૪. તુવટ્ટવગ્ગવણ્ણના

૧. પઠમસિક્ખાપદવણ્ણના

૯૩૪-૫. એકાય નિપન્નાય અપરા નિપજ્જતિ, આપત્તિ પાચિત્તિયસ્સાતિ ‘‘ઉભિન્નમ્પિ પઠમનિપન્નાય અનુટ્ઠાપના’’તિ વત્વા એત્થ કિરિયાકિરિયન્તિ એકે, તં અટ્ઠકથાય વિરુજ્ઝતિ. ‘‘કિરિય’’ન્તિ હિ અટ્ઠકથાયં વુત્તં. અથ કસ્સા આપત્તીતિ? ઉભિન્નમ્પિ નિપજ્જનકિરિયં પટિચ્ચ. ઇમસ્સ અનાપત્તિવારે ‘‘વવત્થાનં દસ્સેત્વા’’તિ નત્થિ, તસ્મા વવત્થાનં કત્વા નિપજ્જિતું ન વટ્ટતીતિ એકે. વિપુલતરે વટ્ટતીતિ એકે. ‘‘અન્તરં કત્વા નિપજ્જિતું વટ્ટતી’’તિ પોરાણગણ્ઠિપદે લિખિતં.

પઠમસિક્ખાપદવણ્ણના નિટ્ઠિતા.

૨. દુતિયસિક્ખાપદવણ્ણના

૯૪૦. વવત્થાનં દસ્સેત્વાતિ એત્થ ઉપરિ પારુપનમ્પિ મજ્ઝે ઓભોગં કત્વા ઉભિન્નં અન્તરે ઓતારેતિ, વટ્ટતીતિ એકે. વવત્થાનઞ્ચ યથા ઠાને ન તિટ્ઠતિ, તથા અતિક્કમિત્વા તુવટ્ટેન્તિયા આપત્તિયેવાતિ. ‘‘કિરિયાકિરિય’’ન્તિ ચ પોરાણગણ્ઠિપદે વુત્તં.

દુતિયસિક્ખાપદવણ્ણના નિટ્ઠિતા.

૩. તતિયસિક્ખાપદવણ્ણના

૯૪૧. અત્તનો સજ્ઝાયનટ્ઠાને ચે વુડ્ઢતરા આગચ્છતિ, વન્દનકાલે વા, આપુચ્છનકિચ્ચં નત્થિ. એકસ્મિં ઓવરકે આપુચ્છિતબ્બં. ‘‘અથ ઓવરકે મહાથેરી વસતિ, સમ્મુખે ઇતરા, આપુચ્છિતબ્બા તસ્સા ઉપચારત્તા’’તિ પોરાણગણ્ઠિપદે વુત્તં.

તતિયસિક્ખાપદવણ્ણના નિટ્ઠિતા.

૯૪૬-૯૫૦. ચતુત્થપઞ્ચમસિક્ખાપદં ઉત્તાનત્થમેવ.

૬. છટ્ઠસિક્ખાપદવણ્ણના

૯૫૬. ગહપતિ નામ ઠપેત્વા સહધમ્મિકે વેદિતબ્બો, તસ્મા ભિક્ખુના વા સામણેરેન વા અનનુલોમિકેન સંસગ્ગેન સંસટ્ઠાપિ ન સમનુભાસિતબ્બાતિ સમ્ભવતિ એવ.

છટ્ઠસિક્ખાપદવણ્ણના નિટ્ઠિતા.

૯૬૧-૫. સત્તમઅટ્ઠમ સિક્ખાપદં ઉત્તાનત્થમેવ.

૯. નવમસિક્ખાપદવણ્ણના

૯૬૯. એકિન્દ્રિયન્તિ કાયિન્દ્રિયેનેવ એકિન્દ્રિયં, નિગણ્ઠાનં અચેલકાનં મતં. કાપિલા પન ‘‘પઞ્ચિન્દ્રિયા’’તિ મઞ્ઞન્તા એવં વદન્તિ ‘‘સચક્ખુકત્તા અલાબુમાલુવાદયો યત્થ આલમ્બનં, તત્થ ગચ્છન્તિ. સસોતકત્તા કદલિયો મેઘગજ્જિતં સુત્વા ગબ્ભં ગણ્હન્તિ. સઘાનકત્તા પનસાદયો કુણપગન્ધેન ફલન્તિ. સજિવ્હકત્તા ઉદકં પિવન્તિ યેન, સબ્બેપિ ‘પાદપા’તિ વુચ્ચન્તિ. સકાયપસાદત્તા ઇત્થિસમ્ફસ્સેન અસોકરુક્ખા પુપ્ફન્તી’’તિ. સઙ્ઘાતન્તિ વિનાસં.

૯૭૦. ઇધ ચ વસ્સચ્છેદેન દુક્કટં. પઠમં આવસિત્વા પચ્છા ચારિકા ચરણપચ્ચયા પાચિત્તિયં આપજ્જતીતિ વેદિતબ્બં. અથ વસ્સં અવસિત્વા ચરતિ, અવસ્સુપગમનપચ્ચયા દુક્કટં આપજ્જતિ. પોરાણગણ્ઠિપદે પન ‘‘અન્તોસત્તાહે અન્તોવસ્સે ચારિકં ચરન્તિયા પાચિત્તિયં. સત્તાહકરણીયેન પન વટ્ટતિ, ભિક્ખુનો દુક્કટં હોતી’’તિ વુત્તં.

૯૭૨. કેનચિ ઉબ્બાળ્હાતિ વસ્સચ્છેદકારણેનાતિ નો તક્કોતિ આચરિયો. કિત્તાવતા ચારિકા હોતીતિ? ઇદં ન સબ્બત્થ વિચારિતં. અનન્તરસિક્ખાપદે ‘‘અન્તમસો છપ્પઞ્ચયોજનાનિપી’’તિ વુત્તત્તા સો ચ મઞ્ઞે હેટ્ઠિમપરિચ્છેદોતિ.

નવમસિક્ખાપદવણ્ણના નિટ્ઠિતા.

૧૦. દસમસિક્ખાપદવણ્ણના

૯૭૩. દસમે ‘‘આહુન્દરિકા’’તિ પઠન્તિ કિર.

દસમસિક્ખાપદવણ્ણના નિટ્ઠિતા.

તુવટ્ટવગ્ગવણ્ણના નિટ્ઠિતા.