સમુટ્ઠાનસીસકથાવણ્ણના

૩૨૫-૬. મહેસિના દ્વીસુ વિભઙ્ગેસુ પઞ્ઞત્તાનિ યાનિ પારાજિકાદીનિ સિક્ખાપદાનિ ઉપોસથે ઉદ્દિસન્તિ, તેસં સિક્ખાપદાનં સમુટ્ઠાનં ભિક્ખૂનં પાટવત્થાય ઇતો પરં પવક્ખામિ, તં સમાહિતા સુણાથાતિ યોજના.

૩૨૭. કાયો ચ વાચા ચ કાયવાચા ચાતિ અચિત્તકાનિ યાનિ તીણિ સમુટ્ઠાનાનિ, તાનેવ ચિત્તેન પચ્ચેકં યોજિતાનિ સચિત્તકાનિ તીણિ સમુટ્ઠાનાનિ હોન્તીતિ એવમેવ સમુટ્ઠાનં પુરિમાનં દ્વિન્નં વસેન એકઙ્ગિકં, તતિયચતુત્થપઞ્ચમાનં વસેન દ્વઙ્ગિકં, છટ્ઠસ્સ વસેન તિવઙ્ગિકઞ્ચાતિ એવં છધા સમુટ્ઠાનવિધિં વદન્તીતિ યોજના. કાયો, વાચાતિ એકઙ્ગિકં દ્વયં, કાયવાચા, કાયચિત્તં, વાચાચિત્તન્તિ દુવઙ્ગિકત્તયં, કાયવાચાચિત્તન્તિ અઙ્ગભેદેન તિવિધમ્પિ અવયવભેદેન સમુટ્ઠાનભેદવિધિં છપ્પકારં વદન્તીતિ અધિપ્પાયો.

૩૨૮. તેસુ છસુ સમુટ્ઠાનેસુ એકેન વા સમુટ્ઠાનેન દ્વીહિ વા તીહિ વા ચતૂહિ વા છહિ વા સમુટ્ઠાનેહિ નાના આપત્તિયો જાયરેતિ સમ્બન્ધો.

૩૨૯. તત્થ તાસુ નાનાપત્તીસુ. પઞ્ચ સમુટ્ઠાનાનિ એતિસ્સાતિ પઞ્ચસમુટ્ઠાના, એવરૂપા કાચિ આપત્તિ ન વિજ્જતિ. એકમેકં સમુટ્ઠાનં યાસન્તિ વિગ્ગહો. પચ્છિમેહેવ તીહિપીતિ સચિત્તકેહેવ તીહિ સમુટ્ઠાનેહિ, યા આપત્તિ એકસમુટ્ઠાના હોતિ, સા સચિત્તકાનં તિણ્ણમઞ્ઞતરેન હોતીતિ અધિપ્પાયો.

૩૩૦-૧. તતિયચ્છટ્ઠતોપિ ચાતિ કાયવાચતો, કાયવાચાચિત્તતો ચ. ચતુત્થચ્છટ્ઠતો ચેવાતિ કાયચિત્તતો કાયવાચાચિત્તતો ચ. પઞ્ચમચ્છટ્ઠતોપિ ચાતિ વાચાચિત્તતો કાયવાચાચિત્તતો ચ. ‘‘કાયતો કાયચિત્તતો’’તિ પઠમં દ્વિસમુટ્ઠાનં, ‘‘વાચતો વાચાચિત્તતો’’તિ દુતિયં, ‘‘કાયવાચતો કાયવાચાચિત્તતો’’તિ તતિયં, ‘‘કાયચિત્તતો કાયવાચાચિત્તતો’’તિ ચતુત્થં, ‘‘વાચાચિત્તતો કાયવાચાચિત્તતો’’તિ પઞ્ચમં દ્વિસમુટ્ઠાનન્તિ એવં પઞ્ચધા એવ ઠિતેહિ દ્વીહિ સમુટ્ઠાનેહિ એસા દ્વિસમુટ્ઠાનાપત્તિ જાયતે સમુટ્ઠાતિ. ન અઞ્ઞતોતિ કાયતો વાચતોતિ એકં, વાચતો કાયવાચતોતિ એકન્તિ એવં યથાવુત્તક્કમવિપરિયાયેન યોજિતેહિ અઞ્ઞેહિ સમુટ્ઠાનેહિ ન સમુટ્ઠાતિ.

૩૩૨. પઠમેહિ ચ તીહીતિ ‘‘કાયતો, વાચતો, કાયવાચતો’’તિ પઠમં નિદ્દિટ્ઠેહિ તીહિ અચિત્તકસમુટ્ઠાનેહિ. પચ્છિમેહિ ચાતિ ‘‘કાયચિત્તતો, વાચાચિત્તતો, કાયવાચાચિત્તતો’’તિ એવં પચ્છા વુત્તેહિ સચિત્તકેહિ તીહિ સમુટ્ઠાનેહિ. ન અઞ્ઞતોતિ ‘‘કાયતો, વાચતો, કાયચિત્તતો, વાચતો, કાયવાચતો, કાયચિત્તતો’’તિ એવં વુત્તવિપલ્લાસતો અઞ્ઞેહિ તીહિ સમુટ્ઠાનેહિ ન સમુટ્ઠાતિ.

૩૩૩-૪. પઠમા તતિયા ચેવ, ચતુત્થચ્છટ્ઠતોપિ ચાતિ કાયતો, કાયવાચતો, કાયચિત્તતો, કાયવાચાચિત્તતોતિ એતેહિ ચતૂહિ સમુટ્ઠાનેહિ ચેવ. દુતિયા…પે… ચ્છટ્ઠતોપિ ચાતિ વાચતો, કાયવાચતો, વાચાચિત્તતો, કાયવાચાચિત્તતોતિ ઇમેહિ ચતૂહિ ચાતિ ચતુસમુટ્ઠાનેનાપત્તિ.

સા એવં દ્વિધા ઠિતેહિ ચતૂહિ સમુટ્ઠાનેહિ જાયતે. ન પનઞ્ઞતોતિ ‘‘કાયતો, વાચતો, કાયવાચતો, કાયચિત્તતો’’તિ એવમાદિના વિપલ્લાસનયેન યોજિતેહિ ચતૂહિ સમુટ્ઠાનેહિ ન સમુટ્ઠાતિ. છ સમુટ્ઠાનાનિ યસ્સા સા છસમુટ્ઠાના. સચિત્તકેહિ તીહિ, અચિત્તકેહિ તીહીતિ છહિ એવ સમુટ્ઠાનેહિ સમુટ્ઠાતીતિ. પકારન્તરાભાવા ઇધ ‘‘ન અઞ્ઞતો’’તિ ન વુત્તં.

આહ ચ અટ્ઠકથાચરિયો માતિકટ્ઠકથાયં.

૩૩૫. સમુટ્ઠાતિ એતસ્માતિ સમુટ્ઠાનં, કાયાદિ છબ્બિધં, એકં સમુટ્ઠાનં કારણં યસ્સા સા એકસમુટ્ઠાના. પકારન્તરાભાવા તિધા. કથં? સચિત્તકાનં તિણ્ણં સમુટ્ઠાનાનં વસેન તિવિધા. દ્વીહિ સમુટ્ઠાનેહિ સમુટ્ઠિતા દ્વિસમુટ્ઠિતા, દ્વિસમુટ્ઠાનાપત્તીતિ અત્થો. પઞ્ચધાતિ વુત્તનયેન પઞ્ચપ્પકારા. તીણિ સમુટ્ઠાનાનિ યસ્સા સા તિસમુટ્ઠાના, ચત્તારિ સમુટ્ઠાનાનિ યસ્સા સા ચતુરુટ્ઠાના, તિસમુટ્ઠાના ચ ચતુરુટ્ઠાના ચ તિચતુરુટ્ઠાનાતિ એકદેસસરૂપેકસેસો, તિસમુટ્ઠાના દ્વિધા વિભત્તા, ચતુસમુટ્ઠાના ચ દ્વિધા એવ વિભત્તાતિ અત્થો. છહિ સમુટ્ઠાનેહિ સમુટ્ઠિતા છસમુટ્ઠિતા, છસમુટ્ઠાનાતિ અત્થો. એકધાતિ પકારન્તરાભાવા એકધાવ ઠિતાતિ અધિપ્પાયો.

૩૩૬. સબ્બા આપત્તિયો સમુટ્ઠાનવિસેસતો એવં તેરસધા ઠિતાનં સમુટ્ઠાનભેદાનં નાનત્તતો તેહિ સમુટ્ઠિતાનં પઠમં પઞ્ઞત્તત્તા સીસભૂતાનં સિક્ખાપદાનં વસેન તેરસેવ નામાનિ લભન્તિ, તાનિ ઇતો પરં વક્ખામીતિ યોજના.

