૯. રતનવગ્ગો

૧. અન્તેપુરસિક્ખાપદવણ્ણના

૪૯૪-૭. યથા ભગવન્તં પયિરુપાસતિ, એવમાકારેન નારહતાયં પુરિસો પાપો હોતું, ન હોતિ પાપોતિ અત્થો, કારણત્થં વા. તન્તિ નિપાતમત્તં, યતોતિ વા અત્થો. હત્થિસમ્મદ્દન્તિ સઙ્ઘાટસમ્મદ્દો, અક્કમનં ચુણ્ણતાતિ અત્થો.

૪૯૮. રતનં નામ અગ્ગમહેસી, તથાપિ ઇધ અઞ્ઞાપિ દેવિગોત્તા ન રક્ખતિ, અનાપત્તિવારે ‘‘ન મહેસી હોતી’’તિ વચનાભાવતો. સચે ખત્તિયોવ હોતિ, નાભિસિત્તો. અભિસિત્તોયેવ હોતિ, ન ખત્તિયો રક્ખતીતિ આચરિયો. અનાપત્તિવારે માતિકાટ્ઠકથાયં અઙ્ગભાવેન ચ વુત્તત્તા અભિસિત્તભાવોવપમાણં. સેસં ઉક્કટ્ઠપરિચ્છેદોતિ એકે.

૫૦૦-૫૦૧. ‘‘ન સયનિઘરે સયનિઘરસઞ્ઞી’’તિ તિકચ્છેદોપિ એત્થ લબ્ભતિ. ન સયનિઘરં નામ અપરિક્ખિત્તરુક્ખમૂલાદિ.

અન્તેપુરસિક્ખાપદવણ્ણના નિટ્ઠિતા.

૨. રતનસિક્ખાપદવણ્ણના

૫૦૪. ‘‘અધિવાસેન્તુ ગહપતિનો ભત્ત’’ન્તિ ચ ‘‘મે ગહપતિનો’’તિ ચ અત્થિ.

૫૦૬. કુરુન્દિવચનેન ઘરેપિ યદિ ભિક્ખૂ આસઙ્કન્તિ, તત્થ ઠત્વા આચિક્ખિતબ્બન્તિ વુત્તં હોતિ. પતિરૂપાતિ ‘‘રતનસમ્મતે પંસુકૂલગ્ગહણં વા રતને નિરુસ્સુક્કગમનં વા’’તિ લિખિતં. ‘‘તાવકાલિકવસેનપિ અનામાસં પટિગ્ગણ્હિતું ન લભતી’’તિ વદન્તિ. સમાદપેત્વાતિ યાચિત્વા ‘‘ઉદ્દિસ્સ અરિયા તિટ્ઠન્તિ, એસા અરિયાન યાચના’’તિ (જા. ૧.૭.૫૯) વુત્તનયેન.

રતનસિક્ખાપદવણ્ણના નિટ્ઠિતા.

૩. વિકાલગામપ્પવિસનસિક્ખાપદવણ્ણના

૫૧૧-૨. અહિના ડટ્ઠવત્થુમ્હિ સો ભિક્ખુ સન્તં ભિક્ખું અનાપુચ્છા ગતો, તસ્સ કુક્કુચ્ચં ઉદપાદિ. અદિન્નાદાને વુત્તનયેનાતિ ગામો ગામૂપચારોતિ ઇદં સન્ધાય વુત્તં.

વિકાલગામપ્પવિસનસિક્ખાપદવણ્ણના નિટ્ઠિતા.

૪. સૂચિઘરસિક્ખાપદવણ્ણના

૫૧૭. તન્તિ ભેદનકં. અસ્સાતિ પાચિત્તિયસ્સ પઠમં ભેદનકં કત્વા પચ્છા દેસેતબ્બત્તા. એસ નયો ઇતરેસુપિ.

૫૨૦. વાસિજટેતિ વાસિદણ્ડકે.

સૂચિઘરસિક્ખાપદવણ્ણના નિટ્ઠિતા.

૫. મઞ્ચસિક્ખાપદવણ્ણના

૫૨૧-૨. ‘‘ઉચ્ચે મઞ્ચે’’તિ ચ ‘‘ઉચ્ચા મઞ્ચે’’તિ ચ કત્થચિ. આયતોતિ વિત્થતો. અટ્ઠઙ્ગુલપાદકન્તિ ભાવનપુંસકં, અટ્ઠઙ્ગુલપ્પમાણં પાદકં વા.

