૧૩. કુલદૂસકસિક્ખાપદવણ્ણના

૪૩૧. તેરસમે કીટાગિરીતિ તસ્સ નિગમસ્સ નામં. તઞ્હિ સન્ધાય પરતો ‘‘ન અસ્સજિપુનબ્બસુકેહિ ભિક્ખૂહિ કીટાગિરિસ્મિં વત્થબ્બ’’ન્તિ વુત્તં, ગામનિગમતો ચ પબ્બાજનં, ન જનપદતો. તેન પન યોગતો જનપદોપિ ‘‘કીટાગિરિ’’ઇચ્ચેવ સઙ્ખ્યં ગતોતિ આહ ‘‘એવંનામકે જનપદે’’તિ.

તત્રાતિ સાવત્થિયં. ધુરટ્ઠાનેતિ અભિમુખટ્ઠાને, જેતવનદ્વારસમીપેતિ અત્થો. દ્વીહિ મેઘેહીતિ વસ્સિકેન, હેમન્તિકેન ચાતિ દ્વીહિ મેઘેહિ. ગણાચરિયેહિ છહિ અધિકતાય ‘‘સમધિક’’ન્તિ વુત્તં.

ઉદકસ્સાતિ અકપ્પિયઉદકસ્સ ‘‘કપ્પિયઉદકસિઞ્ચન’’ન્તિ વિસું વક્ખમાનત્તા, તઞ્ચ ‘‘આરામાદિઅત્થાય રુક્ખરોપને અકપ્પિયવોહારેસુપિ કપ્પિયઉદકસિઞ્ચનાદિ વટ્ટતી’’તિ વક્ખમાનત્તા ઇધાપિ વિભાગં કત્વા કપ્પિયઉદકસિઞ્ચનાદિ વિસું દસ્સિતં. યથા કોટ્ટનખણનાદિકાયિકકિરિયાપિ અકપ્પિયવોહારે સઙ્ગહિતા, એવં માતિકાઉજુકરણાદિકપ્પિયવોહારેપીતિ આહ ‘‘સુક્ખમાતિકાય ઉજુકરણ’’ન્તિ. એત્થ પુરાણપણ્ણાદિહરણમ્પિ સઙ્ગય્હતિ. મહાપચ્ચરિયવાદોવ પમાણત્તા પચ્છા વુત્તો. અકપ્પિયવોહારેપિ એકચ્ચં વટ્ટતીતિ દસ્સેતું ‘‘ન કેવલઞ્ચ સેસ’’ન્તિઆદિમાહ. યંકિઞ્ચિ માતિકન્તિ સુક્ખં વા અસુક્ખં વા. તત્થાતિ આરામાદિઅત્થાય રુક્ખરોપને. તથાતિ કપ્પિયવોહારપરિયાયાદીહિ ગન્થાપનં સન્ધાય વુત્તં. ઇમિના ચ કુલસઙ્ગહત્થાય ગન્થાપનાદિપિ ન વટ્ટતીતિ દસ્સેતિ.

વત્થુપૂજનત્થાય સયં ગન્થનં કસ્મા ન વટ્ટતીતિ ચોદેન્તો ‘‘નનુ ચા’’તિઆદિમાહ. યથા આરામાદિઅત્થં કપ્પિયપથવિયં સયં રોપેતુમ્પિ વટ્ટતિ, તથા વત્થુપૂજનત્થાય સયં ગન્થનમ્પિ કસ્મા ન વટ્ટતીતિ ચોદકસ્સ અધિપ્પાયો. વુત્તન્તિઆદિ પરિહારો. અથ ‘‘ન પન મહાઅટ્ઠકથાય’’ન્તિ કસ્મા વદતિ? મહાપચ્ચરિઆદીસુ વુત્તમ્પિ હિ પમાણમેવાતિ નાયં વિરોધો, મહાઅટ્ઠકથાયં અવુત્તસ્સ સયં રોપનસ્સ તત્થેવ વુત્તેન ઉદકસિઞ્ચનેન સહ સંસન્દનનયદસ્સનમુખેન પમાણમેવાતિ પતિટ્ઠાપેતું વુત્તત્તા. ‘‘મઞ્ઞેય્યાસી’’તિ પદં ‘‘તં કથ’’ન્તિ ઇમિના સમ્બન્ધિતબ્બં. તત્થાયં અધિપ્પાયો – કિઞ્ચાપિ મહાઅટ્ઠકથાયં સયં રોપનં ન વુત્તં, કપ્પિયઉદકસ્સ સયં આસિઞ્ચનં વુત્તમેવ, તસ્મા યથા આરામાદિઅત્થાય કપ્પિયઉદકં સયં સિઞ્ચિતુમ્પિ વટ્ટતિ, તથા વત્થુપૂજનત્થાય ગન્થનમ્પિ કસ્મા ન વટ્ટતીતિ. તમ્પિ ન વિરુજ્ઝતીતિ યદેતં વત્થુપૂજનત્થાયપિ ગન્થનાદિં પટિક્ખિપિત્વા આરામાદિઅત્થાય સયં રોપનસિઞ્ચનં વુત્તં, તમ્પિ પાળિયા સંસન્દનતો પુબ્બાપરં ન વિરુજ્ઝતિ.