૩૩૭. પઠમન્તિમવત્થુઞ્ચાતિ પઠમપારાજિકસમુટ્ઠાનં. દુતિયન્તિ અદિન્નાદાનસમુટ્ઠાનં. સઞ્ચરિત્તકન્તિ સઞ્ચરિત્તસમુટ્ઠાનં. સમનુભાસનન્તિ સમનુભાસનસમુટ્ઠાનં. ‘‘કથિનં એળકલોમક’’ન્તિ પદચ્છેદો, કથિનસમુટ્ઠાનં એળકલોમસમુટ્ઠાનઞ્ચ.

૩૩૮. પદસોધમ્મન્તિ પદસોધમ્મસમુટ્ઠાનં. અદ્ધાનં થેય્યસત્થન્તિ અદ્ધાનસમુટ્ઠાનં થેય્યસત્થસમુટ્ઠાનં. દેસનાતિ ધમ્મદેસનાસમુટ્ઠાનં. ભૂતારોચનકન્તિ ભૂતારોચનસમુટ્ઠાનં. ચોરિવુટ્ઠાપનન્તિ ચોરિવુટ્ઠાપનસમુટ્ઠાનં.

૩૩૯. અનનુઞ્ઞાતકઞ્ચાતિ અનનુઞ્ઞાતકસમુટ્ઠાનઞ્ચાતિ એતાનિ તેરસ તેહિ સમુટ્ઠાનેહિ સમુટ્ઠિતાનં તેસં સિક્ખાપદાનં પઠમં પઠમં નિદ્દિટ્ઠાનં પઠમપારાજિકાદિસિક્ખાપદસમુટ્ઠાનાનં ઇતરેસં પુબ્બઙ્ગમભાવતો ‘‘સીસાની’’તિ વુત્તાનિ. યથાહ પરિવારટ્ઠકથાયં ‘‘પઠમપારાજિકં નામ એકં સમુટ્ઠાનસીસં, સેસાનિ તેન સદિસાની’’તિઆદિ (પરિ. અટ્ઠ. ૨૫૮). તેરસેતે સમુટ્ઠાનનયાતિ એતે સીસવસેન દસ્સિતા તેરસ સમુટ્ઠાનનયા. વિઞ્ઞૂહિ ઉપાલિત્થેરાદીહિ.

૩૪૦. તત્થ તેરસસુ સમુટ્ઠાનસીસેસુ. યાતિ યા પન આપત્તિ. આદિપારાજિકુટ્ઠાનાતિ પઠમપારાજિકસમુટ્ઠાના.

૩૪૧. અદિન્નાદાન-સદ્દો પુબ્બકો પઠમો એતિસ્સા તંસમુટ્ઠાનાપત્તિયાતિ અદિન્નાદાનપુબ્બકા, અદિન્નાદાનસમુટ્ઠાનાતિ ઉદ્દિટ્ઠાતિ યોજના.

૩૪૨. જાતૂતિ એકંસેન.

૩૪૩. અયં સમુટ્ઠાનવસેન ‘‘સમનુભાસનાસમુટ્ઠાના’’તિ વુત્તાતિ યોજના.

૩૪૪. કથિન-સદ્દો ઉપપદો યસ્સા તંસમુટ્ઠાનાય આપત્તિયા સા કથિનુપપદા, કથિનસમુટ્ઠાનાતિ મતા ઞાતા, અયં સમુટ્ઠાનવસેન ‘‘કથિનસમુટ્ઠાના’’તિ ઞાતાતિ અત્થો.

૩૪૫. એળકલોમ-સદ્દો આદિ યસ્સા તંસમુટ્ઠાનાપત્તિયા સા એળકલોમાદિસમુટ્ઠાનાતિ અત્થો.

૩૪૯. એત્થ સમુટ્ઠાનેસુ.

૩૫૦. ભૂતારોચન-સદ્દો પુબ્બભાગો એતિસ્સા તંસમુટ્ઠાનાય આપત્તિયાતિ ભૂતારોચનપુબ્બકા, ભૂતારોચનસમુટ્ઠાનાતિ અત્થો.

૩૫૧. સમુટ્ઠાનં સમુટ્ઠિતં, ચોરિવુટ્ઠાપનં સમુટ્ઠિતં યસ્સા સા ચોરિવુટ્ઠાપનસમુટ્ઠિતા, ચોરિવુટ્ઠાપનસમુટ્ઠાનાતિ અત્થો.

૩૫૩. તત્થાતિ તેરસસમુટ્ઠાનસીસેસુ, ‘‘સમુટ્ઠાનં સચિત્તક’’ન્તિ ઇદં ‘‘પઠમ’’ન્તિઆદીહિ પચ્ચેકં યોજેતબ્બં. પઠમં સમુટ્ઠાનન્તિ પઠમપારાજિકસમુટ્ઠાનં. દુતિયં સમુટ્ઠાનન્તિ અદિન્નાદાનસમુટ્ઠાનં. ચતુત્થં સમુટ્ઠાનન્તિ સમનુભાસનસમુટ્ઠાનં. નવમં સમુટ્ઠાનન્તિ થેય્યસત્થસમુટ્ઠાનં. દસમં સમુટ્ઠાનન્તિ ધમ્મદેસનાસમુટ્ઠાનં. દ્વાદસમં સમુટ્ઠાનન્તિ ચોરિવુટ્ઠાપનસમુટ્ઠાનં.

૩૫૪. સમુટ્ઠાનેતિ સમુટ્ઠાનસીસે. સદિસાતિ તેન તેન સમુટ્ઠાનસીસેન સમુટ્ઠાના આપત્તિયો. ઇધાતિ ઇમસ્મિં સમુટ્ઠાનવિનિચ્છયે. દિસ્સરેતિ દિસ્સન્તે, દિસ્સન્તીતિ અત્થો. અથ વા ઇધ દિસ્સરેતિ ઇધ ઉભતોવિભઙ્ગે એતેસુ તેરસસમુટ્ઠાનેસુ એકેકસ્મિં અઞ્ઞાનિપિ સદિસાનિ સમુટ્ઠાનાનિ દિસ્સન્તીતિ અત્થો. ઇદાનિ તાનિ સરૂપતો નિદસ્સેતુમાહ ‘‘સુક્કઞ્ચા’’તિઆદિ. તત્થ સુક્કન્તિ સુક્કવિસ્સટ્ઠિસિક્ખાપદં. એસ નયો ‘‘કાયસંસગ્ગો’’તિઆદીસુપિ. યદેત્થ દુવિઞ્ઞેય્યં, તં વક્ખામ.

૩૫૫. પુબ્બુપપરિપાકો ચાતિ ‘‘જાનં પુબ્બુપગતં ભિક્ખુ’’ન્તિ (પાચિ. ૧૨૦) સિક્ખાપદઞ્ચ ‘‘ભિક્ખુનિપરિપાચિત’’ન્તિ (પાચિ. ૧૯૨, ૧૯૪) પિણ્ડપાતસિક્ખાપદઞ્ચ. રહો ભિક્ખુનિયાસહાતિ ભિક્ખુનિયા સદ્ધિં રહો નિસજ્જસિક્ખાપદઞ્ચ. સભોજને, રહો દ્વે ચાતિ સભોજને કુલે અનુપખજ્જસિક્ખાપદઞ્ચ દ્વે રહોનિસજ્જસિક્ખાપદાનિ ચ. અઙ્ગુલી ઉદકે હસન્તિ અઙ્ગુલિપતોદઞ્ચ ઉદકહસધમ્મસિક્ખાપદઞ્ચ.

૩૫૬. પહારે ઉગ્ગિરે ચેવાતિ પહારદાનસિક્ખાપદઞ્ચ તલસત્તિઉગ્ગિરણસિક્ખાપદઞ્ચ. તેપઞ્ઞાસા ચ સેખિયાતિ પઞ્ચસત્તતિસેખિયાસુ વક્ખમાનાનિ ઉજ્જગ્ઘિકાદીનિ સમનુભાસનસમુટ્ઠાનાનિ દસ, છત્તપાણિઆદીનિ ધમ્મદેસનાસમુટ્ઠાનાનિ એકાદસ, થેય્યસત્થસમુટ્ઠાનં, સૂપોદનવિઞ્ઞત્તિસિક્ખાપદઞ્ચાતિ બાવીસતિ સિક્ખાપદાનિ ઠપેત્વા પરિમણ્ડલનિવાસનાદીનિ ઇતરાનિ તેપઞ્ઞાસ સેખિયસિક્ખાપદાનિ ચ. અધક્ખકુબ્ભજાણુઞ્ચાતિ ભિક્ખુનીનં અધક્ખકઉબ્ભજાણુસિક્ખાપદઞ્ચ. ગામન્તરમવસ્સુતાતિ ગામન્તરગમનં, અવસ્સુતસ્સ હત્થતો ખાદનીયગ્ગહણસિક્ખાપદઞ્ચ.

