૮. તિમ્બરુકસુત્તવણ્ણના

૧૮. યસ્મા તિમ્બરુકો ‘‘વેદના અત્તા. અત્તાવ વેદયતી’’તિ એવંલદ્ધિકો, તસ્મા તાય લદ્ધિયા ‘‘સયંકતં સુખદુક્ખ’’ન્તિ વદતિ, તં પટિસંહરિતું ભગવા ‘‘સા વેદના’’તિઆદિં અવોચ. તેનાહ ‘‘સા વેદનાતિઆદિ સયંકતં સુખદુક્ખન્તિ લદ્ધિયા નિસેધનત્થં વુત્ત’’ન્તિ. એત્થાપીતિ ઇમસ્મિમ્પિ સુત્તે. તત્રાતિ યં વુત્તં ‘‘સા વેદના…પે… સુખદુક્ખ’’ન્તિ, તસ્મિં પાઠે. આદિમ્હિયેવાતિ એત્થ ભુમ્મવચનેન ‘‘આદિતો’’તિ તો-સદ્દો ન નિસ્સક્કવચને. એવ-કારેન ખો-સદ્દો અવધારણેતિ દસ્સેતિ. યં પનેત્થ વત્તબ્બં, તં અનન્તરસુત્તે વુત્તમેવ. તત્થ પન ‘‘વેદનાતો અઞ્ઞો અત્તા, વેદનાય કારકો’’તિ લદ્ધિકસ્સ દિટ્ઠિગતિકસ્સ વાદો પટિક્ખિત્તો, ઇધ ‘‘વેદના અત્તા’’તિ એવંલદ્ધિકસ્સાતિ અયમેવ વિસેસો. તેનાહ ‘‘એવઞ્હિ સતિ વેદનાય એવ વેદના કતા હોતી’’તિઆદિ. ઇમિસ્સાતિ યાય વેદનાય સુખદુક્ખં કતં, ઇમિસ્સા. પુબ્બેપીતિ સસ્સતાકારતો પુબ્બેપિ. પુરિમઞ્હિ અત્થન્તિ અનન્તરસુત્તે વુત્તં અત્થં. અટ્ઠકથાયન્તિ પોરાણટ્ઠકથાયં. તન્તિ પુરિમસુત્તે વુત્તમત્થં. અસ્સાતિ ઇમસ્સ સુત્તસ્સ. યસ્મા તિમ્બરુકો ‘‘વેદનાવ અત્તા’’તિ ગણ્હાતિ, તસ્મા વુત્તં ‘‘અહં સા વેદના…પે… ન વદામી’’તિ.

અઞ્ઞા વેદનાતિઆદીસુપિ યં વત્તબ્બં, તં અનન્તરસુત્તે વુત્તનયમેવ. કારકવેદનાતિ કત્તુભૂતવેદના. વેદનાસુખદુક્ખન્તિ વેદનાભૂતસુખદુક્ખં કથિતં, ન વટ્ટસુખદુક્ખં. ‘‘વિપાકસુખદુક્ખમેવ વટ્ટતી’’તિ વુત્તં ‘‘સયંકતં સુખં દુક્ખ’’ન્તિઆદિવચનતો.

તિમ્બરુકસુત્તવણ્ણના નિટ્ઠિતા.