તં કથં ન વિરુજ્ઝતીતિ આહ ‘‘તત્ર હી’’તિઆદિ. તત્રાતિ રોપનસિઞ્ચનવિસયે. પુપ્ફાદીહિ કુલસઙ્ગહપ્પસઙ્ગે ‘‘માલાવચ્છ’’ન્તિ વિસેસિતત્તા કુલસઙ્ગહત્થમેવ રોપનં અધિપ્પેતન્તિ વિઞ્ઞાયતીતિ આહ ‘‘માલાવચ્છન્તિ વદન્તો’’તિઆદિ. એતં વુત્તન્તિ ‘‘માલાવચ્છં રોપેન્તિપિ રોપાપેન્તિપિ, સિઞ્ચન્તિપિ સિઞ્ચાપેન્તિપી’’તિ એતં વુત્તં. અઞ્ઞત્ર પનાતિ આરામાદિઅત્થાય માલાવચ્છાદીનં રોપને પન. પરિયાયોતિ સયંકરણકારાપનસઙ્ખાતો પરિયાયો વોહારો અત્થવિસેસોતિ અત્થો અત્થિ ઉપલબ્ભતિ, કુલસઙ્ગહત્થત્તાભાવાતિ અધિપ્પાયો. એવમેત્થ પરિયાયસદ્દસ્સ કરણકારાપનવસેન અત્થે ગય્હમાને ‘‘ગન્થેન્તિપિ ગન્થાપેન્તિપી’’તિ પાળિયં પટિક્ખિત્તગન્થનગન્થાપનં ઠપેત્વા યં પરતો ‘‘એવં જાન, એવં કતે સોભેય્યા’’તિઆદિકપ્પિયવચનેહિ ગન્થાપનં વુત્તં, તત્થ દોસાભાવો સમત્થિતો હોતિ, ‘‘ગન્થેહી’’તિ આણત્તિયા કારાપનસ્સેવ ગન્થાપનન્તિ અધિપ્પેતત્તા. તત્થ પરિયાયં ઇધ ચ પરિયાયાભાવં ઞત્વાતિ તત્થ ‘‘માલાવચ્છં રોપેન્તી’’તિઆદીસુ ‘‘માલાવચ્છ’’ન્તિ કુલસઙ્ગહત્થતાસૂચનકસ્સ વિસેસનસ્સ સબ્ભાવતો કરણકારાપનસઙ્ખાતપરિયાયસબ્ભાવં. ઇધ ‘‘ગન્થેન્તી’’તિઆદીસુ તથાવિધવિસેસવચનાભાવતો તસ્સ પરિયાયસ્સ અભાવઞ્ચ ઞત્વા. તં સુવુત્તમેવાતિ વેદિતબ્બન્તિ યોજના.

સબ્બં વુત્તનયેનેવ વેદિતબ્બન્તિ અટ્ઠકથાસુ આગતનયેનેવ રોપનાદિ, ગન્થાપનાદિ ચ સબ્બં વેદિતબ્બં. ન હેત્થ સન્દેહો કાતબ્બોતિ નિગમેતિ.

હરણાદીસૂતિ વત્થુપૂજનત્થાય હરણાદીસુ. કુલિત્થિઆદીનં અત્થાય હરણતોતિ કુલિત્થિઆદીનં હરણસ્સેવ વિસેસેત્વા પટિક્ખિત્તત્તાતિ અધિપ્પાયો. તેનાહ ‘‘હરણાધિકારે હી’’તિઆદિ. મઞ્જરીતિ પુપ્ફગોચ્છં. વટંસકોતિ કણ્ણસ્સ ઉપરિ પિળન્ધનત્થં કતપુપ્ફવિકતિ, સો ચ ‘‘વટંસો’’તિ વુચ્ચતિ. કણ્ણિકાતિ બહૂનં પુપ્ફાનં વા માલાનં વા એકતો બન્ધિતસ્સ નામં, ‘‘કણ્ણાભરણ’’ન્તિપિ વદન્તિ. હારસદિસન્તિ મુત્તાહારસદિસં.