૩૫૭-૮. તલમટ્ઠુદસુદ્ધિ ચાતિ તલઘાતં, જતુમટ્ઠં, ઉદકસુદ્ધિકાદિયનઞ્ચ. વસ્સંવુત્થાતિ ‘‘વસ્સંવુત્થા…પે… છપ્પઞ્ચયોજનાની’’તિ (પાચિ. ૯૭૪) સિક્ખાપદઞ્ચ. ઓવાદાય ન ગચ્છન્તીતિ ઓવાદાય અગમનસિક્ખાપદઞ્ચ. નાનુબન્ધે પવત્તિનિન્તિ ‘‘વુટ્ઠાપિતં પવત્તિનિં દ્વે વસ્સાનિ નાનુબન્ધેય્યા’’તિ (પાચિ. ૧૧૧૨) સિક્ખાપદઞ્ચાતિ ઉભતોવિભઙ્ગે નિદ્દિટ્ઠા ઇમે પઞ્ચસત્તતિ ધમ્મા કાયચિત્તસમુટ્ઠિતા મેથુનેન સમા એકસમુટ્ઠાના મતાતિ યોજના.

એત્થ ચ પાળિયં ‘‘છસત્તતી’’તિ ગણનપરિચ્છેદો સમુટ્ઠાનસિક્ખાપદેન સહ દસ્સિતો. ઇધ પન તં વિના તંસદિસાનમેવ ગણના દસ્સિતા. તેનેવ પઠમં સમુટ્ઠાનસીસં પાળિયં ગણનાયપિ દસ્સિતં, ઇધેવ ન દસ્સિતં. ઉપરિ કત્થચિ સમુટ્ઠાનસીસસ્સ દસ્સનં પનેત્થ વક્ખમાનાનં તંસદિસભાવદસ્સનત્થં, ગણનાય વક્ખમાનાય અન્તોગધભાવદસ્સનત્થં. તેનેવ તત્થપિ તં વિના ગણનં વક્ખતિ.

પઠમપારાજિકસમુટ્ઠાનવણ્ણના.

૩૫૯. વિગ્ગહન્તિ મનુસ્સવિગ્ગહસિક્ખાપદં. ઉત્તરિ ચેવાતિ ઉત્તરિમનુસ્સધમ્મસિક્ખાપદઞ્ચ. દુટ્ઠુલ્લન્તિ દુટ્ઠુલ્લવાચાસિક્ખાપદં. અત્તકામતાતિ અત્તકામપારિચરિયસિક્ખાપદઞ્ચ. દુટ્ઠદોસા દુવે ચેવાતિ દ્વે દુટ્ઠદોસસિક્ખાપદાનિ ચ. દુતિયાનિયતોપિ ચાતિ દુતિયઅનિયતસિક્ખાપદઞ્ચ.

૩૬૦. અચ્છિન્દનઞ્ચાતિ સામં ચીવરં દત્વા અચ્છિન્દનઞ્ચ. પરિણામોતિ સઙ્ઘિકલાભસ્સ અત્તનો પરિણામનઞ્ચ. મુસાઓમસપેસુણાતિ મુસાવાદો ચ ઓમસવાદો ચ ભિક્ખુપેસુઞ્ઞઞ્ચ. દુટ્ઠુલ્લારોચનઞ્ચેવાતિ દુટ્ઠુલ્લાપત્તિઆરોચનસિક્ખાપદઞ્ચ. પથવીખણનમ્પિ ચાતિ પથવીખણનસિક્ખાપદઞ્ચ.

૩૬૧. ભૂતગામઞ્ચ વાદો ચાતિ ભૂતગામસિક્ખાપદં, અઞ્ઞવાદકસિક્ખાપદઞ્ચ. ઉજ્ઝાપનકમેવ ચાતિ ઉજ્ઝાપનકસિક્ખાપદઞ્ચ. નિક્કડ્ઢો સિઞ્ચનઞ્ચેવાતિ વિહારતો નિક્કડ્ઢનઞ્ચ ઉદકે તિણાદિસિઞ્ચનઞ્ચ. આમિસહેતુ ચાતિ આમિસહેતુ ભિક્ખુનિયો ઓવાદસિક્ખાપદઞ્ચ.

૩૬૨. ભુત્તાવિન્તિ ભુત્તાવિં અનતિરિત્તેન ખાદનીયાદિના પવારણસિક્ખાપદઞ્ચ. એહનાદરિન્તિ ‘‘એહાવુસો, ગામં વા’’તિ (પાચિ. ૨૭૫) વુત્તસિક્ખાપદઞ્ચ અનાદરિયસિક્ખાપદઞ્ચ. ભિંસાપનમેવ ચાતિ ભિક્ખુભિંસનકઞ્ચ. અપનિધેય્યાતિ પત્તાદિઅપનિધાનસિક્ખાપદઞ્ચ. સઞ્ચિચ્ચ પાણન્તિ સઞ્ચિચ્ચ પાણં જીવિતાવોરોપનઞ્ચ. સપ્પાણકમ્પિ ચાતિ જાનં સપ્પાણકઉદકસિક્ખાપદઞ્ચ.

૩૬૩. ઉક્કોટનઞ્ચાતિ પુનકમ્માય ઉક્કોટનઞ્ચ. ઊનોતિ ઊનવીસતિવસ્સસિક્ખાપદઞ્ચ. સંવાસોતિ ઉક્ખિત્તકેન સદ્ધિં સંવાસસિક્ખાપદઞ્ચ. નાસને ચાતિ નાસિતકસામણેરસમ્ભોગસિક્ખાપદઞ્ચ. સહધમ્મિકન્તિ સહધમ્મિકં વુચ્ચમાનસિક્ખાપદઞ્ચ. વિલેખા ચાતિ ‘‘વિલેખાય સંવત્તન્તી’’તિ (પાચિ. ૪૩૯) આગતસિક્ખાપદઞ્ચ. મોહનાતિ મોહનસિક્ખાપદઞ્ચ. અમૂલકેન ચાતિ અમૂલકેન સઙ્ઘાદિસેસેન અનુદ્ધંસનસિક્ખાપદઞ્ચ.

૩૬૪. કુક્કુચ્ચં ખીયનં દત્વાતિ કુક્કુચ્ચઉપ્પાદનઞ્ચ ધમ્મિકાનં કમ્માનં છન્દં દત્વા ખીયનઞ્ચ ચીવરં દત્વા ખીયનઞ્ચ. પરિણામેય્ય પુગ્ગલેતિ સઙ્ઘિકં લાભં પુગ્ગલસ્સ પરિણામનસિક્ખાપદઞ્ચ. કિં તે, અકાલં, અચ્છિન્દેતિ ‘‘કિં તે, અય્યે, એસો પુરિસપુગ્ગલો કરિસ્સતી’’તિ (પાચિ. ૭૦૫) આગતસિક્ખાપદઞ્ચ અકાલચીવરં ‘‘કાલચીવર’’ન્તિ અધિટ્ઠહિત્વા ભાજનસિક્ખાપદઞ્ચ ભિક્ખુનિયા સદ્ધિં ચીવરં પરિવત્તેત્વા અચ્છિન્દનસિક્ખાપદઞ્ચ. દુગ્ગહનિરયેન ચાતિ દુગ્ગહિતેન દુપધારિતેન પરં ઉજ્ઝાપનસિક્ખાપદઞ્ચ નિરયેન વા બ્રહ્મચરિયેન વા અભિસપનસિક્ખાપદઞ્ચ.

૩૬૫. ગણસ્સ ચાતિ ‘‘ગણસ્સ ચીવરલાભં અન્તરાયં કરેય્યા’’તિ (પાચિ. ૯૦૮) વુત્તસિક્ખાપદઞ્ચ. વિભઙ્ગઞ્ચાતિ ‘‘ધમ્મિકં ચીવરવિભઙ્ગં પટિબાહેય્યા’’તિ (પાચિ. ૯૧૨) વુત્તસિક્ખાપદઞ્ચ. દુબ્બલાસા તથેવ ચાતિ ‘‘દુબ્બલચીવરપચ્ચાસાય ચીવરકાલસમયં અતિક્કામેય્યા’’તિ (પાચિ. ૯૨૧) વુત્તસિક્ખાપદઞ્ચ. ધમ્મિકં કથિનુદ્ધારન્તિ ‘‘ધમ્મિકં કથિનુદ્ધારં પટિબાહેય્યા’’તિ (પાચિ. ૯૨૮) વુત્તસિક્ખાપદઞ્ચ. સઞ્ચિચ્ચાફાસુમેવ ચાતિ ‘‘ભિક્ખુનિયા સઞ્ચિચ્ચ અફાસું કરેય્યા’’તિ (પાચિ. ૯૪૨) વુત્તસિક્ખાપદઞ્ચ.

