૩. દ્વેભાગસિક્ખાપદવણ્ણના

૫૫૨. ‘‘ધારયિત્વા દ્વે તુલા આદાતબ્બા’’તિ વચનતો યથા તુલાધારણાય કાળકા અધિકા ન હોન્તિ, તથા કાળકાનં દ્વે ભાવા ગહેતબ્બા ઉક્કટ્ઠપરિચ્છેદેન. કથં પઞ્ઞાયતીતિ? સુદ્ધકાળકપટિસેધનનિદાનેન. તતિયં ઓદાતાનં ચતુત્થં ગોચરિયાનન્તિ હેટ્ઠિમપરિચ્છેદો. માતિકાટ્ઠકથાયં પન ‘‘એકસ્સપિ કાળકલોમસ્સ અતિરેકભાવે નિસ્સગ્ગિય’’ન્તિ (કઙ્ખા. અટ્ઠ. દ્વેભાગસિક્ખાપદવણ્ણના) વુત્તં, તં તુલાધારણાય કિઞ્ચાપિ ન સમેતિ, અચિત્તકત્તા પન સિક્ખાપદસ્સ પુબ્બે તુલાય ધારયિત્વા ઠપિતેસુ એકમ્પિ લોમં તત્થ પતેય્ય નિસ્સગ્ગિયન્તિ અધિપ્પાયોતિ નો તક્કો. અઞ્ઞથા દ્વે તુલા નાદાતબ્બા, ઊનકતરા આદાતબ્બા સિયું. ન હિ લોમં ગણેત્વા તુલાધારણા કરીયતિ. અથ ગણેત્વાવ કાતબ્બં. કિં તુલાધારણાય પયોજનન્તિ કેચિ. ‘‘ગોચરિયઓદાતેસુ એકમેવ દિગુણં કત્વા ગહેતું વટ્ટતી’’તિ વદન્તિ, અટ્ઠકથાયં અવિચારિતત્તા વીમંસિતબ્બં.

દ્વેભાગસિક્ખાપદવણ્ણના નિટ્ઠિતા.