કપ્પિયેનાતિ કપ્પિયઉદકેન. તેસંયેવ દ્વિન્નન્તિ કુલદૂસનપરિભોગાનં દ્વિન્નં. દુક્કટન્તિ કુલસઙ્ગહત્થાય સયં સિઞ્ચને, કપ્પિયવોહારેન વા અકપ્પિયવોહારેન વા સિઞ્ચાપને ચ દુક્કટં, પરિભોગત્થાય પન સયં સિઞ્ચને, અકપ્પિયવોહારેન સિઞ્ચાપને ચ દુક્કટં. પયોગબહુલતાયાતિ સયં કરણે, કાયપયોગસ્સ કારાપને ચ વચીપયોગસ્સ ચ બહુત્તેન.

ગન્થેન નિબ્બત્તં દામં ગન્થિમં. એસેવ નયો સેસેસુપિ. ન વટ્ટતીતિ વત્થુપૂજનત્થાયપિ ન વટ્ટતિ, દુક્કટન્તિ અત્થો. વટ્ટતીતિ વત્થુપૂજનત્થાય વટ્ટતિ, કુલસઙ્ગહત્થાય પન કપ્પિયવોહારેન કારાપેન્તસ્સાપિ દુક્કટમેવ.

નીપપુપ્ફં નામ કદમ્બપુપ્ફં. પુરિમનયેનેવાતિ ‘‘ભિક્ખુસ્સ વા’’તિઆદિના વુત્તનયેન.

કદલિક્ખન્ધમ્હીતિઆદિના વુત્તં સબ્બમેવ સન્ધાય ‘‘તં અતિઓળારિકમેવા’’તિ વુત્તં, સબ્બત્થ કરણે, અકપ્પિયવચનેન કારાપને ચ દુક્કટમેવાતિ અત્થો. ‘‘પુપ્ફવિજ્ઝનત્થં કણ્ટકં બન્ધિતુમ્પિ ન વટ્ટતી’’તિ ઇમસ્સ ઉપલક્ખણત્તા પુપ્ફદામોલમ્બનાદિઅત્થાય રજ્જુબન્ધનાદિપિ ન વટ્ટતીતિ કેચિ વદન્તિ, અઞ્ઞે પન ‘‘પુપ્ફવિજ્ઝનત્થં કણ્ટકન્તિ વિસેસિતત્તા તદત્થં કણ્ટકમેવ બન્ધિતું ન વટ્ટતિ, તઞ્ચ અટ્ઠકથાપમાણેના’’તિ વદન્તિ, વીમંસિત્વા ગહેતબ્બં. પુપ્ફપટિચ્છકં નામ દણ્ડાદીહિ કતં પુપ્ફાધાનં, એતમ્પિ નાગદન્તકમ્પિ સછિદ્દકમેવ ગહેતબ્બં. અસોકપિણ્ડિયાતિ અસોકસાખાનં, પુપ્ફાનં વા સમૂહે. ધમ્મરજ્જુ નામ ચેતિયાદીનિ પરિક્ખિપિત્વા તેસઞ્ચ રજ્જુયા ચ અન્તરા પુપ્ફપ્પવેસનત્થાય બન્ધરજ્જુ. ‘‘સિથિલવટ્ટિતા વા રજ્જુવટ્ટિઅન્તરે પુપ્ફપ્પવેસનત્થાય એવં બન્ધા’’તિપિ વદન્તિ.

