ચતુવિપત્તિકથાવણ્ણના

૨૭૩. ઇદાનિ ઉભયસાધારણં કત્વા વિપત્તિવારાદીનં વિસિટ્ઠવારાનં સઙ્ગહં કાતુમાહ ‘‘કતિ આપત્તિયો’’તિઆદિ.

૨૭૪. ભિક્ખુની સચે છાદેતિ, ચુતા હોતિ. સચે વેમતિકા છાદેતિ, થુલ્લચ્ચયં સિયાતિ યોજના.

૨૭૫. સઙ્ઘાદિસેસન્તિ પરસ્સ સઙ્ઘાદિસેસં.

૨૭૬. ‘‘કતિ આચારવિપત્તિપચ્ચયા’’તિ પદચ્છેદો.

૨૭૭. આચારવિપત્તિન્તિ અત્તનો વા પરસ્સ વા આચારવિપત્તિં.

૨૭૯. પાપિકં દિટ્ઠિન્તિ અહેતુકઅકિરિયનત્થિકદિટ્ઠિઆદિં લામિકં દિટ્ઠિં.

૨૮૧. મનુસ્સુત્તરિધમ્મન્તિ ઉત્તરિમનુસ્સધમ્મં.

૨૮૨. આજીવહેતુ સઞ્ચરિત્તં સમાપન્નોતિ યોજના. પરિયાયવચનેતિ ‘‘યો તે વિહારે વસતિ, સો ભિક્ખુ અરહા’’તિઆદિકે લેસવચને. ઞાતેતિ યં ઉદ્દિસ્સ વદતિ, તસ્મિં મનુસ્સજાતિકે વચનસમનન્તરમેવ ઞાતે.

૨૮૩. વત્વાતિ અગિલાનો અત્તનો અત્થાય વિઞ્ઞાપેત્વા. ભિક્ખુની પન સચે એવં હોતિ, ભિક્ખુની અગિલાના અત્તનો અત્થાય પણીતભોજનં વિઞ્ઞાપેત્વા ભુત્તાવિની સચે હોતીતિ અધિપ્પાયો. તસ્સા પાટિદેસનીયં સિયાતિ યોજના.

૨૮૪. ‘‘અત્તનો અત્થાય વિઞ્ઞાપેત્વાના’’તિ ઇમિના પરસ્સ ઞાતકપવારિતે તસ્સેવત્થાય વિઞ્ઞાપેત્વા તેન દિન્નં વા તસ્સ વિસ્સાસેન વા પરિભુઞ્જન્તસ્સ તેસં અત્તનો અઞ્ઞાતકઅપ્પવારિતે સુદ્ધચિત્તતાય અનાપત્તીતિ દીપેતિ.

ઇતિ ઉત્તરે લીનત્થપકાસનિયા

ચતુવિપત્તિકથાવણ્ણના નિટ્ઠિતા.