સેદમોચનગાથાવણ્ણના

અવિપ્પવાસપઞ્હાવણ્ણના

૪૭૯. તહિન્તિ તસ્મિં પુગ્ગલે. અકપ્પિયસમ્ભોગો નામ મેથુનધમ્માદિ. ‘‘વરસેનાસનરક્ખણત્થાય વિસ્સજ્જેત્વા પરિભુઞ્જિતું વટ્ટતી’’તિ ગરુભણ્ડવિનિચ્છયે વુત્તો. એકાદસાવન્દિયે પણ્ડકાદયો એકાદસ. ઉપેતિ સપરિસં. ન જીવતિ નિમ્મિતરૂપત્તા. ‘‘ઉબ્ભક્ખકેન વદામી’’તિ ઇમિના મુખે મેથુનધમ્માભાવં દીપેતિ. અધોનાભિવિવજ્જનેન વચ્ચમગ્ગપ્પસ્સાવમગ્ગેસુ. ગામન્તરપરિયાપન્નં નદિપારં ઓક્કન્તભિક્ખુનિં સન્ધાયાતિ ભિક્ખુનિયા ગામાપરિયાપન્નપરતીરે નદિસમીપમેવ સન્ધાય વુત્તા. તત્થ પરતીરે ગામૂપચારો એકલેડ્ડુપાતો નદિપરિયન્તેન પરિચ્છિન્નો, તસ્મા પરતીરે રતનમત્તમ્પિ અરઞ્ઞં ન અત્થિ, તઞ્ચ તિણાદીહિ પટિચ્છન્નત્તા દસ્સનૂપચારવિરહિતં કરોતિ. તત્થ અત્તનો ગામે આપત્તિ નત્થિ. પરતીરે પન એકલેડ્ડુપાતસઙ્ખાતે ગામૂપચારેયેવ પદં ઠપેતિ. અન્તરે અભિધમ્મવસેન અરઞ્ઞભૂતં સકગામં અતિક્કમતિ નામ, તસ્મા ગણમ્હા ઓહીયના ચ હોતીતિ ઞાતબ્બં. એત્તાવતાપિ સન્તોસમકત્વા વિચારેત્વા ગહેતબ્બં. ભિક્ખૂનં સન્તિકે ઉપસમ્પન્ના પઞ્ચસતા મહાપજાપતિપ્પમુખા. મહાપજાપતિપિ હિ આનન્દત્થેરેન દિન્નઓવાદસ્સ પટિગ્ગહિતત્તા ભિક્ખૂનં સન્તિકે ઉપસમ્પન્ના નામ.

પારાજિકાદિપઞ્હાવણ્ણના

૪૮૦. ‘‘દુસ્સકુટિં સન્ધાયા’’તિ સહ દુસ્સેન વીતિક્કમનસ્સ સક્કુણેય્યતાય વુત્તં. લિઙ્ગપરિવત્તે પટિગ્ગહણસ્સ વિજહનતો સામં ગહેત્વા ભુઞ્જિતું ન વટ્ટતિ. કાકઊહદનં વાતિ કાકેન ઊહદનં વા. ‘‘તયો પુરિસેપિ ઉપગન્ત્વા’’તિ પાઠસેસો.

પાચિત્તિયાદિપઞ્હાવણ્ણના

૪૮૧. મેથુનધમ્મપચ્ચયા નામ કાયસંસગ્ગો. તંહેતુ મેથુનધમ્મસ્સ પુબ્બભાગભૂતં કાયસંસગ્ગં વાયામન્તિયાતિ અટ્ઠવત્થુપૂરણં સન્ધાય. પરિભોગપ્પચ્ચયાતિ પરિભોગકારણા. તસ્માતિ યસ્મા પરિભોગપ્પચ્ચયા આપજ્જતિ, તસ્મા ભોજનપરિયોસાને હોતીતિ અત્થો. પોરાણપોત્થકેસુ ‘‘તસ્સા’’તિ પાઠો. ‘‘કારણવચનં સુન્દરં ભોજનપરિચ્છેદદસ્સનતો’’તિ વદન્તિ.

સેદમોચનગાથાવણ્ણના નિટ્ઠિતા.