૩૬૬. સયં ઉપસ્સયં દત્વાતિ ‘‘ભિક્ખુનિયા ઉપસ્સયં દત્વા કુપિતા અનત્તમના નિક્કડ્ઢેય્યા’’તિ (પાચિ. ૯૫૧) વુત્તસિક્ખાપદઞ્ચ. અક્કોસેય્ય ચાતિ ‘‘ભિક્ખું અક્કોસેય્ય વા પરિભાસેય્ય વા’’તિ (પાચિ. ૧૦૨૯) વુત્તસિક્ખાપદઞ્ચ. ચણ્ડિકાતિ ‘‘ચણ્ડીકતા ગણં પરિભાસેય્યા’’તિ (પાચિ. ૧૦૩૪) વુત્તસિક્ખાપદઞ્ચ. કુલમચ્છરિની અસ્સાતિ ‘‘કુલમચ્છરિની અસ્સા’’તિ (પાચિ. ૧૦૪૩) વુત્તસિક્ખાપદઞ્ચ. ગબ્ભિનિં વુટ્ઠાપેય્ય ચાતિ ‘‘ગબ્ભિનિં વુટ્ઠાપેય્યા’’તિ (પાચિ. ૧૦૬૮) વુત્તસિક્ખાપદઞ્ચ.

૩૬૭. પાયન્તિન્તિ ‘‘પાયન્તિં વુટ્ઠાપેય્યા’’તિ (પાચિ. ૧૦૭૩) વુત્તસિક્ખાપદઞ્ચ. દ્વે ચ વસ્સાનીતિ ‘‘દ્વે વસ્સાનિ છસુ ધમ્મેસુ અસિક્ખિતસિક્ખં સિક્ખમાનં વુટ્ઠાપેય્યા’’તિ (પાચિ. ૧૦૮૦) વુત્તસિક્ખાપદઞ્ચ. સઙ્ઘેનાસમ્મતન્તિ ‘‘સિક્ખિતસિક્ખં સિક્ખમાનં સઙ્ઘેન અસમ્મતં વુટ્ઠાપેય્યા’’તિ (પાચિ. ૧૦૮૬) વુત્તસિક્ખાપદઞ્ચ. તિસ્સો ગિહિગતા વુત્તાતિ ‘‘ઊનદ્વાદસવસ્સં ગિહિગતં (પાચિ. ૧૦૯૧), પરિપુણ્ણદ્વાદસવસ્સં ગિહિગતં દ્વે વસ્સાનિ છસુ ધમ્મેસુ અસિક્ખિતસિક્ખં (પાચિ. ૧૦૯૭), દ્વેવસ્સાનિ સિક્ખિતસિક્ખં સઙ્ઘેન અસમ્મત’’ન્તિ (પાચિ. ૧૧૦૩) વુત્તસિક્ખાપદાનિ ચ. તિસ્સોયેવ કુમારિકાતિ ‘‘ઊનવીસતિવસ્સં કુમારિભૂત’’ન્તિઆદિના (પાચિ. ૧૧૨૦) નયેન વુત્તા તિસ્સો ચ.

૩૬૮. ઊનદ્વાદસવસ્સા દ્વેતિ ‘‘ઊનદ્વાદસવસ્સા વુટ્ઠાપેય્ય (પાચિ. ૧૧૩૭), પરિપુણ્ણદ્વાદસવસ્સા સઙ્ઘેન અસમ્મતા વુટ્ઠાપેય્યા’’તિ (પાચિ. ૧૧૪૨) વુત્તાનિ દ્વે સિક્ખાપદાનિ ચ. અલં તાવ તેતિ ‘‘અલં તાવ તે, અય્યે, વુટ્ઠાપિતેના’’તિ (પાચિ. ૧૧૪૭) વુત્તસિક્ખાપદઞ્ચ. સોકાવસ્સાતિ ‘‘ચણ્ડિં સોકાવાસં સિક્ખમાનં વુટ્ઠાપેય્યા’’તિ (પાચિ. ૧૧૫૯) વુત્તસિક્ખાપદઞ્ચ. પારિવાસિકચ્છન્દદાનતોતિ ‘‘પારિવાસિકછન્દદાનેન સિક્ખમાનં વુટ્ઠાપેય્યા’’તિ (પાચિ. ૧૧૬૭) વુત્તસિક્ખાપદઞ્ચ.

૩૬૯. અનુવસ્સં દુવે ચાતિ ‘‘અનુવસ્સં વુટ્ઠાપેય્ય (પાચિ. ૧૧૭૧), એકં વસ્સં દ્વે વુટ્ઠાપેય્યા’’તિ (પાચિ. ૧૧૭૫) વુત્તસિક્ખાપદાનિ ચાતિ એકૂનસત્તતિ સિક્ખાપદાનિ. અદિન્નાદાનતુલ્યત્તાતિ અદિન્નાદાનેન સમાનસમુટ્ઠાનત્તા. તિસમુટ્ઠાનિકા કતાતિ સચિત્તકેહિ તીહિ સમુટ્ઠાનેહિ સમુટ્ઠહન્તીતિ વુત્તા.

દુતિયપારાજિકસમુટ્ઠાનવણ્ણના.

૩૭૦. સઞ્ચરિકુટિમહલ્લકન્તિ સઞ્ચરિત્તં, સઞ્ઞાચિકાય કુટિકરણં, મહલ્લકવિહારકરણઞ્ચ. ધોવાપનઞ્ચ પટિગ્ગહોતિ અઞ્ઞાતિકાય ભિક્ખુનિયા પુરાણચીવરધોવાપનઞ્ચ ચીવરપટિગ્ગહણઞ્ચ. ચીવરસ્સ ચ વિઞ્ઞત્તિન્તિ અઞ્ઞાતકં ગહપતિં વા ગહપતાનિં વા ચીવરવિઞ્ઞાપનસિક્ખાપદઞ્ચ. ગહણઞ્ચ તદુત્તરિન્તિ તદુત્તરિસાદિયનસિક્ખાપદઞ્ચ.

૩૭૧. ઉપક્ખટદ્વયઞ્ચેવાતિ ‘‘ચીવરચેતાપન્નં ઉપક્ખટં હોતી’’તિ (પારા. ૫૨૮) આગતસિક્ખાપદદ્વયઞ્ચ. તથા દૂતેન ચીવરન્તિ દૂતેનચીવરચેતાપન્નપહિતસિક્ખાપદઞ્ચ. કોસિયન્તિ કોસિયમિસ્સકસિક્ખાપદઞ્ચ. સુદ્ધકાળાનન્તિ ‘‘સુદ્ધકાળકાન’’ન્તિઆદિસિક્ખાપદઞ્ચ (પારા. ૫૪૮). દ્વે ભાગાદાનમેવ ચાતિ ‘‘દ્વે ભાગા આદાતબ્બા’’તિ (પારા. ૫૫૩) વુત્તસિક્ખાપદઞ્ચ.

૩૭૨. છબ્બસ્સાનીતિ છબ્બસ્સાનિ ધારણસિક્ખાપદઞ્ચ. પુરાણસ્સાતિ ‘‘પુરાણસન્થતસ્સા’’તિ (પારા. ૫૬૭) વુત્તસિક્ખાપદઞ્ચ. લોમધોવાપનમ્પિ ચાતિ એળકલોમધોવાપનસિક્ખાપદઞ્ચ. રૂપિયસ્સ પટિગ્ગાહોતિ રૂપિયપટિગ્ગહણસિક્ખાપદઞ્ચ. ઉભો નાનપ્પકારકાતિ રૂપિયસંવોહારકયવિક્કયસિક્ખાપદાનિ ચ.

૩૭૩. ઊનબન્ધનપત્તો ચાતિ ઊનપઞ્ચબન્ધનપત્તસિક્ખાપદઞ્ચ. વસ્સસાટિકસુત્તકન્તિ વસ્સિકસાટિકસિક્ખાપદઞ્ચ સુત્તં વિઞ્ઞાપેત્વા ચીવરકારાપનસિક્ખાપદઞ્ચ. વિકપ્પાપજ્જનન્તિ તન્તવાયે ઉપસઙ્કમિત્વા ચીવરે વિકપ્પાપજ્જનઞ્ચ. યાવ દ્વારદાનઞ્ચ સિબ્બનન્તિ ‘‘યાવ દ્વારકોસા અગ્ગળટ્ઠપનાયા’’તિ (પાચિ. ૧૩૫) વુત્તસિક્ખાપદઞ્ચ ‘‘અઞ્ઞાતિકાય ભિક્ખુનિયા ચીવરં દદેય્ય (પાચિ. ૧૭૧), ચીવરં સિબ્બેય્યા’’તિ (પાચિ. ૧૭૬) વુત્તસિક્ખાપદદ્વયઞ્ચ.

