૭. સત્તમસિક્ખાપદવણ્ણના

૮૬૭. અનાપત્તિવારે ‘‘ધુવપઞ્ઞત્તે’’તિ ન વુત્તં ‘‘સન્થરિત્વા વા સન્થરાપેત્વા વા’’તિ વુત્તત્તા. ઇધ છટ્ઠે વુત્તનયેન પકતિયા પઞ્ઞત્તે અભિનિસીદતિ વા અભિનિપજ્જતિ વા, પાચિત્તિયમેવ. અઞ્ઞત્થ ધુવપઞ્ઞત્તં. ઇધ વુત્તનયેન સન્થરિત્વા વા સન્થરાપેત્વા વા અભિનિસીદતિ વા અભિનિપજ્જતિ વા, પાચિત્તિયમેવ. ઉભયત્થાપિ પઞ્ચમે વુત્તનયેન અનાપુચ્છા પક્કમેય્ય, પાચિત્તિયમેવ, અનાપત્તિવારે માતિકાયં વુત્તકાલતો અઞ્ઞકાલસ્સ અપરામટ્ઠત્તાતિ નો તક્કોતિ આચરિયો. અપિચ અત્થાપત્તિકાલે આપજ્જતિ, નો વિકાલેતિઆદિત્તિકે, અત્થાપત્તિ રત્તિં આપજ્જતિ, નો દિવાતિઆદિત્તિકે ચ અટ્ઠકથાયં ઇધ પઞ્ચમછટ્ઠસત્તમસિક્ખાપદેહિ સઙ્ગહિતાપત્તીનં અપરામટ્ઠત્તા યથાસમ્ભવં તિવિધકાલે તિવિધમેતં યોજેત્વા દસ્સેતું વટ્ટતિ એવ મહાપદેસનયાનુલોમતો.

સત્તમસિક્ખાપદવણ્ણના નિટ્ઠિતા.