મઞ્ચસિક્ખાપદવણ્ણના નિટ્ઠિતા.

૬. તૂલોનદ્ધસિક્ખાપદવણ્ણના

૫૨૮. પોટકિતૂલન્તિ યં કિઞ્ચિ તિણતૂલં. પટિલાભેન ઉદ્દાલેત્વા પાચિત્તિયં દેસેતબ્બન્તિ એત્થ કિઞ્ચાપિ પટિલાભમત્તેનેવ પાચિત્તિયન્તિ વિય દિસ્સતિ, પરિભોગેયેવ પન આપત્તિ દટ્ઠબ્બા, ‘‘અઞ્ઞેન કતં પટિલભિત્વા પરિભુઞ્જતિ, આપત્તિ દુક્કટસ્સા’’તિ વચનં એત્થ સાધકં.

તૂલોનદ્ધસિક્ખાપદવણ્ણના નિટ્ઠિતા.

૭. નિસીદનસિક્ખાપદવણ્ણના

૫૩૧. કિઞ્ચાપિ નિસીદનસ્સ જાતિ ન દિસ્સતિ એત્થ, તથાપિ ચીવરક્ખન્ધકે અનુઞ્ઞાતત્તા, ‘‘નવ ચીવરાનિ અધિટ્ઠાતબ્બાની’’તિ એત્થ ચ પરિયાપન્નત્તા ચીવરજાતિયેવસ્સ જાતીતિ વેદિતબ્બા. ‘‘સન્થતસદિસં સન્થરિત્વાતિ સદસ’’ન્તિ પુબ્બે વુત્તનિસીદનસન્થતત્તા ઉપમેતિ. લાભે સદસં, અલાભે અદસમ્પિ વટ્ટતીતિ એકે, તં ન યુત્તં. ‘‘નિસીદનં નામ સદસં વુચ્ચતી’’તિ તસ્સ સણ્ઠાનનિયમનતો.

નિસીદનસિક્ખાપદવણ્ણના નિટ્ઠિતા.

૮. કણ્ડુપટિચ્છાદિસિક્ખાપદવણ્ણના

૫૩૯. યદિ કણ્ડુપટિચ્છાદિ નામ અધોનાભિ ઉબ્ભજાણુમણ્ડલા ઉપ્પન્નકણ્ડુપીળકાદિપટિચ્છાદિકા અધિપ્પેતા, તસ્સ સુગતસ્સ સુગતવિદત્થિયા દીઘસો ચતસ્સો વિદત્થિયો તિરિયં દ્વેતિ ઇદમ્પિ અતિમહન્તં પમાણં દિસ્સતિ. સબ્બો હિ પુરિસો અત્તનો અત્તનો વિદત્થિયા સત્તવિદત્થિકો હોતિ, સુગતસ્સ ચ એકાવિદત્થિ મજ્ઝિમસ્સ પુરિસસ્સ તિસ્સો વિદત્થિયો હોન્તિ, તસ્મા કણ્ડુપટિચ્છાદિ પકતિપુરિસસ્સ પમાણં આપજ્જતિ તિરિયં, દીઘસો પન દિગુણં આપજ્જતીતિ. આપજ્જતુ, ઉક્કટ્ઠપરિચ્છેદો તસ્સા, ચે ઇચ્છતિ, સબ્બમ્પિ સરીરં પટિચ્છાદેસ્સતિ, સબ્બસરીરગતસઙ્ઘાટિ વિય બહુગુણં કત્વા નિવાસેતુકામો નિવાસેસ્સતીતિ અયં ભગવતો અધિપ્પાયો સિયા.

કણ્ડુપટિચ્છાદિસિક્ખાપદવણ્ણના નિટ્ઠિતા.

