૫. ચિત્તાગારવગ્ગવણ્ણના

૧. પઠમસિક્ખાપદવણ્ણના

૯૭૮. કીળનઉપવનં નામ કઞ્ચિનગરસ્સ નગરુપવનં વિય દટ્ઠબ્બં. ઉય્યાનં નામ તત્થેવ નન્દવનઉય્યાનં વિય દટ્ઠબ્બં. ‘‘તત્થેવ ઠત્વા તં તં દિસાભાગં વિલોકેત્વા પસ્સન્તિયા પન પાટેક્કા આપત્તિયો’’તિ પાઠો. એવં વુત્તે યં પુબ્બે વુત્તં પદં ‘‘અનુદ્ધરમાના’’તિ, તં એકસ્મિંયેવ દિસાભાગેતિ સિદ્ધન્તિ એકે. ઉપચારો દ્વે લેડ્ડુપાતોતિ ચ.

પઠમસિક્ખાપદવણ્ણના નિટ્ઠિતા.

૨. દુતિયસિક્ખાપદવણ્ણના

૯૮૪. ‘‘આહરિમેહિ વાળેહી’’તિ ‘‘અસંહારિમેના’’તિ ચ દુવિધો પાઠો. ‘‘વિસું કત્વા પચ્છા સદ્ધિં તેહિ વાળેહી’’તિ લિખિતં. યથા તથા વાળરૂપે ઉટ્ઠપેત્વા કતપાદં ‘‘પલ્લઙ્ક’’ન્તિ વુચ્ચતિ અનાપત્તિવારે ‘‘અસંહારિમેહિ વાળેહિ કતં પરિભુઞ્જતી’’તિ વચનાભાવતો.

દુતિયસિક્ખાપદવણ્ણના નિટ્ઠિતા.

૩. તતિયસિક્ખાપદવણ્ણના

૯૮૮. ‘‘ઉજ્જવુજ્જવેતિ હત્થપ્પસારણે’’તિ લિખિતં, તં ન યુત્તં ‘‘યત્તકં હત્થેન અઞ્છિતં હોતિ, તસ્મિં તક્કમ્હિ વેઠિતે એકાપત્તી’’તિ વચનતો.

તતિયસિક્ખાપદવણ્ણના નિટ્ઠિતા.

૪. ચતુત્થસિક્ખાપદવણ્ણના

૯૯૩. ‘‘યાગુપાનેતિ યાગુદાને’’તિ લિખિતં. પોરાણગણ્ઠિપદે ‘‘માતાપિતૂનં દાતું વટ્ટતી’’તિ વુત્તં.

ચતુત્થસિક્ખાપદવણ્ણના નિટ્ઠિતા.

૯૯૪. પઞ્ચમસિક્ખાપદં ઉત્તાનત્થમેવ.

૬. છટ્ઠસિક્ખાપદવણ્ણના

૧૦૦૧. છટ્ઠે ભિક્ખુવિભઙ્ગે અચેલકસિક્ખાપદેન એકપરિચ્છેદં. ઇધ અગારિકો વિસેસો, તસ્મા ‘‘અસાધારણ’’ન્તિ વદન્તિ.

છટ્ઠસિક્ખાપદવણ્ણના નિટ્ઠિતા.

૧૦૦૩-૮. સત્તમટ્ઠમેસુ વત્તબ્બં નત્થિ.

૯. નવમસિક્ખાપદવણ્ણના

૧૦૧૫. ‘‘ખીલનમન્તં દારુસારખીલં મન્તેત્વા પથવિયં પવેસેત્વા મારણમન્તં. નાગમણ્ડલંનામ નાગરોધમન્તં, પિટ્ઠાદીહિ વા પરિક્ખેપં કત્વા તત્થ મનુસ્સે પવેસેન્તિ ગુત્તત્થાયા’’તિ લિખિતં.

નવમસિક્ખાપદવણ્ણના નિટ્ઠિતા.

૧૦૧૭. દસમસિક્ખાપદં ઉત્તાનત્થમેવ.

ચિત્તાગારવગ્ગવણ્ણના નિટ્ઠિતા.