણ્ડિંસુ. અઞ્ઞતરોપિ આજીવકો પરિવેસનં અગમાસિ. અઞ્ઞતરો ભિક્ખુ પહૂતેન સપ્પિના ઓદનં મદ્દિત્વા તસ્સ આજીવકસ્સ મહન્તં પિણ્ડં અદાસિ. અથ ખો સો આજીવકો તં પિણ્ડં આદાય અગમાસિ. અઞ્ઞતરો આજીવકો તં આજીવકં એતદવોચ – ‘‘કુતો તયા, આવુસો, પિણ્ડો લદ્ધો’’તિ? ‘‘તસ્સાવુસો, સમણસ્સ ગોતમસ્સ મુણ્ડગહપતિકસ્સ પરિવેસનાય લદ્ધો’’તિ.

અસ્સોસું ખો ઉપાસકા તેસં આજીવકાનં ઇમં કથાસલ્લાપં. અથ ખો તે ઉપાસકા યેન ભગવા તેનુપસઙ્કમિંસુ; ઉપસઙ્કમિત્વા ભગવન્તં અભિવાદેત્વા એકમન્તં નિસીદિંસુ. એકમન્તં નિસિન્ના ખો તે ઉપાસકા ભગવન્તં એતદવોચું – ‘‘ઇમે, ભન્તે, તિત્થિયા અવણ્ણકામા બુદ્ધસ્સ અવણ્ણકામા ધમ્મસ્સ અવણ્ણકામા સઙ્ઘસ્સ. સાધુ, ભન્તે, અય્યા તિત્થિયાનં સહત્થા ન દદેય્યુ’’ન્તિ. અથ ખો ભગવા તે ઉપાસકે ધમ્મિયા કથાય સન્દસ્સેસિ સમાદપેસિ સમુત્તેજેસિ સમ્પહંસેસિ. અથ ખો તે ઉપાસકા ભગવતા ધમ્મિયા કથાય સન્દસ્સિતા સમાદપિતા સમુત્તેજિતા સમ્પહંસિતા ઉટ્ઠાયાસના ભગવન્તં અભિવાદેત્વા પદક્ખિણં કત્વા પક્કમિંસુ. અથ ખો ભગવા એતસ્મિં નિદાને એતસ્મિં પકરણે ધમ્મિં કથં કત્વા ભિક્ખૂ આમન્તેસિ – ‘‘તેન હિ, ભિક્ખવે, ભિક્ખૂનં સિક્ખાપદં પઞ્ઞપેસ્સામિ દસ અત્થવસે પટિચ્ચ – સઙ્ઘસુટ્ઠુતાય, સઙ્ઘફાસુતાય …પે… સદ્ધમ્મટ્ઠિતિયા, વિનયાનુગ્ગહાય. એવઞ્ચ પન, ભિક્ખવે, ઇમં સિક્ખાપદં ઉદ્દિસેય્યાથ –

૨૭૦. ‘‘યો પન ભિક્ખુ અચેલકસ્સ વા પરિબ્બાજકસ્સ વા પરિબ્બાજિકાય વા સહત્થા ખાદનીયં વા ભોજનીયં વા દદેય્ય, પાચિત્તિય’’ન્તિ.

૨૭૧. યો પનાતિ યો યાદિસો…પે… ભિક્ખૂતિ…પે… અયં ઇમસ્મિં અત્થે અધિપ્પેતો ભિક્ખૂતિ.

અચેલકો નામ યો કોચિ પરિબ્બાજકસમાપન્નો નગ્ગો.

પરિબ્બાજકો નામ ભિક્ખુઞ્ચ સામણેરઞ્ચ ઠપેત્વા યો કોચિ પરિબ્બાજકસમાપન્નો.

પરિબ્બાજિકા નામ ભિક્ખુનિઞ્ચ સિક્ખમાનઞ્ચ સામણેરિઞ્ચ ઠપેત્વા યા કાચિ પરિબ્બાજિકસમાપન્ના.

ખાદનીયં નામ પઞ્ચ ભોજનાનિ – ઉદકદન્તપોનં ઠપેત્વા અવસેસં ખાદનીયં નામ.

ભોજનીયં નામ પઞ્ચ ભોજનાનિ – ઓદનો, કુમ્માસો, સત્તુ, મચ્છો, મંસં.

દદેય્યાતિ કાયેન વા કાયપટિબદ્ધેન વા નિસ્સગ્ગિયેન વા દેતિ, આપત્તિ પાચિત્તિયસ્સ.

૨૭૨. તિત્થિયે તિત્થિયસઞ્ઞી સહત્થા ખાદનીયં વા ભોજનીયં વા દેતિ, આપત્તિ પાચિત્તિયસ્સ. તિત્થિયે વેમતિકો સહત્થા ખાદનીયં વા ભોજનીયં વા દેતિ, આપત્તિ પાચિત્તિયસ્સ. તિત્થિયે અતિત્થિયસઞ્ઞી સહત્થા ખાદનીયં વા ભોજનીયં વા દેતિ, આપત્તિ પાચિત્તિયસ્સ.

ઉદકદન્તપોનં દેતિ, આપત્તિ દુક્કટસ્સ. અતિત્થિયે તિત્થિયસઞ્ઞી, આપત્તિ દુક્કટસ્સ. અતિત્થિયે વેમતિકો, આપત્તિ દુક્કટસ્સ. અતિત્થિયે અતિત્થિયસઞ્ઞી, અનાપત્તિ.

૨૭૩. અનાપત્તિ દાપેતિ ન દેતિ, ઉપનિક્ખિપિત્વા દેતિ, બાહિરાલેપં દેતિ, ઉમ્મત્તકસ્સ, આદિકમ્મિકસ્સાતિ.

અચેલકસિક્ખાપદં નિટ્ઠિતં પઠમં.