૩૭૪. પૂવેહીતિ પૂવેહિ વા મન્થેહિ વા અભિહટ્ઠું પવારણસિક્ખાપદઞ્ચ. પચ્ચયોતિ ચતુમાસપચ્ચયપવારણસિક્ખાપદઞ્ચ. જોતીતિ જોતિયા સમાદહનસિક્ખાપદઞ્ચ. રતનન્તિ રતનસિક્ખાપદઞ્ચ. સૂચિ…પે… સુગતસ્સ ચાતિ સૂચિઘરસિક્ખાપદાદીનિ સત્ત સિક્ખાપદાનિ ચ.

૩૭૫. અઞ્ઞવિઞ્ઞત્તિસિક્ખા ચાતિ ‘‘અઞ્ઞં વિઞ્ઞાપેય્યા’’તિ (પાચિ. ૭૪૯) વુત્તસિક્ખાપદઞ્ચ. અઞ્ઞં ચેતાપનમ્પિ ચાતિ ‘‘અઞ્ઞં ચેતાપેત્વા અઞ્ઞં ચેતાપેય્યા’’તિ (પાચિ. ૭૪૯) વુત્તસિક્ખાપદઞ્ચ. સઙ્ઘિકેન દુવે વુત્તાતિ ‘‘સઙ્ઘિકેન અઞ્ઞં ચેતાપેય્ય (પાચિ. ૭૫૯), સઙ્ઘિકેન સઞ્ઞાચિકેન અઞ્ઞં ચેતાપેય્યા’’તિ (પાચિ. ૭૬૪) વુત્તાનિ દ્વે સિક્ખાપદાનિ ચ. દ્વે મહાજનિકેનાતિ ‘‘મહાજનિકેન અઞ્ઞં ચેતાપેય્ય (પાચિ. ૭૬૯), મહાજનિકેન સઞ્ઞાચિકેન અઞ્ઞં ચેતાપેય્યા’’તિ (પાચિ. ૭૭૪) વુત્તાનિ દ્વે સિક્ખાપદાનિ ચ.

૩૭૬. તથા પુગ્ગલિકેનેકન્તિ ‘‘પુગ્ગલિકેન સઞ્ઞાચિકેન અઞ્ઞં ચેતાપેય્યા’’તિ (પાચિ. ૭૭૯) વુત્તમેકસિક્ખાપદઞ્ચ. ગરુપાવુરણન્તિ ગરુપાવુરણચેતાપનસિક્ખાપદઞ્ચ. લહુન્તિ લહુપાવુરણચેતાપનસિક્ખાપદં. ‘‘વિઘાસા ઉદસાટિ ચા’’તિ પદચ્છેદો. દ્વે વિઘાસાતિ ‘‘ઉચ્ચારં વા પસ્સાવં વા સઙ્કારં વા વિઘાસં વા તિરોકુટ્ટે વા તિરોપાકારે વા છડ્ડેય્ય વા છડ્ડાપેય્ય વા (પાચિ. ૮૨૫), હરિતે છડ્ડેય્ય વા છડ્ડાપેય્ય વા’’તિ (પાચિ. ૮૨૯) એવં વુત્તાનિ દ્વે વિઘાસસિક્ખાપદાનિ ચ. ઉદસાટિ ચાતિ ઉદકસાટિકસિક્ખાપદઞ્ચ. તથા સમણચીવરન્તિ તથા ‘‘સમણચીવરં દદેય્યા’’તિ (પાચિ. ૯૧૭) વુત્તસિક્ખાપદઞ્ચાતિ.

૩૭૭. ઇતિ એતે એકૂનપણ્ણાસ ધમ્મા દુક્ખન્તદસ્સિના ભગવતા છસમુટ્ઠાનિકા તેયેવ સઞ્ચરિત્તસમા સઞ્ચરિત્તસિક્ખાપદેન સમા કતા અનુમતા પઞ્ઞત્તાતિ યોજના.

સઞ્ચરિત્તસમુટ્ઠાનવણ્ણના.

૩૭૮. સઙ્ઘભેદોતિ સઙ્ઘભેદસિક્ખાપદઞ્ચ. ભેદાનુવત્તદુબ્બચદૂસકાતિ ભેદાનુવત્તકદુબ્બચકુલદૂસકસિક્ખાપદાનિ ચ. દુટ્ઠુલ્લચ્છાદનન્તિ દુટ્ઠુલ્લપટિચ્છાદનસિક્ખાપદઞ્ચ. દિટ્ઠીતિ દિટ્ઠિઅપ્પટિનિસ્સજ્જનસિક્ખાપદઞ્ચ. છન્દઉજ્જગ્ઘિકા દુવેતિ છન્દંઅદત્વાગમનસિક્ખાપદઞ્ચ ઉજ્જગ્ઘિકાય અન્તરઘરે ગમનનિસીદનસિક્ખાપદદ્વયઞ્ચ.

૩૭૯. અપ્પસદ્દા દુવે વુત્તાતિ ‘‘અપ્પસદ્દો અન્તરઘરે ગમિસ્સામિ, નિસીદિસ્સામી’’તિ (પાચિ. ૫૮૮, ૫૮૯) વુત્તાનિ દ્વે સિક્ખાપદાનિ ચ. ન બ્યાહરેતિ ‘‘ન સકબળેન મુખેન બ્યાહરિસ્સામી’’તિ (પાચિ. ૬૧૯) વુત્તસિક્ખાપદઞ્ચ. છમા, નીચાસને, ઠાનન્તિ ‘‘છમાયં નિસીદિત્વા (પાચિ. ૬૪૫), નીચે આસને નિસીદિત્વા (પાચિ. ૬૪૭), ઠિતો નિસિન્નસ્સા’’તિ (પાચિ. ૬૪૮) વુત્તસિક્ખાપદઞ્ચ. પચ્છતો ઉપ્પથેન ચાતિ ‘‘પચ્છતો ગચ્છન્તો પુરતો ગચ્છન્તસ્સ (પાચિ. ૬૪૯), ઉપ્પથેન ગચ્છન્તો પથેન ગચ્છન્તસ્સા’’તિ (પાચિ. ૬૫૦) વુત્તસિક્ખાપદદ્વયઞ્ચ.

૩૮૦. વજ્જચ્છાદાતિ વજ્જતો પટિચ્છાદનસિક્ખાપદઞ્ચ. અનુવત્તા ચાતિ ઉક્ખિત્તાનુવત્તનસિક્ખાપદઞ્ચ. ગહણન્તિ ‘‘હત્થગ્ગહણં વા સાદિયેય્યા’’તિ (પાચિ. ૬૭૫) વુત્તસિક્ખાપદઞ્ચ. ઓસારેય્ય ચાતિ ‘‘અનપલોકેત્વા કારકસઙ્ઘં અનઞ્ઞાય ગણસ્સ છન્દં ઓસારેય્યા’’તિ (પાચિ. ૬૯૫) વુત્તસિક્ખાપદઞ્ચ. પચ્ચક્ખામીતિ સિક્ખા ચાતિ ‘‘બુદ્ધં પચ્ચાચિક્ખામી’’તિ (પાચિ. ૭૧૦) વુત્તસિક્ખાપદઞ્ચ. તથા કિસ્મિઞ્ચિદેવ ચાતિ ‘‘કિસ્મિઞ્ચિદેવ અધિકરણે પચ્ચાકતા’’તિ (પાચિ. ૭૧૬) વુત્તસિક્ખાપદઞ્ચ.

૩૮૧. સંસટ્ઠા દ્વે ચાતિ ‘‘ભિક્ખુનિયો પનેવ સંસટ્ઠા વિહરન્તી’’તિ (પાચિ. ૭૨૨) ચ ‘‘યા પન ભિક્ખુની એવં વદેય્ય સંસટ્ઠાવ, અય્યે, તુમ્હે વિહરથા’’તિઆદિવચનં (પાચિ. ૭૨૮) પટિચ્ચ વુત્તસિક્ખાપદદ્વયઞ્ચ. વધિત્વા ચાતિ ‘‘અત્તાનં વધિત્વા વધિત્વા રોદેય્યા’’તિ (પાચિ. ૮૮૦) વુત્તસિક્ખાપદઞ્ચ. વિસિબ્બેત્વા ચાતિ ‘‘ભિક્ખુનિયા ચીવરં વિસિબ્બેત્વા વા વિસિબ્બાપેત્વા વા’’તિ (પાચિ. ૮૯૩) વુત્તસિક્ખાપદઞ્ચ. દુક્ખિતન્તિ ‘‘દુક્ખિતં સહજીવિનિ’’ન્તિ (પાચિ. ૯૪૭) વુત્તસિક્ખાપદઞ્ચ. પુનદેવ ચ સંસટ્ઠાતિ ‘‘સંસટ્ઠા વિહરેય્ય ગહપતિના વા ગહપતિપુત્તેન વા’’તિ (પાચિ. ૯૫૬) એવં પુન વુત્તસંસટ્ઠસિક્ખાપદઞ્ચ. નેવ વૂપસમેય્ય ચાતિ ‘‘‘એહાય્યે, ઇમં અધિકરણં વૂપસમેહી’તિ (પાચિ. ૯૯૫) વુચ્ચમાના ‘સાધૂ’તિ પટિસ્સુણિત્વા સા પચ્છા અનન્તરાયિકિની નેવ વૂપસમેય્યા’’તિ વુત્તસિક્ખાપદઞ્ચ.