મત્થકદામન્તિ ધમ્માસનાદિમત્થકલમ્બકદામં. તેસંયેવાતિ ઉપ્પલાદીનં એવ. વાકેન વા દણ્ડકેન વાતિ પુપ્ફનાળં ફાલેત્વા પુપ્ફેન એકાબદ્ધં ઠિતવાકેન, દણ્ડકેન ચ એકબન્ધનેનેવ, એતેન પુપ્ફં બીજગામે સઙ્ગહં ન ગચ્છતિ પઞ્ચસુ બીજેસુ અપ્પવિટ્ઠત્તા પણ્ણં વિય, તસ્મા કપ્પિયં અકારાપેત્વાપિ કોપને દોસો નત્થિ. યઞ્ચ છિન્નસ્સાપિ મકુળસ્સ વિકસનં, તમ્પિ અતિતરુણસ્સ અભાવા વુડ્ઢિલક્ખણં ન હોતિ, પરિણતસ્સ પન મકુળસ્સ પત્તાનં સિનેહે પરિયાદાનં ગતે વિસુંભાવો એવ વિકાસો, તેનેવ છિન્નમકુળવિકાસો અચ્છિન્નમકુળવિકાસતો પરિહીનો, મિલાતયુત્તો વા દિસ્સતિ. યઞ્ચ મિલાતસ્સ ઉદકસઞ્ઞોગે અમિલાનતાપજ્જનં, તમ્પિ તમ્બુલપણ્ણાદીસુ સમાનન્તિ વુડ્ઢિલક્ખણં ન હોતિ, પાળિઅટ્ઠકથાદીસુ ચ ન કત્થચિ પુપ્ફાનં કપ્પિયકરણં આગતં, તસ્મા પુપ્ફં સબ્બથા અબીજમેવાતિ વિઞ્ઞાયતિ, વીમંસિત્વા ગહેતબ્બં. ‘‘પસિબ્બકે વિયા’’તિ વુત્તત્તા પુપ્ફપસિબ્બકે વા પસિબ્બકસદિસબન્ધે વા યત્થ કત્થચિ ચીવરે વા પક્ખિપિતું વટ્ટતીતિ સિદ્ધં. બન્ધિતું ન વટ્ટતીતિ રજ્જુઆદીહિ બન્ધનં સન્ધાય વુત્તં, પુપ્ફસ્સેવ પન અચ્છિન્નદણ્ડવાકેહિ બન્ધિતું વટ્ટતિ એવ.

પુપ્ફપટે ચ દટ્ઠબ્બન્તિ પુપ્ફપટં કરોન્તસ્સ દીઘતો પુપ્ફદામસ્સ હરણપચ્ચાહરણવસેન પૂરણં સન્ધાય વુત્તં, તિરિયતો હરણં પન વાયિમં નામ હોતિ, ન પૂરિમં. ‘‘પુરિમટ્ઠાનં અતિક્કામેતી’’તિ સામઞ્ઞતો વુત્તત્તા પુરિમં પુપ્ફકોટિં ફુસાપેત્વા વા અફુસાપેત્વા વા પરિક્ખિપનવસેન પન અતિક્કમન્તસ્સ આપત્તિયેવ. બન્ધિતું વટ્ટતીતિ પુપ્ફરહિતાય સુત્તવાકકોટિયા બન્ધિતું વટ્ટતિ. ‘‘એકવારં હરિત્વા વા પરિક્ખિપિત્વા વા’’તિ ઇદં પુબ્બે વુત્તચેતિયાદિપરિક્ખેપં, પુપ્ફપટકરણઞ્ચ સન્ધાય વુત્તં.

પરેહિ પૂરિતન્તિ દીઘતો પસારિતં. વાયિતુન્તિ તિરિયતો હરિતું, તં પન એકવારમ્પિ ન લબ્ભતિ. પુપ્ફાનિ ઠપેન્તેનાતિ અગન્થિતપુપ્ફાનિ અઞ્ઞમઞ્ઞં ફુસાપેત્વાપિ ઠપેન્તેન. ઘટિકદામઓલમ્બકોતિ હેટ્ઠાભાગે ઘટિકાકારયુત્તો, દારુઘટિકાકારો વા ઓલમ્બકો. સુત્તમયં ગેણ્ડુકં નામ. સબ્બત્થાતિ ગન્થિમાદીસુ સબ્બત્થ.

રેચકન્તિ અભિનયં, ‘‘એવં નચ્ચાહી’’તિ નટનાકારદસ્સનન્તિ અત્થો, ‘‘ચક્કં વિય અત્તાનં ભમાપન’’ન્તિપિ કેચિ. આકાસેયેવ કીળન્તીતિ ‘‘અયં સારી અસુકપદં મયા નીતા’’તિ એવં મુખેનેવ ઉભોપિ વદન્તા કીળન્તિ. જૂતફલકેતિ જૂતમણ્ડલે. પાસકકીળાયાતિ દ્વિન્નં તિવઙ્ગુલપ્પમાણાનં દારુદન્તાદિમયાનં પાસકાનં ચતૂસુ પસ્સેસુ એકકાદિવસેન બિન્દૂનિ કત્વા ફલકે ખિપિત્વા ઉપરિભાગે દિટ્ઠબિન્દૂનં વસેન સારિયો અપનેત્વા કીળનકજૂતકીળાય.

