આપત્તિસમુટ્ઠાનકથાવણ્ણના

૪૦૫. આદિનાતિ પઠમેન કાયસઙ્ખાતેન સમુટ્ઠાનેન.

૪૦૬-૭. દુક્કટાદયોતિ આદિ-સદ્દેન થુલ્લચ્ચયસઙ્ઘાદિસેસા ગહિતા. યથાહ – ‘‘પયોગે દુક્કટં. એકં પિણ્ડં અનાગતે આપત્તિ થુલ્લચ્ચયસ્સ. તસ્મિં પિણ્ડે આગતે આપત્તિ સઙ્ઘાદિસેસસ્સા’’તિ (પરિ. ૨૭૭). વિકાલે પન પાચિત્તીતિ વિકાલભોજનપાચિત્તિ. અઞ્ઞાતિહત્થતોતિ અઞ્ઞાતિકાય ભિક્ખુનિયા અન્તરઘરં પવિટ્ઠાય હત્થતો. ગહેત્વાતિ ખાદનીયં વા ભોજનીયં વા સહત્થા પટિગ્ગહેત્વા. ‘‘પઞ્ચ ઇમા આપત્તિયો’’તિ પદચ્છેદો.

૪૦૮. દુતિયેનાતિ વાચાસઙ્ખાતેન સમુટ્ઠાનેન.

૪૦૯-૧૦. સમાદિસતિ કથેતિ ચે. સબ્બથા વિપન્નન્તિ અદેસિતવત્થુકતાદિના સબ્બપ્પકારેન વિપન્નપ્પદેસં. કુટિન્તિ સઞ્ઞાચિકાય કુટિં. યથાહ પરિવારે ‘‘તસ્સ કુટિં કરોન્તિ અદેસિતવત્થુકં પમાણાતિક્કન્તં સારમ્ભં અપરિક્કમન’’ન્તિ (પરિ. ૨૭૮). પદસોધમ્મં મૂલં સમુટ્ઠાનં યસ્સ પાચિત્તિયસ્સાતિ તથા વુત્તં, તેન પદસોધમ્મમૂલેન, સહત્થે ચેતં કરણવચનં.

૪૧૧. તતિયેન સમુટ્ઠાનેનાતિ કાયવાચાસઙ્ખાતેન સમુટ્ઠાનેન.

૪૧૨. સંવિદહિત્વાનાતિ સદ્ધિં વિદહિત્વા, ‘‘કુટિં કરોમા’’તિ અઞ્ઞેહિ સદ્ધિં મન્તેત્વાતિ અત્થો.

૪૧૩. વત્વાતિ અત્તનો અત્થાય વિઞ્ઞાપેત્વા. ભિક્ખુનિન્તિ ભિક્ખૂનં ભુઞ્જનટ્ઠાને ઠત્વા ‘‘ઇધ સૂપં દેથ, ઇધ ઓદનં દેથા’’તિ વોસાસમાનં ઉપાસકાનં વત્વા દાપેન્તિં ભિક્ખુનિં. ન નિવારેત્વાતિ ‘‘અપસક્ક તાવ, ભગિનિ, યાવ ભિક્ખૂ ભુઞ્જન્તી’’તિ અનપસાદેત્વા ભુઞ્જતોતિ યોજના.

૪૧૪. ચતુત્થેન કાયચિત્તસમુટ્ઠાનેન કતિ આપત્તિયો સિયુન્તિ યોજના.

૪૧૭. પઞ્ચમેનાતિ વાચાચિત્તસમુટ્ઠાનેન. વદન્તિ વદન્તો સમુદાચરન્તો.

૪૧૮. કુટિન્તિ નિદસ્સનમત્તં, અદેસિતવત્થુકં પમાણાતિક્કન્તં સારમ્ભં અપરિક્કમનં સેનાસનમ્પિ ગહણં વેદિતબ્બં.

૪૧૯. વાચેતિ પદસો ધમ્મન્તિ એત્થ ‘‘અનુપસમ્પન્ન’’ન્તિ સેસો. યથાહ – ‘‘ભિક્ખુ અકપ્પિયસઞ્ઞી અનુપસમ્પન્નં પદસો ધમ્મં વાચેતી’’તિ (પરિ. ૨૮૧). દવકમ્યતા વદન્તસ્સાતિ જાતિઆદીહિ અક્કોસવત્થૂહિ કીળાધિપ્પાયેન વદન્તસ્સ. દવકમ્યતાતિ ચ ‘‘પટિસઙ્ખા યોનિસો’’તિઆદીસુ (મ. નિ. ૧.૨૨, ૨૪, ૪૨૨; અ. નિ. ૬.૫૮; ૮.૯; મહાનિ. ૧૯૯, ૨૦૬; ધ. સ. ૧૩૫૫; વિભ. ૫૧૮) વિય ય-કારલોપેન નિદ્દેસો.