૩૮૨. જાનં સભિક્ખુકારામન્તિ ‘‘જાનં સભિક્ખુકં આરામં અનાપુચ્છા પવિસેય્યા’’તિ (પાચિ. ૧૦૨૪) વુત્તસિક્ખાપદઞ્ચ. તથેવ ન પવારયેતિ ‘‘ઉભતોસઙ્ઘે તીહિ ઠાનેહિ ન પવારેય્યા’’તિ (પાચિ. ૧૦૫૧) વુત્તસિક્ખાપદઞ્ચ. તથા અન્વદ્ધમાસઞ્ચાતિ ‘‘અન્વદ્ધમાસં ભિક્ખુનિયા ભિક્ખુસઙ્ઘતો દ્વે ધમ્મા પચ્ચાસીસિતબ્બા’’તિ (પાચિ. ૧૦૫૯) વુત્તસિક્ખાપદઞ્ચ. સહજીવિનિયો દુવેતિ ‘‘સહજીવિનિં વુટ્ઠાપેત્વા દ્વે વસ્સાનિ નેવ અનુગ્ગણ્હેય્ય (પાચિ. ૧૧૦૮), સહજીવિનિં વુટ્ઠાપેત્વા નેવ વૂપકાસેય્યા’’તિ (પાચિ. ૧૧૧૬) વુત્તસિક્ખાપદદ્વયઞ્ચ.

૩૮૩-૪. સચે મે ચીવરં અય્યેતિ ‘‘સચે મે ત્વં, અય્યે, ચીવરં દસ્સસિ, એવાહં તં વુટ્ઠાપેસ્સામી’’તિ (પાચિ. ૧૧૫૧) વુત્તસિક્ખાપદઞ્ચ. અનુબન્ધિસ્સસીતિ ‘‘સચે મં ત્વં, અય્યે, દ્વે વસ્સાનિ અનુબન્ધિસ્સસિ, એવાહં તં વુટ્ઠાપેસ્સામી’’તિ (પાચિ. ૧૧૫૫) વુત્તસિક્ખાપદઞ્ચ. અસમેન સમ્બુદ્ધેન પકાસિતા ઇમે સત્તતિંસ ધમ્મા સબ્બે કાયવાચાદિતો કાયવાચાચિત્તતો એકસમુટ્ઠાના કતા સમનુભાસના સિયું સમુટ્ઠાનતો સમનુભાસનસિક્ખાપદેન સદિસા સિયુન્તિ યોજના.

સમનુભાસનસમુટ્ઠાનવણ્ણના.

૩૮૫. કથિનાનિ ચ તીણીતિ ‘‘નિટ્ઠિતચીવરસ્મિં ભિક્ખુના ઉબ્ભતસ્મિં કથિને’’તિ (પારા. ૪૬૨) વુત્તાનિ આદિતો તીણિ સિક્ખાપદાનિ. પત્તોતિ ‘‘દસાહપરમં અતિરેકપત્તો’’તિ (પારા. ૬૦૧) વુત્તસિક્ખાપદઞ્ચ. ભેસજ્જમેવ ચાતિ ‘‘પટિસાયનીયાનિ ભેસજ્જાની’’તિ (પારા. ૬૨૨) વુત્તસિક્ખાપદઞ્ચ. અચ્ચેકમ્પિ ચાતિ અચ્ચેકસિક્ખાપદઞ્ચ. સાસઙ્કન્તિ તદનન્તરમેવ સાસઙ્કસિક્ખાપદઞ્ચ. પક્કમન્તદ્વયમ્પિ ચાતિ ‘‘તં પક્કમન્તો નેવ ઉદ્ધરેય્યા’’તિ (પાચિ. ૧૦૯, ૧૧૫) ભૂતગામવગ્ગે વુત્તસિક્ખાપદદ્વયઞ્ચ.

૩૮૬. તથા ઉપસ્સયં ગન્ત્વાતિ ‘‘ભિક્ખુનુપસ્સયં ઉપસઙ્કમિત્વા ભિક્ખુનિયો ઓવદેય્યા’’તિ (પાચિ. ૧૫૮) વુત્તસિક્ખાપદઞ્ચ. પરમ્પરં ભોજનન્તિ ‘‘પરમ્પરભોજને પાચિત્તિય’’ન્તિ (પાચિ. ૨૨૧) વુત્તસિક્ખાપદઞ્ચ. અનતિરિત્તન્તિ ‘‘અનતિરિત્તં ખાદનીયં વા ભોજનીયં વા’’તિ (પાચિ. ૨૩૮) વુત્તસિક્ખાપદઞ્ચ. સભત્તોતિ ‘‘નિમન્તિતો સભત્તો સમાનો’’તિ (પાચિ. ૨૯૯) વુત્તસિક્ખાપદઞ્ચ. વિકપ્પેત્વા તથેવ ચાતિ ‘‘ચીવરં વિકપ્પેત્વા’’તિ (પાચિ. ૩૭૩) વુત્તસિક્ખાપદઞ્ચ.

૩૮૭. રઞ્ઞોતિ ‘‘રઞ્ઞો ખત્તિયસ્સા’’તિ (પાચિ. ૪૯૮) વુત્તસિક્ખાપદઞ્ચ. વિકાલેતિ ‘‘વિકાલે ગામં પવિસેય્યા’’તિ (પાચિ. ૫૦૯-૫૧૨) વુત્તસિક્ખાપદઞ્ચ. વોસાસાતિ ‘‘વોસાસમાનરૂપા ઠિતા’’તિ (પાચિ. ૫૫૮) વુત્તસિક્ખાપદઞ્ચ. ‘‘આરઞ્ઞકે ઉસ્સયવાદિકા’’તિ પદચ્છેદો. આરઞ્ઞકેતિ ‘‘તથારૂપેસુ આરઞ્ઞકેસુ સેનાસનેસુ પુબ્બે અપ્પટિસંવિદિત’’ન્તિ (પાચિ. ૫૭૦) વુત્તસિક્ખાપદઞ્ચ. ઉસ્સયવાદિકાતિ ‘‘ઉસ્સયવાદિકા વિહરેય્યા’’તિ (પાચિ. ૬૭૯) વુત્તસિક્ખાપદઞ્ચ. પત્તસન્નિચયઞ્ચેવાતિ ‘‘પત્તસન્નિચયં કરેય્યા’’તિ (પાચિ. ૭૩૪) વુત્તસિક્ખાપદઞ્ચ. પુરે, પચ્છા, વિકાલકેતિ ‘‘યા પન ભિક્ખુની પુરેભત્તં કુલાનિ ઉપસઙ્કમિત્વા’’તિ (પાચિ. ૮૫૫) ચ ‘‘પચ્છાભત્તં કુલાનિ ઉપસઙ્કમિત્વા’’તિ (પાચિ. ૮૬૦) ચ ‘‘વિકાલે કુલાનિ ઉપસઙ્કમિત્વા’’તિ (પાચિ. ૮૬૫) ચ વુત્તસિક્ખાપદત્તયઞ્ચ.

૩૮૮-૯. પઞ્ચાહિકન્તિ ‘‘પઞ્ચાહિકં સઙ્ઘાટિચારં અતિક્કમેય્યા’’તિ (પાચિ. ૮૯૮) વુત્તસિક્ખાપદઞ્ચ. સઙ્કમનિન્તિ ‘‘ચીવરસઙ્કમનીયં ધારેય્યા’’તિ (પાચિ. ૯૦૩) વુત્તસિક્ખાપદઞ્ચ. તથા આવસથદ્વયન્તિ ‘‘આવસથચીવરં અનિસ્સજ્જિત્વા પરિભુઞ્જેય્ય (પાચિ. ૧૦૦૪), આવસથં અનિસ્સજ્જિત્વા ચારિકં પક્કમેય્યા’’તિ (પાચિ. ૧૦૦૯) એવં આવસથેન સદ્ધિં વુત્તસિક્ખાપદદ્વયઞ્ચ. પસાખેતિ ‘‘પસાખે જાતં ગણ્ડં વા’’તિ (પાચિ. ૧૦૬૩) વુત્તસિક્ખાપદઞ્ચ. આસને ચાતિ ‘‘ભિક્ખુસ્સ પુરતો અનાપુચ્છા આસને નિસીદેય્યા’’તિ (પાચિ. ૧૨૧૫) વુત્તસિક્ખાપદઞ્ચાતિ ઇમે પન એકૂનતિંસ ધમ્મા કાયવાચતો, કાયવાચાચિત્તતો ચ સમુટ્ઠાનતો સબ્બે દ્વિસમુટ્ઠાનિકા, તતોયેવ કથિનસમ્ભવા કથિનસમુટ્ઠાના હોન્તીતિ યોજના.