૯. વસ્સિકસાટિકસિક્ખાપદવણ્ણના

૫૪૨. વસ્સિકસાટિકાપિ ઉક્કટ્ઠપટિચ્છેદવસેન અનુઞ્ઞાતા. વસ્સકાલે કેચિ સઙ્ઘાટિપરિભોગેનેવ પરિભુઞ્જિસ્સન્તીતિ અયં ભગવતો અધિપ્પાયો સિયા. કિઞ્ચાપિ ઇમિના તક્કેન અનુઞ્ઞાતા, ‘‘અપ્પમાણિકાયો કણ્ડુપટિચ્છાદિયો ધારેન્તિ, વસ્સિકસાટિકાયો ધારેન્તી’’તિ ઇમસ્મિં વત્થુસ્મિં પઞ્ઞત્તત્તા પન અઞ્ઞથા પુણ્ણપરિચ્છેદતો અધિકપ્પમાણાયો તે ભિક્ખૂ ધારેસુન્તિ કત્વા એતપરમતા તાસં અનુઞ્ઞાતાતિ વેદિતબ્બા. એસેવ નયો દસમેપિ.

વસ્સિકસાટિકસિક્ખાપદવણ્ણના નિટ્ઠિતા.

૧૦. નન્દત્થેરસિક્ખાપદવણ્ણના

૫૫૧. તત્થ ભિસિં વા બિબ્બોહનં વા કરોતીતિ દીઘસો બહૂનં ભિક્ખૂનં સાધારણત્થં કરોતીતિ યુજ્જતિ.

નન્દત્થેરસિક્ખાપદવણ્ણના નિટ્ઠિતા.

સમત્તો વણ્ણનાક્કમેન રતનવગ્ગો નવમો.

પાચિત્તિયકણ્ડવણ્ણના નિટ્ઠિતા.

૬. પાટિદેસનીયકણ્ડો

૧. પઠમપાટિદેસનીયસિક્ખાપદવણ્ણના

૫૫૩-૫. ‘‘પટિદેસેતબ્બાકારદસ્સન’’ન્તિ અટ્ઠકથાયં વુત્તત્તા પાળિયં આગતવસેનેવ આપત્તિ દેસેતબ્બા, ન અઞ્ઞથા. ‘‘અન્તરઘરે અન્તરઘરસઞ્ઞી’’તિઆદિના ચ ‘‘ખાદનીયભોજનીયે અખાદનીયઅભોજનીયસઞ્ઞી’’તિઆદિના ચ ‘‘ભિક્ખુનિયા અભિક્ખુનિસઞ્ઞી’’તિઆદિના ચ નયેન અપરેપિ તયો તિકચ્છેદા યોજેત્વા દસ્સેતબ્બા.

પઠમપાટિદેસનીયસિક્ખાપદવણ્ણના નિટ્ઠિતા.

૨. દુતિયપાટિદેસનીયસિક્ખાપદવણ્ણના

૫૫૯. ‘‘નિમન્તિતા ભુઞ્જન્તીતિ પઞ્ચન્નં ભોજનાનં અઞ્ઞતરેન ભોજનેન નિમન્તિતા ભુઞ્જન્તી’’તિ કિઞ્ચાપિ વુત્તં, અથ ખો અકપ્પિયનિમન્તનેન નિમન્તિતતા એત્થ ન અઙ્ગં, માતિકાટ્ઠકથાયં વા ઇધ વા અનાપત્તિવારે લેસાભાવતો, તસ્મા ‘‘નિમન્તિતા’’તિ પદસ્સ અત્થો પુબ્બે આચિણ્ણવસેનેવ વુત્તો. અપરેપિ તયો તિકચ્છેદા યોજેત્વા દસ્સેતબ્બા પદભાજને વુત્તત્તાતિ વેદિતબ્બં. યથા તથા હિ ભુઞ્જન્તાનં તાદિસં ભિક્ખુનિં અવારેન્તાનં પાટિદેસનીયમેવ. ‘‘એસા વોસાસતિ નામ, વોસાસન્તી’’તિ ચ દુવિધો પાઠો. ‘‘અજ્ઝોહારે અજ્ઝોહારે’’તિ વચનેન પુન ‘‘ગારય્હં આવુસો ધમ્મ’’ન્તિ એકવચનં વિરુદ્ધન્તિ. પઠમં અજ્ઝોહારેયેવ આપન્નં સન્ધાય વુત્તં, તથા અઞ્ઞત્રાપિ આગચ્છતિ ‘‘આપજ્જિમ્હા’’તિ વચનતો. એકેન બહૂનમ્પિ વટ્ટતીતિ કેચિ, તં ન સુન્દરં. ‘‘તેહિ ભિક્ખૂહી’’તિઆદિના પાઠે વુત્તત્તાતિ મમ તક્કો. એકેન સહેવ ‘‘અહં આપજ્જિ’’ન્તિપિ વત્તબ્બન્તિ એકેન દ્વીહિ તીહિ દેસેતબ્બતો, સબ્બેહિ એવં વત્તું વટ્ટતિ. ‘‘આપજ્જિમ્હાતિ સહેવા’’તિ વદન્તિ. એકેન ચે અવારિતો, ‘‘અહં, આવુસો, ગારય્હં ધમ્મં આપજ્જિ’’ન્તિપિ વત્તબ્બં.