મઞ્જટ્ઠિ નામ મઞ્જટ્ઠરુક્ખસારકસાવં. સલાકહત્થન્તિ નાળિકેરહીરાદીનં કલાપસ્સેતં નામં. પાળિયં થરુસ્મિન્તિ ખગ્ગે. ઉસ્સેળેન્તીતિ મુખેન ઉસ્સેળનસદ્દં પમુઞ્ચન્તિ, મહન્તં અબ્યત્તસદ્દં પવત્તેન્તીતિ અત્થો. અપ્ફોટેન્તીતિ દ્વિગુણિતવામહત્થે દક્ખિણહત્થેન તાળેત્વા સદ્દં કરોન્તિ. મુખડિણ્ડિમન્તિ મુખભેરી.

૪૩૨. તેસન્તિ સમાસે ગુણીભૂતાનિ પબ્બાનિપિ પરામસતિ. બોન્દોતિ લોલો, મન્દધાતુકોતિ અત્થો. ભકુટિં કત્વાતિ ભમુકભેદં કત્વા. નેલાતિ નિદ્દોસા.

૪૩૩. પાળિયં ‘‘સારિપુત્તા’’તિ ઇદં એકસેસનયેન સારિપુત્તમોગ્ગલ્લાનાનં ઉભિન્નં આલપનં, તેનેવ બહુવચનનિદ્દેસો કતો.

૪૩૫. અટ્ઠારસ વત્તાનીતિ ‘‘ન ઉપસમ્પાદેતબ્બ’’ન્તિઆદીનિ ‘‘ન ભિક્ખૂહિ સમ્પયોજેતબ્બ’’ન્તિ પરિયોસાનાનિ કમ્મક્ખન્ધકે (ચૂળવ. ૭) આગતાનિ અટ્ઠારસ વત્તાનિ. ન પન્નલોમાતિ ન પતિતમાનલોમા, અનનુકૂલવત્તિનોતિ અત્થો.

૪૩૭. પરસન્તકં દેતિ દુક્કટમેવાતિ વિસ્સાસગાહેન દાનં સન્ધાય વુત્તં. થુલ્લચ્ચયન્તિ એત્થ ભણ્ડદેય્યમ્પિ હોતિ એવ.

તઞ્ચ ખો વત્થુપૂજનત્થાયાતિ માતાપિતૂનમ્પિ પુપ્ફં દેન્તેન વત્થુપૂજનત્થાયેવ દાતબ્બન્તિ દસ્સેતિ. મણ્ડનત્થાય પન સિવલિઙ્ગાદિપૂજનત્થાયાતિ એત્તકમેવ વુત્તત્તા ‘‘ઇમં વિક્કિણિત્વા જીવિસ્સન્તી’’તિ માતાપિતૂનં દાતું વટ્ટતિ, સેસઞાતીનં પન તાવકાલિકમેવ દાતું વટ્ટતિ. ઞાતિસામણેરેહેવાતિ તેસં ગિહિકમ્મપરિમોચનત્થં વુત્તં. ઇતરેતિ અઞ્ઞાતકા, તેહિપિ સામણેરેહિ આચરિયુપજ્ઝાયાનં વત્તસીસેન હરિતબ્બં. ચૂળકન્તિ ઉપડ્ઢભાગતોપિ ઉપડ્ઢં.

સામણેરા…પે… ઠપેન્તીતિ અરક્ખિતાગોપિતં સન્ધાય વુત્તં. તત્થ તત્થાતિ મગ્ગે વા ચેતિયઙ્ગણે વા. ‘‘સામણેરેહિ દાપેતું ન લભન્તી’’તિ ઇદં સામણેરેહિ ગિહીનં કમ્મં કારિતં વિય હોતીતિ વુત્તં, ન પન પુપ્ફદાનં હોતીતિ સામણેરાનમ્પિ ન વટ્ટનતો. વુત્તઞ્ચ ‘‘સયમેવા’’તિઆદિ. ‘‘અવિસેસેન વુત્ત’’ન્તિ ઇમિના સબ્બેસમ્પિ ન વટ્ટતીતિ દસ્સેતિ.