કથિનસમુટ્ઠાનવણ્ણના.

૩૯૦. દ્વે સેય્યાતિ દ્વે સહસેય્યસિક્ખાપદાનિ ચ. આહચ્ચપાદો ચાતિ આહચ્ચપાદકસિક્ખાપદઞ્ચ. પિણ્ડઞ્ચાતિ આવસથપિણ્ડભોજનસિક્ખાપદઞ્ચ. ગણભોજનન્તિ ગણભોજનસિક્ખાપદઞ્ચ. વિકાલેતિ વિકાલભોજનસિક્ખાપદઞ્ચ. સન્નિધિઞ્ચેવાતિ સન્નિધિકારકસિક્ખાપદઞ્ચ. દન્તપોનન્તિ દન્તપોનસિક્ખાપદઞ્ચ. અચેલકન્તિ અચેલકસિક્ખાપદઞ્ચ.

૩૯૧. ઉય્યુત્તઞ્ચાતિ ‘‘ઉય્યુત્તં સેનં દસ્સનાય ગચ્છેય્યા’’તિ (પાચિ. ૩૧૧) વુત્તસિક્ખાપદઞ્ચ. ‘‘વસે ઉય્યોધિ’’ન્તિ પદચ્છેદો. વસેતિ ‘‘સેનાય વસેય્યા’’તિ (પાચિ. ૩૧૮) વુત્તસિક્ખાપદઞ્ચ. ઉય્યોધિન્તિ ‘‘ઉય્યોધિકં વા…પે… અનીકદસ્સનં વા ગચ્છેય્યા’’તિ (પાચિ. ૩૨૩) વુત્તસિક્ખાપદઞ્ચ. સુરાતિ સુરાપાનસિક્ખાપદઞ્ચ. ઓરેન ન્હાયનન્તિ ઓરેનદ્ધમાસનહાયનસિક્ખાપદઞ્ચ. દુબ્બણ્ણકરણઞ્ચેવાતિ ‘‘તિણ્ણં દુબ્બણ્ણકરણાન’’ન્તિ (પાચિ. ૩૬૮) વુત્તસિક્ખાપદઞ્ચ. પાટિદેસનીયદ્વયન્તિ વુત્તાવસેસં પાટિદેસનીયદ્વયઞ્ચ.

૩૯૨. લસુણન્તિ લસુણસિક્ખાપદઞ્ચ. ઉપતિટ્ઠેય્યાતિ ‘‘ભિક્ખુસ્સ ભુઞ્જન્તસ્સ પાનીયેન વા વિધૂપનેન વા ઉપતિટ્ઠેય્યા’’તિ (પાચિ. ૮૧૬) વુત્તસિક્ખાપદઞ્ચ. નચ્ચદસ્સનમેવ ચાતિ ‘‘નચ્ચં વા ગીતં વા વાદિતં વા દસ્સનાય ગચ્છેય્યા’’તિ (પાચિ. ૮૩૪) વુત્તસિક્ખાપદઞ્ચ. નગ્ગન્તિ ‘‘નગ્ગા નહાયેય્યા’’તિ (પાચિ. ૮૮૪) વુત્તસિક્ખાપદઞ્ચ. અત્થરણન્તિ ‘‘એકત્થરણપાવુરણા તુવટ્ટેય્યુ’’ન્તિ (પાચિ. ૯૩૭) વુત્તસિક્ખાપદઞ્ચ. મઞ્ચેતિ ‘‘એકમઞ્ચે તુવટ્ટેય્યુ’’ન્તિ (પાચિ. ૯૩૩) વુત્તસિક્ખાપદઞ્ચ. અન્તોરટ્ઠેતિ ‘‘અન્તોરટ્ઠે સાસઙ્કસમ્મતે’’તિ (પાચિ. ૯૬૨) વુત્તસિક્ખાપદઞ્ચ. તથા બહીતિ ‘‘તિરોરટ્ઠે સાસઙ્કસમ્મતે’’તિ (પાચિ. ૯૬૬) વુત્તસિક્ખાપદઞ્ચ.

૩૯૩. અન્તોવસ્સન્તિ ‘‘અન્તોવસ્સં ચારિકં ચરેય્યા’’તિ (પાચિ. ૯૭૦) વુત્તસિક્ખાપદઞ્ચ. અગારઞ્ચાતિ ‘‘રાજાગારં વા ચિત્તાગારં વા…પે… પોક્ખરણિં વા દસ્સનાય ગચ્છેય્યા’’તિ (પાચિ. ૯૭૮) વુત્તસિક્ખાપદઞ્ચ. આસન્દિન્તિ ‘‘આસન્દિં વા પલ્લઙ્કં વા પરિભુઞ્જેય્યા’’તિ (પાચિ. ૯૮૩) વુત્તસિક્ખાપદઞ્ચ. સુત્તકન્તનન્તિ ‘‘સુત્તં કન્તેય્યા’’તિ (પાચિ. ૯૮૭) વુત્તસિક્ખાપદઞ્ચ. વેય્યાવચ્ચન્તિ ‘‘ગિહિવેય્યાવચ્ચં કરેય્યા’’તિ (પાચિ. ૯૯૧) વુત્તસિક્ખાપદઞ્ચ. સહત્થા ચાતિ ‘‘અગારિકસ્સ વા પરિબ્બાજકસ્સ વા પરિબ્બાજિકાય વા સહત્થા ખાદનીયં વા ભોજનીયં વા દદેય્યા’’તિ (પાચિ. ૧૦૦૦) વુત્તસિક્ખાપદઞ્ચ. આવાસે ચ અભિક્ખુકેતિ ‘‘અભિક્ખુકે આવાસે વસ્સં વસેય્યા’’તિ (પાચિ. ૧૦૪૭) વુત્તસિક્ખાપદઞ્ચ.

૩૯૪. છત્તન્તિ ‘‘છત્તુપાહનં ધારેય્યા’’તિ (પાચિ. ૧૧૭૮) વુત્તસિક્ખાપદઞ્ચ. યાનઞ્ચાતિ ‘‘યાનેન યાયેય્યા’’તિ (પાચિ. ૧૧૮૬) વુત્તસિક્ખાપદઞ્ચ. સઙ્ઘાણિન્તિ ‘‘સઙ્ઘાણિં ધારેય્યા’’તિ (પાચિ. ૧૧૯૧) વુત્તસિક્ખાપદઞ્ચ. અલઙ્કારન્તિ ‘‘ઇત્થાલઙ્કારં ધારેય્યા’’તિ (પાચિ. ૧૧૯૫) વુત્તસિક્ખાપદઞ્ચ. ગન્ધવાસિતન્તિ ‘‘ગન્ધવણ્ણકેન નહાયેય્ય (પાચિ. ૧૧૯૯), વાસિતકેન પિઞ્ઞાકેન નહાયેય્યા’’તિ (પાચિ. ૧૨૦૩) વુત્તસિક્ખાપદદ્વયઞ્ચ. ‘‘ભિક્ખુની…પે… ગિહિનિયા’’તિ એતેન ‘‘ભિક્ખુનિયા ઉમ્મદ્દાપેય્યા’’તિઆદીનિ (પાચિ. ૧૨૦૭) ચત્તારિ સિક્ખાપદાનિ વુત્તાનિ.

૩૯૫. તથાસંકચ્ચિકાતિ ‘‘અસંકચ્ચિકા ગામં પવિસેય્યા’’તિ (પાચિ. ૧૨૨૫) એવં વુત્તસિક્ખાપદઞ્ચ. ઇમે પન તેચત્તાલીસ ધમ્મા સબ્બે કાયચિત્તવસેન દ્વિસમુટ્ઠાનિકા. એળકલોમેન સમુટ્ઠાનતો સમા હોન્તીતિ યોજના.

એળકલોમસમુટ્ઠાનવણ્ણના.