દુતિયપાટિદેસનીયસિક્ખાપદવણ્ણના નિટ્ઠિતા.

૫૬૨-૫૭૦. તતિયચતુત્થસિક્ખાપદાનિ ઉત્તાનત્થાનિયેવ.

પાટિદેસનીયકણ્ડવણ્ણના નિટ્ઠિતા.

૭. સેખિયકણ્ડો

૧. પરિમણ્ડલવગ્ગવણ્ણના

૫૭૬. ‘‘સિક્ખિતસિક્ખેનાતિ ચતૂહિ મગ્ગેહી’’તિ વુત્તં. યસ્મા અટ્ઠઙ્ગુલમત્તં ઓતારેત્વા નિવત્થમેવ નિસિન્નસ્સ ચતુરઙ્ગુલમત્તં હોતિ, તસ્મા ઉભોપેતે અટ્ઠકથાવાદા એકપરિચ્છેદા, ‘‘અડ્ઢતેય્યહત્થ’’ન્તિ સુખુમં, એકપત્તં વા સન્ધાય વુત્તં. તઞ્હિ યથાઠાનેન તિટ્ઠતિ. દુપટ્ટં સન્ધાય ‘‘દ્વિહત્થપ્પમાણમ્પી’’તિ વુત્તન્તિ ઉપતિસ્સત્થેરો. એકપટ્ટં, દ્વિપટ્ટં વા હેટ્ઠિમપરિચ્છેદેન ‘‘દ્વિહત્થપ્પમાણ’’ન્તિ વુત્તન્તિ વેદિતબ્બં. વુત્તઞ્હિ નિસ્સગ્ગિયઅટ્ઠકથાયં ‘‘તિરિયં દ્વિહત્થોપિ વટ્ટતી’’તિ, તઞ્ચ ખો અલાભે એવ ‘‘અલાભે તિરિયં દ્વિહત્થપ્પમાણમ્પિ વટ્ટતી’’તિ વુત્તત્તા. ઇદં સબ્બં અધિટ્ઠાનુપગં સન્ધાય વુત્તં. વિરુદ્ધં દિસ્વા સજ્જેતબ્બં. નો ચે સજ્જેતિ, દુક્કટં. સચિત્તકં પણ્ણત્તિવિજાનનચિત્તેનેવ ‘‘અનાદરિયં પટિચ્ચા’’તિ વુત્તત્તા, ન વત્થુવિજાનનચિત્તેન ‘‘ઇદમેવં કત’’ન્તિ જાનતોપિ આપત્તિયા અભાવતો. ફુસ્સદેવત્થેરવાદોપિ એકેન પરિયાયેન યુજ્જતિ. તથા ઉપતિસ્સત્થેરવાદોપિ. પઞ્ઞત્તેપિ સિક્ખાપદે અપઞ્ઞત્તેપિ યં પકતિયા વજ્જં, તં લોકવજ્જં. ઇદં પન પઞ્ઞત્તેયેવ વજ્જં, નાપઞ્ઞત્તે, તસ્મા ઇતરલોકવજ્જેન અસદિસત્તા ન લોકવજ્જં. પણ્ણત્તિતો પટ્ઠાય વજ્જતો પણ્ણત્તિવજ્જં. અનાદરિયચિત્તેનેવ આપજ્જિતબ્બત્તા સચિત્તકં, તસ્સ ચિત્તસ્સ તિવેદનત્તા તિવેદનં. યસ્મા અનાદરિયચિત્તતા નામ કેવલં અકુસલમેવ, તઞ્ચ પકતિયા વજ્જં, તસ્મા ઇદં લોકવજ્જં. સઞ્ચિચ્ચ વીતિક્કમનં નામ દોમનસ્સિકસ્સેવ હોતીતિ દુક્ખવેદનં. ગણ્ઠિપદે પન ‘‘પાણાતિપાતાદિ વિય નિવાસનાદિદોસો લોકગરહિતો ન હોતીતિ પણ્ણત્તિવજ્જન્તિ ફુસ્સદેવત્થેરો’’તિ લિખિતં.