૪૨૦. છટ્ઠેન કાયવાચાચિત્તસમુટ્ઠાનેન. સંવિદહિત્વાનાતિ સંવિધાય, ‘‘ત્વઞ્ચ અહઞ્ચ એકતો અવહરિસ્સામા’’તિ સમ્મન્તનં કત્વા. ભણ્ડં હરતીતિ ‘‘ભારિયં ત્વં એકં પસ્સં ગણ્હ, અહં ઇમ’’ન્તિ વત્વા તેન સહ ઠાના ચાવેતિ ચે.

૪૨૩. ઇધ ઇમસ્મિં સાસને. વિમતૂપરમં પરમન્તિ એત્થ ‘‘કપ્પિયં નુ ખો, અકપ્પિય’’ન્તિ વા ‘‘આપત્તિ નુ ખો, અનાપત્તી’’તિ વા ‘‘ધમ્મો નુ ખો, અધમ્મો’’તિ વા એવમાદિના નયેન વિવિધેનાકારેન પવત્તા વિમતિ વિચિકિચ્છા વિમતિ. વિમતિં ઉપરમેતિ વિનાસેતીતિ વિમતૂપરમં. પરમં ઉત્તમં. ઉત્તરન્તિ વિભઙ્ગખન્ધકાગતાનં નિદાનાદિવિનિચ્છયાનં પઞ્હઉત્તરભાવેન ઠિતત્તા ઉત્તરં. ઇમં ઉત્તરં નામ પકરણં યો ઉત્તરતિ પઞ્ઞાય ઓગાહેત્વા પરિયોસાપેતિ. ઇધ ‘‘ઉત્તરં ઉત્તર’’ન્તિ પદદ્વયે એકં ગુણનિદસ્સનં, એકં સત્થનિદસ્સનન્તિ ગહેતબ્બં. સુનયેન યુતો સો પુગ્ગલો વિનયં પિટકં ઉત્તરતીતિ સમ્બન્ધો. કિં વિસિટ્ઠન્તિ આહ ‘‘સુનય’’ન્તિઆદિ. સુટ્ઠુ ચારિત્તવારિત્તદળ્હીકરણસિથિલકરણભેદા પઞ્ઞત્તિઅનઉપઞ્ઞત્તાદિનયા એત્થાતિ સુનયો, તં. સુટ્ઠુ નીયતિ વિનિચ્છયો એતેનાતિ સુનયો, ઉત્તરવિનિચ્છયો, તેન. વિનિચ્છયાવબોધેન સંયુત્તો સમન્નાગતો. દુક્ખેન ઉત્તરીયતીતિ દુત્તરં. પાતિમોક્ખસંવરસીલદીપકત્તેન સમાધિપઞ્ઞાનિબ્બાનસઙ્ખાતઉત્તરપ્પત્તિયા પતિટ્ઠાભાવતો ઉત્તરં ઉત્તરતિ ઓગાહેત્વા પરિયોસાનં પાપુણાતીતિ અત્થો.

ઇધ યો વિમતૂપરમં પરમં ઉત્તરં ઉત્તરં નામ પકરણં ઉત્તરતિ, સુનયેન યુતો સો પુગ્ગલો સુનયં દુત્તરં ઉત્તરં વિનયં ઉત્તરતીતિ યોજના. ચ-સદ્દેન સત્થન્તરસમુચ્ચયત્થેન ઇમમત્થં દીપેતિ. સેય્યથિદં, ઇધ યો સુનયં દુત્તરં ઉત્તરં વિનયં ઉત્તરતિ, સુનયેન યુતો સો પુગ્ગલો વિમતૂપરમં પરમં ઉત્તરં ઉત્તરં નામ પકરણં ઉત્તરતીતિ. ઇમિના યો ઉત્તરં જાનાતિ, સો વિનયં જાનાતિ. યો વિનયં જાનાતિ, સો ઉત્તરં જાનાતીતિ ઉત્તરપકરણસ્સ વિનયપિટકજાનને અચ્ચન્તૂપકારિતા વિભાવિતાતિ દટ્ઠબ્બં.

ઇતિ ઉત્તરે લીનત્થપકાસનિયા

આપત્તિસમુટ્ઠાનકથાવણ્ણના નિટ્ઠિતા.