૩૯૬-૭. અઞ્ઞત્રાતિ ‘‘માતુગામસ્સ ઉત્તરિછપ્પઞ્ચવાચાહિ ધમ્મં દેસેય્ય અઞ્ઞત્ર વિઞ્ઞુના પુરિસવિગ્ગહેના’’તિ (પાચિ. ૬૩) વુત્તસિક્ખાપદઞ્ચ. અસમ્મતો ચેવાતિ ‘‘અસમ્મતો ભિક્ખુનિયો ઓવદેય્યા’’તિ (પાચિ. ૧૪૬) વુત્તસિક્ખાપદઞ્ચ. તથા અત્થઙ્ગતેન ચાતિ ‘‘અત્થઙ્ગતે સૂરિયે ભિક્ખુનિયો ઓવદેય્યા’’તિ (પાચિ. ૧૫૪) વુત્તસિક્ખાપદઞ્ચ. તિરચ્છાનવિજ્જા દ્વે વુત્તાતિ ‘‘તિરચ્છાનવિજ્જં પરિયાપુણેય્ય, વાચેય્યા’’તિ (પાચિ. ૧૦૧૪, ૧૦૧૮) એવં વુત્તાનિ દ્વે સિક્ખાપદાનિ ચ. અનોકાસકતમ્પિ ચાતિ ‘‘અનોકાસકતં ભિક્ખું પઞ્હં પુચ્છેય્યા’’તિ (પાચિ. ૧૨૨૦) વુત્તસિક્ખાપદઞ્ચાતિ ઇમે પન સબ્બે છ ધમ્મા વાચતો, વાચાચિત્તતો ચાતિ ઇમેહિ દ્વીહિ સમુટ્ઠાનેહિ સમુટ્ઠાનિકા હોન્તિ. પદસોધમ્મતુલ્યતા અયમેતેસં પદસોધમ્મેન સદિસભાવોતિ યોજના.

પદસોધમ્મસમુટ્ઠાનવણ્ણના.

૩૯૮-૯. એકન્તિ ‘‘ભિક્ખુનિયા સદ્ધિં સંવિધાય એકદ્ધાનમગ્ગં પટિપજ્જેય્યા’’તિ (પાચિ. ૧૮૦) વુત્તસિક્ખાપદઞ્ચ. નાવન્તિ ‘‘એકનાવં અભિરુહેય્યા’’તિ (પાચિ. ૧૮૮) વુત્તસિક્ખાપદઞ્ચ. પણીતઞ્ચાતિ ‘‘પણીતભોજનાનિ અગિલાનો અત્તનો અત્થાય વિઞ્ઞાપેત્વાભુઞ્જેય્યા’’તિ (પાચિ. ૨૫૯) વુત્તસિક્ખાપદઞ્ચ. સંવિધાનઞ્ચાતિ માતુગામેન સદ્ધિં સંવિધાય ગમનસિક્ખાપદઞ્ચ. સંહરેતિ ‘‘સમ્બાધે લોમં સંહરાપેય્યા’’તિ (પાચિ. ૭૯૯) વુત્તસિક્ખાપદઞ્ચ. ધઞ્ઞન્તિ ‘‘આમકધઞ્ઞં વિઞ્ઞત્વા વા’’તિ (પાચિ. ૮૨૧) વુત્તસિક્ખાપદઞ્ચ. નિમન્તિતા ચેવાતિ ‘‘નિમન્તિતા વા પવારિતા વા ખાદનીયં વા ભોજનીયં વા ખાદેય્ય વા ભુઞ્જેય્ય વા’’તિ (પાચિ. ૧૦૩૮) વુત્તસિક્ખાપદઞ્ચ. પાટિદેસનિયટ્ઠકન્તિ ભિક્ખુનીનં વુત્તા અટ્ઠ પાટિદેસનીયા ચેતિ બુદ્ધસેટ્ઠેન પઞ્ઞત્તા એતા ચુદ્દસ સિક્ખા ચતુસમુટ્ઠાના કાયતો, કાયવાચતો, કાયચિત્તતો, વાચાચિત્તતો ચાતિ ચતૂહિ સમુટ્ઠાનેહિ સમુટ્ઠહન્તિ. સમુટ્ઠાનતો અદ્ધાનેન અદ્ધાનસિક્ખાપદેન સમા હોન્તીતિ મતાતિ યોજના.

અદ્ધાનસમુટ્ઠાનવણ્ણના.

૪૦૦-૧. સુતિન્તિ ઉપસ્સુતિતિટ્ઠનસિક્ખાપદઞ્ચ. સૂપાદિવિઞ્ઞત્તિન્તિ સૂપોદનવિઞ્ઞત્તિસિક્ખાપદઞ્ચ. અન્ધકારેતિ ‘‘રત્તન્ધકારે અપ્પદીપે’’તિ (પાચિ. ૮૩૯) વુત્તસિક્ખાપદઞ્ચ. તથેવ ચ પટિચ્છન્નેતિ ‘‘પટિચ્છન્ને ઓકાસે’’તિ (પાચિ. ૮૪૩) વુત્તસિક્ખાપદઞ્ચ. ઓકાસેતિ ‘‘અજ્ઝોકાસે પુરિસેન સદ્ધિ’’ન્તિ (પાચિ. ૮૪૭) એવં વુત્તસિક્ખાપદઞ્ચ. બ્યૂહે ચાતિ તદનન્તરમેવ ‘‘રથિકાય વા બ્યૂહે વા સિઙ્ઘાટકે વા પુરિસેન સદ્ધિ’’ન્તિ (પાચિ. ૮૫૧) આગતસિક્ખાપદઞ્ચાતિ ઇમે સબ્બેપિ આદિચ્ચબન્ધુના દેસિતા છ ધમ્મા ચતુત્થચ્છટ્ઠતો કાયચિત્તતો, કાયવાચાચિત્તતો ચ સમુટ્ઠહન્તા થેય્યસત્થસમુટ્ઠાના થેય્યસત્થસિક્ખાપદેન સમાનસમુટ્ઠાના સિયુન્તિ યોજના.

થેય્યસત્થસમુટ્ઠાનવણ્ણના.

૪૦૨. છત્ત, દણ્ડકરસ્સાપીતિ ‘‘ન છત્તપાણિસ્સ દણ્ડપાણિસ્સા’’તિ (પાચિ. ૬૩૫) વુત્તસિક્ખાપદદ્વયઞ્ચ. સત્થાવુધકરસ્સાપીતિ ‘‘ન સત્થપાણિસ્સ (પાચિ. ૬૩૬), ન આવુધપાણિસ્સા’’તિ (પાચિ. ૬૩૭) વુત્તસિક્ખાપદદ્વયઞ્ચ. પાદુકૂપાહના, યાનન્તિ ‘‘ન પાદુકારુળ્હસ્સ (પાચિ. ૬૩૮), ન ઉપાહનારુળ્હસ્સ (પાચિ. ૬૩૯), ન યાનગતસ્સા’’તિ (પાચિ. ૬૪૦) વુત્તસિક્ખાપદત્તયઞ્ચ. સેય્યા, પલ્લત્થિકાય ચાતિ ‘‘ન સયનગતસ્સ (પાચિ. ૬૪૧), ન પલ્લત્થિકાય નિસિન્નસ્સા’’તિ (પાચિ. ૬૪૨) વુત્તસિક્ખાપદદ્વયઞ્ચ.

૪૦૩. વેઠિતોગુણ્ઠિતો ચાતિ ‘‘ન વેઠિતસીસસ્સ (પાચિ. ૬૪૩), ન ઓગુણ્ઠિતસીસસ્સા’’તિ (પાચિ. ૬૪૪) વુત્તસિક્ખાપદદ્વયઞ્ચાતિ નિદસ્સિતા સબ્બે એકાદસ ધમ્મા વાચાચિત્તસઙ્ખાતેન એકેન સમુટ્ઠાનેન સમુટ્ઠિતા ધમ્મદેસનસમુટ્ઠાનાતિ સઞ્ઞિતા સલ્લક્ખિતાતિ યોજના.

ધમ્મદેસનસમુટ્ઠાનવણ્ણના.

૪૦૪. એવં તાવ સમ્ભિન્નસમુટ્ઠાનં વેદિતબ્બં, નિયતસમુટ્ઠાનં તિવિધં, તં એકસ્સેવ સિક્ખાપદસ્સ હોતીતિ વિસુંયેવ દસ્સેતુમાહ ‘‘ભૂતારોચનકઞ્ચેવા’’તિઆદિ. ભૂતારોચનકઞ્ચેવાતિ તીહિ અચિત્તકસમુટ્ઠાનેહિ સમુટ્ઠિતં ભૂતારોચનસિક્ખાપદઞ્ચ. ચોરિવુટ્ઠાપનમ્પિ ચાતિ વાચાચિત્તતો, કાયવાચાચિત્તતો ચાતિ દ્વીહિ સમુટ્ઠિતં ચોરિવુટ્ઠાપનસિક્ખાપદઞ્ચ. અનનુઞ્ઞાતમેવ અનનુઞ્ઞાતમત્તં. અનનુઞ્ઞાતમત્તન્તિ વાચતો, કાયવાચતો, વાચાચિત્તતો, કાયવાચાચિત્તતો ચાતિ ચતૂહિ સમુટ્ઠિતં અનનુઞ્ઞાતસિક્ખાપદઞ્ચાતિ. ઇદં તયન્તિ ઇદં સિક્ખાપદત્તયં. અસમ્ભિન્નન્તિ કેનચિ અઞ્ઞેન સિક્ખાપદેન અસમ્મિસ્સસમુટ્ઠાનં.

ઇતિ ઉત્તરે લીનત્થપકાસનિયા

સમુટ્ઠાનસીસકથાવણ્ણના નિટ્ઠિતા.