૫૭૭. વિહારેપીતિ બુદ્ધુપટ્ઠાનાદિકાલે, તસ્મા ‘‘પારુપિતબ્બ’’ન્તિ ઉત્તરાસઙ્ગકિચ્ચવસેન વુત્તં. પઠમદુતિયસિક્ખાપદેસુ પરિળાહાદિપચ્ચયા કપ્પતિ, ન અન્તરઘરપટિસંયુત્તેસુ.

૫૮૨. ‘‘એકસ્મિં પન ઠાને ઠત્વા’’તિ એત્થ ‘‘ગચ્છન્તોપિ પરિસ્સયાભાવં ઓલોકેતું લભતિયેવ. તથા ગામે પૂજ’’ન્તિ લિખિતં, તં પન ‘‘એકસ્મિં ઠાને ઠત્વા’’તિ વુત્તત્તા તાદિસં અન્તરાયં સન્ધાય વુત્તન્તિ વેદિતબ્બં.

પરિમણ્ડલવગ્ગવણ્ણના નિટ્ઠિતા.

૨. ઉજ્જગ્ઘિકવગ્ગવણ્ણના

૫૮૬. હસનીયસ્મિન્તિ હેત્વત્થે ભુમ્મં, હસિતબ્બવત્થુકારણાતિ અત્થો. અન્તરઘરે ઉચ્ચાસદ્દેન અનુમોદનાદિં કરોન્તસ્સ અનાપત્તિ કિર. તથા હિ મહિન્દત્થેરોપિ હત્થિસાલાદીસુ મહાજનસ્સ કથેસિ.

૫૯૧. કેચિ ભિક્ખૂ ‘‘પરિક્ખારટ્ઠપનમત્તેન વાસૂપગતો હોતી’’તિ વદન્તિ, તં તેસં મતિમત્તમેવ. ભિક્ખુનિયો ચે વાસૂપગા હોન્તિ, ભિક્ખુનુપસ્સયોવ કપ્પિયભૂમિ. ‘‘યત્થ ભિક્ખુનિયો એકરત્તમ્પિ વસન્તિ, અયં ભિક્ખુનુપસ્સયો’’તિ (પાચિ. ૧૬૧) વચનતો તાસં સમીપં વા તાહિ ગહિતવાસાગારં વા ‘‘ગચ્છામી’’તિ ગચ્છતો યથાસુખં ગન્તું વટ્ટતિ. ન હિ તાવતા તં ઘરં અન્તરઘરસઙ્ખ્યં ગચ્છતીતિ નો તક્કોતિ આચરિયો.

ઉજ્જગ્ઘિકવગ્ગવણ્ણના નિટ્ઠિતા.

૩. ખમ્ભકતવગ્ગવણ્ણના

૬૦૪. સૂપો પત્તપ્પમાણવણ્ણનાયં વુત્તાકારો. ઓલોણી વુચ્ચતિ કુધિતં, ગોરસતો પૂરા થૂપિતોતિ અત્થો.

