સમુટ્ઠાનસીસવણ્ણના

૨૫૭. અનત્તાતિ અત્તવિરહિતા ‘‘અલવણભોજન’’ન્તિઆદીસુ વિય. કરુણાસીતલભાવેન ચન્દસદિસો. કિલેસતિમિરપ્પહાનતો આદિચ્ચો. યસ્મા તે દેસયન્તિ, તસ્મા અઙ્ગીરસોપિ. પિટકે તીણિ દેસયિ તેસં અઞ્ઞતરત્તાતિ અત્થો. વિનયો યદિ તિટ્ઠતિ, એવં પટિપત્તિસદ્ધમ્માદિ નીયતિ પવત્તતીતિ અત્થો. અયં પન કથં તિટ્ઠતીતિ? આહ ‘‘ઉભતો ચા’’તિઆદિ. પરિવારેન ગન્થિતા તિટ્ઠન્તીતિ અત્થો. તસ્સેવ પરિવારસ્સ સુત્તે. નિયતસમુટ્ઠાનં કતં, વુત્તન્તિ અધિપ્પાયો. અસમ્ભિન્નસમુટ્ઠાનાનિ અસઙ્કરસમુટ્ઠાનાનિ, અઞ્ઞેહિ અસદિસસમુટ્ઠાનાનીતિ અત્થો. યસ્મા પરિવારે સતિ વિનયો તિટ્ઠતિ, વિનયે સતિ સદ્ધમ્મો તિટ્ઠતિ, યસ્મા સમુટ્ઠાનાનિ ચ સુત્તે દિસ્સન્તિ, તસ્મા સિક્ખેતિ અત્થો. ‘‘ધમ્મકામો સુપેસલો’’તિ પરિવારે ગારવજનનત્થં વુત્તં. તત્થાતિ ‘‘દિસ્સન્તી’’તિ તત્થ. ‘‘એકેન સમુટ્ઠાનેન સમુટ્ઠાતીતિ પઠમપારાજિકં એકેન સમુટ્ઠાનેન સમુટ્ઠાતી’’તિ વુત્તં. પાળિયઞ્હિ નિદ્દિટ્ઠસમુટ્ઠાનઞ્ચ દિસ્સતિ. ‘‘તસ્સેવ પરિવારસ્સ, સમુટ્ઠાનં નિયતો કત’’ન્તિ વુત્તં પુરિમનયેતિ અત્થો. યથાઞાયન્તિ યથાભૂતં. ‘‘સઞ્ચરિત્તાભાસનઞ્ચા’’તિ પાઠો. ‘‘સઞ્ચરિત્તાનુભાસનઞ્ચા’’તિપિ અત્થિ. નયવજ્જેહિ વિનયવજ્જેહીતિ અત્થો.

પઠમપારાજિકસમુટ્ઠાનવણ્ણના

૨૫૮. નાનુબન્ધે પવત્તિનિન્તિ ‘‘યા પન ભિક્ખુની વુત્થાપિતં પવત્તિનિં દ્વે વસ્સાનિ નાનુબન્ધેય્યા’’તિ વુત્તસિક્ખાપદઞ્ચ. અયં પાઠો એકચ્ચેસુ પોત્થકેસુ ન દિસ્સતિ. છસત્તતિ પઠમપારાજિકસમુટ્ઠાના.

દુતિયપારાજિકસમુટ્ઠાનવણ્ણના

૨૫૯. ‘‘કુક્કુચ્ચં ચીવરં દત્વાતિ કુક્કુચ્ચુપ્પાદનઞ્ચ ધમ્મિકાનં કમ્માનં છન્દં દત્વા ખીયનઞ્ચ ચીવરં દત્વા ખીયનઞ્ચા’’તિ પાઠો. ‘‘દત્વા’’તિ ઉપ્પટિપાટિયા વુત્તં, તસ્મા ‘‘કુક્કુચ્ચં ધમ્મિકં દત્વાતિ પાઠો સુન્દરો’’તિ વદન્તિ, વિચારેત્વા ગહેતબ્બં.

૨૬૯. અકતન્તિ અભિનવં.