૫. અચેલકવગ્ગો

૧. અચેલકસિક્ખાપદવણ્ણના

૨૬૯. વિઘાસાદાનં અન્તરા પૂવલાભેન અઞ્ઞતરા પરિબ્બાજિકા પવિસિત્વા ઠિતા. દાપેતીતિ અનુપસમ્પન્નેન.

અચેલકસિક્ખાપદવણ્ણના નિટ્ઠિતા.

૨. ઉય્યોજનસિક્ખાપદવણ્ણના

૨૭૬. વિજહન્તસ્સાતિ અનાદરત્થે સામિવચનં. ઉય્યોજકસ્સ વિજહન્તસ્સ સતો આપત્તિ દુક્કટસ્સાતિપિ અત્થો. ઇધ અનુપસમ્પન્નો નામ સામણેરોવાધિપ્પેતો.

ઉય્યોજનસિક્ખાપદવણ્ણના નિટ્ઠિતા.

૩. સભોજનસિક્ખાપદવણ્ણના

૨૮૦. સભોજનેતિ એત્થ પઠમવિકપ્પો ‘‘ઇત્થી ચ પુરિસો ચા’’તિ ઇમિના તતિયપદેન યુજ્જતિ, દુતિયવિકપ્પો પઠમેહિ દ્વીહિ. કુલેતિ ઘરે. અનુપવિસિત્વા નિસીદનચિત્તેન સચિત્તકં.

સભોજનસિક્ખાપદવણ્ણના નિટ્ઠિતા.

૪. રહોપટિચ્છન્નસિક્ખાપદવણ્ણના

૨૮૪. ઇધ પઞ્ચમં ઉપનન્દસ્સ ચતુત્થં હોતિ, તસ્મા ભિક્ખુનિવગ્ગસ્સ દસમટ્ઠકથાયં ઉપરિ ઉપનન્દસ્સ ‘‘તતિયસિક્ખાપદેના’’તિ ન પાઠો, ‘‘ચતુત્થેના’’તિ પાઠોતિ વેદિતબ્બો.

રહોપટિચ્છન્નસિક્ખાપદવણ્ણના નિટ્ઠિતા.

૫. રહોનિસજ્જસિક્ખાપદવણ્ણના

૨૮૯. રહોનિસજ્જસિક્ખાપદં ઉત્તાનત્થમેવ.

૬. ચારિત્તસિક્ખાપદવણ્ણના

૨૯૪. સભત્તોતિ નિમન્તનભત્તોતિ પોરાણા.

પુરેભત્તઞ્ચ પિણ્ડાય, ચરિત્વા યદિ ભુઞ્જતિ;

સિયા પરમ્પરાપત્તિ, પચ્છાભત્તં ન સા સિયા.

પચ્છાભત્તઞ્ચ ગમિકો, પુબ્બગેહં યદિ ગચ્છે;

એકે આપત્તિયેવાતિ, અનાપત્તીતિ એકચ્ચે.

કુલન્તરસ્સોક્કમને, આપત્તિમતયો હિ તે;

સમાનભત્તપચ્ચાસા, ઇતિ આહુ ઇધાપરે.

મતા ગણિકભત્તેન, સમેન્તિ નં નિમન્તને;

વિસ્સજ્જનં સમાનન્તિ, એકે સમ્મુખતાપરે.

સન્નિટ્ઠાનત્થિકેહેવ, વિચારેતબ્બભેદતો;

વિઞ્ઞૂ ચારિત્તમિચ્ચેવ, સિક્ખાપદમિદં વિદૂતિ.

ચારિત્તસિક્ખાપદવણ્ણના નિટ્ઠિતા.

૭. મહાનામસિક્ખાપદવણ્ણના

૩૧૦. કાલન્તિ સો. યસ્મા સઙ્ઘપવારણાયમેવાયં વિધિ, તસ્મા ‘‘ઞાતકાનં પવારિતાન’’ન્તિ વુત્તં. ‘‘ઇમિના હિ તયા પવારિતમ્હ, અમ્હાકઞ્ચ ઇમિના ચ ઇમિના ચ અત્થો’’તિ યથાભૂતં આચિક્ખિત્વા વિઞ્ઞાપેતું ગિલાનોવ લભતિ. યં પન વુત્તં પણીતભોજનસિક્ખાપદે ‘‘મહાનામસિક્ખાપદેન કારેતબ્બો’’તિ, તં સઙ્ઘવસેન પવારિતં, ભેસજ્જત્થાય સપ્પિઆદિભેસજ્જપઞ્ચકં વિઞ્ઞાપેતિ ચે, ‘‘ન ભેસજ્જેન કરણીયેન ભેસજ્જં વિઞ્ઞાપેતી’તિ વચનેન પાચિત્તિયન્તિ અત્થો’’તિ (પાચિ. ૩૦૯) લિખિતં.

મહાનામસિક્ખાપદવણ્ણના નિટ્ઠિતા.

૮. ઉય્યુત્તસેનાસિક્ખાપદવણ્ણના

૩૧૧-૫. મં દિટ્ઠેનાતિ મયા દિટ્ઠેન, મમ દસ્સનેન વા. એકમ્પિ સરહત્થં પુરિસન્તિ અઙ્ગપરિયાપન્નં.

ઉય્યુત્તસેનાસિક્ખાપદવણ્ણના નિટ્ઠિતા.

૯. સેનાવાસસિક્ખાપદવણ્ણના

૩૧૯. નવમે સેનાપરિક્ખેપેન વા પરિક્ખેપારહટ્ઠાનેન વા સઞ્ચરણટ્ઠાનપરિયન્તેન વા પરિચ્છિન્દિતબ્બા.

સેનાવાસસિક્ખાપદવણ્ણના નિટ્ઠિતા.

૧૦. ઉય્યોધિકસિક્ખાપદવણ્ણના

૩૨૪. દસમે એકમેકં દસ્સનાય ગચ્છતિ, આપત્તિ દુક્કટસ્સ. યત્થ ઠિતો પસ્સતિ, આપત્તિ પાચિત્તિયસ્સાતિઆદિ. અટ્ઠમે પન એકમેકં દસ્સનાય ગચ્છતિ, આપત્તિ દુક્કટસ્સ. યત્થ ઠિતો પસ્સતિ, આપત્તિ દુક્કટસ્સાતિ પાળિ. કસ્મા? અઙ્ગપ્પમાણાભેદેપિ અનીકવિસેસતો. દસમે પન અટ્ઠમઙ્ગસ્સ દસ્સનેન દુક્કટં સિયાતિ.

ઉય્યોધિકસિક્ખાપદવણ્ણના નિટ્ઠિતા.

સમત્તો વણ્ણનાક્કમેન અચેલકવગ્ગો પઞ્ચમો.