૬૦૫. હેટ્ઠા ઓરોહતીતિ એત્થ ‘‘ઓરોહનપ્પમાણે સતિ એકદેસે થૂપીકતેપિ અનાપત્તી’’તિ વદન્તિ. ‘‘પત્તસ્સ પન હેટ્ઠા ચ ઉપરિ ચ પદુમિનિપણ્ણાદીહિ પટિચ્છાદેત્વા ઓદહન્તિયા લદ્ધં નામ વટ્ટતી’’તિ ચ વદન્તિ. એત્થ ‘‘યસ્મા ‘સમતિત્તિકો પિણ્ડપાતો પટિગ્ગહેતબ્બો’તિ વચનં પિણ્ડપાતો સમપુણ્ણો પટિગ્ગહેતબ્બોતિ દીપેતિ, તસ્મા અત્તનો હત્થગતે પત્તે પિણ્ડપાતો દિય્યમાનો થૂપીકતોપિ ચે હોતિ, વટ્ટતીતિ દીપેતિ. ‘થૂપીકતં પિણ્ડપાતં પટિગ્ગણ્હાતિ, આપત્તિ દુક્કટસ્સા’તિ હિ વચનં પઠમં થૂપીકતં પિણ્ડપાતં પચ્છા પટિગ્ગણ્હતો, આપત્તીતિ દીપેતિ. પત્તેન પટિગ્ગણ્હતો ચેપિ થૂપીકતં હોતિ, વટ્ટતિ અથૂપીકતસ્સ પટિગ્ગહિતત્તા. પયોગો પન નત્થિ અઞ્ઞત્ર પુબ્બદેસા’’તિ ચ ‘‘સમતિત્તિકન્તિ વા ભાવનપુંસક’’ન્તિ ચ વદન્તિ, તસ્મા વિચારેત્વા ગહેતબ્બં.

ખમ્ભકતવગ્ગવણ્ણના નિટ્ઠિતા.

૪. સક્કચ્ચવગ્ગવણ્ણના

૬૦૯. સૂપોદનવિઞ્ઞત્તિસિક્ખાપદે ‘‘સૂપો નામ દ્વે સૂપા’’તિ ન વુત્તં સૂપગ્ગહણેન પણીતભોજનેહિ અવસેસાનં સબ્બભોજનાનં સઙ્ગણ્હનત્થં. અનાપત્તિવારે ચસ્સ ‘‘ઞાતકાનં પવારિતાનં અઞ્ઞસ્સત્થાય અત્તનો ધનેના’’તિ ઇદં અધિકં. કત્થચિ પોત્થકે ‘‘અનાપત્તિ અસઞ્ચિચ્ચ અસતિયા અજાનન્તસ્સ ગિલાનસ્સ આપદાસૂ’’તિ એત્તકમેવ વુત્તં, તં ન, ‘‘સમસૂપકં પિણ્ડપાતં ભુઞ્જિસ્સામી’’તિ ઇમસ્સ અનાપત્તિવારે ‘‘અઞ્ઞસ્સત્થાયા’’તિ કત્થચિ લિખિતં, તઞ્ચ પમાદવસેન લિખિતં. ‘‘મુખે પક્ખિપિત્વા પુન વિપ્પટિસારી હુત્વા ઓગિલિતુકામસ્સપિ સહસા ચે પવિસતિ, એત્થ ‘અસઞ્ચિચ્ચા’તિ વુચ્ચતિ. વિઞ્ઞત્તમ્પિ અવિઞ્ઞત્તમ્પિ એકસ્મિં ઠાને ઠિતં સહસા અનુપધારેત્વા ગહેત્વા ભુઞ્જન્તો ‘અસતિયા’તિ વુચ્ચતી’’તિ લિખિતં, અનાપત્તિવારે એકચ્ચેસુ પોત્થકેસુ ‘‘રસરસેતિ લિખિતં, તં ગહેતબ્બ’’ન્તિ વુત્તં.

સક્કચ્ચવગ્ગવણ્ણના નિટ્ઠિતા.

૫. કબળવગ્ગવણ્ણના

૬૧૮. ‘‘સબ્બં હત્થ’’ન્તિ વચનતો એકદેસં મુખે પક્ખિપન્તસ્સ અનાપત્તીતિ એકચ્ચે. ‘‘સબ્બન્તિ વચનતો એકદેસમ્પિ ન વટ્ટતી’’તિ વદન્તિ, તં યુત્તં અનાપત્તિવારે અવિસેસિતત્તા.

૬૨૪. સિત્થાવકારકે ‘‘કચવરં છડ્ડેન્તં સિત્થં છડ્ડિય્યતી’’તિ ચ ‘‘કચવરં છડ્ડેન્તો’’તિ ચ પાઠો.

કબળવગ્ગવણ્ણના નિટ્ઠિતા.

૬. સુરુસુરુવગ્ગવણ્ણના

૬૨૭. ‘‘સુરુસુરુ’’ન્તિ ચ ‘‘સુરોસુરો’’તિ ચ પાઠો. સીતીકતોતિ સીતઙ્કો. ‘‘સિલકબુદ્ધોતિ અરિયાનં પરિહાસવચનમેવેત’’ન્તિ લિખિતં.

