૩. નગ્ગવગ્ગવણ્ણના

૧-૨. પઠમદુતિયસિક્ખાપદવણ્ણના

૮૮૩. નગ્ગવગ્ગસ્સ પઠમદુતિયાનિ ઉત્તાનાનિ. પઠમે અયં વિસેસો – ભિક્ખુસ્સ તથા ન્હાયન્તસ્સ દુક્કટં અઞ્ઞત્ર જન્તાઘરઉદકપટિચ્છાદીહિ. ન ચ વિગરહિ તત્થ ભગવા અત્તનાવ અનનુઞ્ઞાતત્તા ઉદકસાટિકાયાતિ પોરાણા. ‘‘એકમેવ નિવાસેત્વા, પારુપિત્વા ચ નહાયિતું ન વટ્ટતી’’તિ પોરાણગણ્ઠિપદે વુત્તં.

પઠમદુતિયસિક્ખાપદવણ્ણના નિટ્ઠિતા.

૩. તતિયસિક્ખાપદવણ્ણના

૮૯૪. તતિયે અન્તોચતૂહપઞ્ચાહં ધુરં નિક્ખિપન્તિયાપિ આપત્તિ એવ. લિઙ્ગપરિવત્તે ધુરં નિક્ખિપન્તિયા દુક્કટં તિકદુક્કટત્તા. ‘‘સમ્બહુલાહિ ભિક્ખુનીહિ સદ્ધિન્તિ એત્થ ચતસ્સોપિ સમ્બહુલા’’તિ પોરાણગણ્ઠિપદે વુત્તં.

તતિયસિક્ખાપદવણ્ણના નિટ્ઠિતા.

૪. ચતુત્થસિક્ખાપદવણ્ણના

૮૯૮. ચતુત્થે સઙ્ઘાટિચારન્તિ એત્થ સઙ્ઘાટિઆદિવસેન અધિટ્ઠિતાનંયેવાયં વિધિ, નેતરાસં કિર. તત્થ તિચીવરે એવ વિપ્પવાસપચ્ચયા નિસ્સગ્ગિયં. અન્તોચીવરકાલેપિ પઞ્ચાહિકં સઙ્ઘાટિચારં અતિક્કામેન્તિયા આપત્તિયેવ. ‘‘વિના એતેહિ ચીવરેહિ ઉપસમ્પદં કાતું ન વટ્ટતી’’તિ પોરાણગણ્ઠિપદે વુત્તં.

ચતુત્થસિક્ખાપદવણ્ણના નિટ્ઠિતા.

૫. પઞ્ચમસિક્ખાપદવણ્ણના

૯૦૬. પઞ્ચમસ્સ અનાપત્તિવારે તાય વા અવિપ્પવાસાયાતિ અત્થતો લબ્ભતિ.

પઞ્ચમસિક્ખાપદવણ્ણના નિટ્ઠિતા.

૯૦૭-૯૧૧. છટ્ઠસત્તમાનિ ઉત્તાનાનિ.

૮. અટ્ઠમસિક્ખાપદવણ્ણના

૯૧૬. સોકજ્ઝાયિકા નામ કિર માયાકારા. વિલુમ્પકા ભણ્ડકાતિ ચ પોરાણા.

અટ્ઠમસિક્ખાપદવણ્ણના નિટ્ઠિતા.

૯. નવમસિક્ખાપદવણ્ણના

૯૨૦. ‘‘કથઞ્હિ નામ અતિક્કામેસ્સતી’’તિ વુત્તત્તા થુલ્લનન્દા ચીવરકાલસમયં આગમેથાતિ અતિક્કમાપેસીતિ સિદ્ધં હોતિ.

નવમસિક્ખાપદવણ્ણના નિટ્ઠિતા.

૧૦. દસમસિક્ખાપદવણ્ણના

૯૨૭. દસમે એકકુલં એતદવોચુન્તિ એત્થ કુલં નામ તસ્મિં મનુસ્સા, તસ્મા બહુવચનં.

દસમસિક્ખાપદવણ્ણના નિટ્ઠિતા.

નગ્ગવગ્ગવણ્ણના નિટ્ઠિતા.