૫. તલસત્તિકસિક્ખાપદવણ્ણના

૪૫૬. ‘‘કાયં વા કાયપટિબદ્ધં વા’’તિ (પાચિ. ૪૫૬) વચનતો કાયાદીસુ યં ઉચ્ચારેતિ, તં તલં નામ. તલમેવ તલસત્તિકં. પોથનસમત્થટ્ઠેન સત્તિકન્તિ એકે. તં ‘‘ઉપ્પલપત્તમ્પી’’તિ ઇમિના નિયમેતિ. એવં કુપિતા હિ કોપવસેન પોથનાસમત્થતં અવિચારેત્વા યં કિઞ્ચિ હત્થગતં પટિક્ખિપન્તિ, સુખસમ્ફસ્સમ્પિ હોતુ, પાચિત્તિયમેવ. યસ્મા પહરિતુકામતાય પહટે પુરિમેન પાચિત્તિયં. કેવલં ઉચ્ચારેતુકામતાય ઉગ્ગિરણમત્તે કતે ઇમિના પાચિત્તિયં. ઇમિના પન વિરજ્ઝિત્વા પહારો દિન્નો, તસ્મા ન પહરિતુકામતાય દિન્નત્તા દુક્કટં. કિમિદં દુક્કટં પહારપચ્ચયા, ઉદાહુ ઉગ્ગિરણપચ્ચયાતિ? પહારપચ્ચયા એવ દુક્કટં. પુરિમં ઉગ્ગિરણપચ્ચયા પાચિત્તિયન્તિ સદુક્કટં પાચિત્તિયં યુજ્જતિ. પુરિમઞ્હિ ઉગ્ગિરણં, પચ્છા પહારો. ન ચ પચ્છિમપહારં નિસ્સાય પુરિમં ઉગ્ગિરણં અનાપત્તિવત્થુકં ભવિતુમરહતીતિ નો તક્કોતિ આચરિયો. ‘‘તેન પહારેન હત્થાદીસુ યં કિઞ્ચિ ભિજ્જતિ, દુક્કટમેવા’’તિ ઇમિનાપિ પહારપચ્ચયા દુક્કટં. ઉગ્ગિરણં યથાવત્થુકમેવાતિ સિદ્ધં, સુટ્ઠુ વીમંસિતબ્બં. ‘‘તિરચ્છાનાદીનં અસુચિકરણાદીનિ દિસ્વા કુજ્ઝિત્વાપિ ઉગ્ગિરન્તસ્સ મોક્ખાધિપ્પાયો એવા’’તિ વદન્તિ.

તલસત્તિકસિક્ખાપદવણ્ણના નિટ્ઠિતા.