૬૩૧. પટિક્કૂલવસેનાતિ એત્થ યદિ પટિક્કૂલવસેન પટિક્ખિત્તં, ‘‘સેય્યથાપિ કામભોગિનો’’તિ ન વત્તબ્બં. ન હિ તે પટિક્કૂલં કરોન્તીતિ ચે? ન, ઇસ્સરિયલિઙ્ગવસેન ગહણસમ્ભવતો. તે હિ અનાદરા હોન્તિ. પત્તધોવનન્તિ પત્તધોવનોદકં ભોજનપટિસંયુત્તં.

૬૩૪. ‘‘છત્તપાદુકાય’’ન્તિ ચ ‘‘છત્તપાદે’’તિ ચ પાઠો.

૬૩૭. ચાપોતિ સત્તખાદનવધો. ‘‘સેસા સબ્બા ધનુવિકતિ કોદણ્ડે પવિટ્ઠા’’તિ ચ લિખિતં, પટિમુક્કન્તિ પવેસિતં, લગ્ગિતં હોતીતિ અત્થો.

સુરુસુરુવગ્ગવણ્ણના નિટ્ઠિતા.

૭. પાદુકવગ્ગવણ્ણના

૬૪૦. સયં યાનગતો હુત્વા, યથા યાનગતસ્સ વે.

અલં વત્તું તથા નાલં, સછત્તો છત્તપાણિનો.

યથા એત્થ, એવં અઞ્ઞત્રાપિ.

૬૪૭. છપકવત્થુસ્મિં ‘‘સચાહં ન લભિસ્સામી’’તિ પાઠો, ‘‘દસ ચે ન લભિસ્સામી’’તિ ચ અત્થિ, ‘‘વત્થુસ્મિં અગિલાનસ્સા’’તિ ચ આગચ્છતિ, તં ન સુન્દરં, સિક્ખાપદેયેવ સુન્દરં. થોમિતોતિ અહમ્પિ જાનામીતિ સમ્બન્ધો. યા ધનયસલાભસઙ્ખાતા વુત્તિ વિનિપાતેન હોતિ સમ્પરાયે અપાયેસુ વિનિપાતહેતુ હુત્વા પવત્તતિ. અથ વા વિનિપાતેનાતિ હેત્વત્થે કરણવચનં, વિનિપાતનાય પવત્તતીતિ અધિપ્પાયો. અધમ્મચરણેન અધમ્મચરણાય. ‘‘અસ્મા કુમ્ભિમિવા’’તિ ચ પઠન્તિ.

પાદુકવગ્ગવણ્ણના નિટ્ઠિતા.

પકિણ્ણકવણ્ણના

કાયવાચાચિત્તતો સમુટ્ઠહન્તીતિ કત્વા ‘‘સમનુભાસનસમુટ્ઠાનાની’’તિ વુત્તાનિ. સમનુભાસનં કિરિયં. ઇમાનિ કિરિયાનિ. ધમ્મદેસનસમુટ્ઠાનાનિ વાચાચિત્તતોતિ એત્થ કાયવચીવિઞ્ઞત્તિભાવતો ઉજ્જગ્ઘિકઉચ્ચાસદ્દાદીસુ વિય ‘‘કાયવાચાચિત્તતો’’તિ વત્તબ્બાનીતિ ચે? ન વત્તબ્બાનિ. નિસીદનગમનાહારપક્ખિપનાદિકાયવિઞ્ઞત્તિયા સબ્ભાવા તત્થ યુત્તં, ન ધમ્મદેસને તાદિસસ્સાભાવા.

પકિણ્ણકવણ્ણના નિટ્ઠિતા.

સેખિયકણ્ડવણ્ણના નિટ્ઠિતા.

૮. સત્તાધિકરણસમથવણ્ણના

‘‘યેભુય્યસિકા કાતબ્બા…પે… તિણવત્થારકો કાતબ્બો, સો પુગ્ગલો’’તિ ચ લિખિતં.

સત્તાધિકરણસમથવણ્ણના નિટ્ઠિતા.

ભિક્ખુવિભઙ્ગો નિટ્ઠિતો.

નમો તસ્સ ભગવતો અરહતો સમ્માસમ્બુદ્ધસ્સ