ખીણપરિબ્બયાનન્તિ આગન્તુકે સન્ધાય વુત્તં. પરિચ્છિન્નેસુપિ રુક્ખેસુ ‘‘ઇધ ફલાનિ સુન્દરાની’’તિઆદિં વદન્તેન કુલસઙ્ગહો કતો નામ હોતીતિ આહ ‘‘એવં પન ન વત્તબ્બ’’ન્તિ.

રુક્ખચ્છલ્લીતિ રુક્ખત્તચો. અભાજનીયત્તા ગરુભણ્ડં વુત્તં. વુત્તનયેનાતિ પણ્ણદાનમ્પિ પુપ્ફફલાદીસુ વુત્તનયેન કુલસઙ્ગહો હોતીતિ દસ્સેતિ.

પુબ્બે વુત્તપ્પકારન્તિ મમ વચનેન ભગવતો પાદે વન્દથાતિઆદિના વુત્તપ્પકારસિક્ખાપદે પઠમં વુત્તં. ‘‘પક્કમતાયસ્મા’’તિ ઇદં પબ્બાજનીયકમ્મવસેન વુત્તં. પુન ‘‘પક્કમતાયસ્મા’’તિ ઇદમ્પિ પબ્બાજનીયકમ્મકતસ્સ વત્તવસેન વુત્તં. એત્થ ચ અસ્સજિપુનબ્બસુકેહિ આચરિયેસુ અનેકવિધેસુ અનાચારેસુ પઞ્ઞપેતબ્બા આપત્તિયો સિક્ખાપદન્તરેસુ પઞ્ઞત્તા એવાતિ તા ઇધ અપઞ્ઞપેત્વા કુલદૂસકાનં પબ્બાજનીયકમ્મવસેન નિગ્ગહં કાતું તત્થેવ સમ્મા અવત્તિત્વા કારકસઙ્ઘં છન્દગામિતાદીહિ પાપેન્તાનં સમનુભાસનાય સઙ્ઘાદિસેસં આરોપિતઞ્ચ ઇદં સિક્ખાપદં પઞ્ઞત્તન્તિ વેદિતબ્બં. પઠમસઙ્ઘભેદસદિસાનેવાતિ એત્થ અઙ્ગેસુપિ યથા તત્થ પરક્કમનં, એવમિધ છન્દાદીહિ પાપનં દટ્ઠબ્બં. સેસં તાદિસમેવાતિ.

કુલદૂસકસિક્ખાપદવણ્ણના નિટ્ઠિતા.

નિગમનવણ્ણના

૪૪૨. ઇતરે પન યાવતતિયકાતિ વેદિતબ્બાતિ સમ્બન્ધો. યો હિ જરો એકસ્મિં દિવસે આગન્ત્વાપિ ગતો અનન્તરેસુ દ્વીસુ દિવસેસુ અનુપ્પજ્જિત્વા તતિયે દિવસે ઉપ્પજ્જતિ, સો તતિયકો. યો પન તતિયેપિ અનુપ્પજ્જિત્વા ચતુત્થે એવ દિવસે ઉપ્પજ્જતિ, સો ચતુત્થકો ચાતિ વુચ્ચતિ. તં સન્ધાયાહ ‘‘યથા તતિયે’’તિઆદિ. ‘‘અકામેન અવસેના’’તિ ઇમિના અપ્પટિકમ્મકરણં નામ યસ્મા અલજ્જિલક્ખણં, સગ્ગમોક્ખાવરણઞ્ચ, તસ્મા આપન્નો પુગ્ગલો ‘‘પચ્છા પરિવસિસ્સામી’’તિ વિક્ખિપિતું ન લભતિ, સઙ્ઘેન ચ અનિચ્છન્તસ્સેવ પરિવાસો દાતબ્બોતિ દસ્સેતિ. પાળિયં ચિણ્ણમાનત્તો ભિક્ખુ…પે… અબ્ભેતબ્બોતિ એત્થ યો ભિક્ખુ ચિણ્ણમાનત્તો, સો ભિક્ખુ અબ્ભેતબ્બોતિ એવં ભિક્ખુસદ્દદ્વયસ્સ યોજના વેદિતબ્બા. તે ચ ભિક્ખૂ ગારય્હાતિ ઊનભાવં ઞત્વા અબ્ભેન્તિ, દુક્કટાપજ્જનેન ગરહિતબ્બા. સામીચીતિ વત્તં.

ઇતિ સમન્તપાસાદિકાય વિનયટ્ઠકથાય વિમતિવિનોદનિયં

તેરસકવણ્ણનાનયો નિટ્ઠિતો.