સમુટ્ઠાનસીસો

પઠમપારાજિકસમુટ્ઠાનવણ્ણના

૨૫૮. કિમત્થં ‘‘મેથુનં સુક્કસંસગ્ગો’’તિઆદિવચનં વુત્તન્તિ આહ ‘‘ઇદાની’’તિઆદિ. તત્થ તત્થાતિ ‘‘મેથુનં સુક્કસંસગ્ગો’’તિઆદિવચને. સમુટ્ઠાનસીસન્તિ સમુટ્ઠાનાનં, સમુટ્ઠાનેસુ વા સીસં. સેસાનીતિ પઠમપારાજિકતો સેસાનિ પઞ્ચસત્તતિ સિક્ખાપદાનિ. તેનાતિ પઠમપારાજિકેન. ‘‘સુક્કસંસગ્ગો’’તિઆદિવચનં સંવણ્ણેન્તો આહ ‘‘તત્થા’’તિઆદિ. તત્થ તત્થાતિ ‘‘સુક્કસંસગ્ગો’’તિઆદિવચને.

ખુદ્દકવણ્ણનાવસાનેતિ ખુદ્દકટ્ઠકથાય અવસાને.

લિઙ્ગવિપરિયાયોતિ લિઙ્ગવિપલ્લાસો. કાયમાનસિકા કતાતિ એત્થ કાયમાનસેસુ પવત્તા કાયમાનસિકાતિ વુત્તે સમુટ્ઠાનાતિ આહ ‘‘કાયચિત્તસમુટ્ઠાના કતા’’તિ.

દુતિયપારાજિકસમુટ્ઠાનવણ્ણના

૨૫૯. ઇદં સમુટ્ઠાનં એકં સમુટ્ઠાનસીસન્તિ સમ્બન્ધો. ‘‘અદિન્નાદાન’’ન્તિ ઇમિના અદિન્નન્તિ એત્થ સમુદાયનામે એકદેસવોહારોતિ દસ્સેતિ. સેસાનીતિ દુતિયપારાજિકતો સેસાનિ એકૂનસત્તતિ સિક્ખાપદાનિ. તેનાતિ દુતિયપારાજિકેન. તત્થાતિ ‘‘વિગ્ગહુત્તરી’’તિઆદિવચને. વિગ્ગહુત્તરીતિઆદિપદાનં બ્યઞ્જને આદરમકત્વા અત્થમેવ દસ્સેતું વુત્તં ‘‘મનુસ્સવિગ્ગહઉત્તરિમનુસ્સધમ્મસિક્ખાપદાની’’તિ. અનિયતા દુતિયિકાતિ આપત્તિં અપેક્ખિત્વા પાળિયં ઇત્થિલિઙ્ગવસેન વુત્તં, અટ્ઠકથાયં પન સિક્ખાપદં અપેક્ખિત્વા નપુંસકલિઙ્ગવસેન દુતિયન્તિ વુત્તં.

સમુટ્ઠાના તિકા કતાતિ એત્થ ‘‘તિકસમુટ્ઠાના’’તિ વત્તબ્બે પદવિપરિયાયવસેન કકારસ્સ દીઘવસેન સમુટ્ઠાના તિકાતિ વુત્તન્તિ દસ્સેન્તો આહ ‘‘તિકસમુટ્ઠાના કતા’’તિ.

સઞ્ચરિત્તસમુટ્ઠાનવણ્ણના

૨૬૦. ‘‘સઞ્ચરી’’તિ ઇદં તાવ સઞ્ચરિત્તં નામ એકસમુટ્ઠાનસીસં, સેસાનિ તેન સદિસાનિ.

વિભઙ્ગે આગતેન ‘‘રિઞ્ચન્તી’’તિ (પારા. ૫૭૬) પદેન એળકલોમધોવાપનસિક્ખાપદં ઉપલક્ખિત્વા વુત્તન્તિ આહ ‘‘વિભઙ્ગે રિઞ્ચન્તિ ઉદ્દેસન્તિ આગત’’ન્તિ.

‘‘યાવ દ્વારકોસા અગ્ગળટ્ઠપનાય’’ ઇતિ (પાચિ. ૧૩૫-૧૩૬) ચ ‘‘અઞ્ઞાતિકાય ભિક્ખુનિયા ચીવરં દદેય્ય’’ઇતિ (પાચિ. ૧૬૯) ચ ‘‘ચીવરં સિબ્બેય્ય’’ઇતિ (પાચિ. ૧૭૬-૧૭૭) ચ વુત્તસિક્ખાપદત્તયન્તિ યોજના.

‘‘સમણચીવરેન ચા’’તિ એવં વચનં વુત્તન્તિ સમ્બન્ધો. ‘‘સમણચીવરં દદેય્યા’’તિ ઇદં (પાચિ. ૯૧૭) વચનં સન્ધાયાતિ સમ્બન્ધો.

સમનુભાસનાસમુટ્ઠાનવણ્ણના

૨૬૧. ભેદન્તિ ઇદં સમનુભાસનં નામ એકં સમુટ્ઠાનસીસં, સેસાનિ તેન સદિસાનિ.

કથિનસમુટ્ઠાનવણ્ણના

૨૬૨. ઉબ્ભતન્તિ ઇદં કથિનસમુટ્ઠાનં નામ એકં સમુટ્ઠાનસીસં, સેસાનિ તેન સદિસાનિ.

આવસથેન સદ્ધિન્તિ આવસથસદ્દેન સદ્ધિં.

એળકલોમસમુટ્ઠાનવણ્ણના

૨૬૩. ‘‘એળકલોમા’’તિ ઇદં એળકલોમસમુટ્ઠાનં નામ એકં સમુટ્ઠાનસીસં. ઇતોતિ યથાવુત્તતો. પાળિન્તિ માતિકાપાળિં. વિરજ્ઝિત્વાતિ પુબ્બાપરતો વિરાધેત્વા. યથાતિ યેનાકારેન. પનસદ્દો અનુગ્ગહત્થો. કિઞ્ચાપિ લિખન્તિ, પન તથાપીતિ યોજના. એવન્તિ તથાકારેન. અત્થાનુક્કમોતિ અત્થસ્સ અનુક્કમો.

‘‘અભિક્ખુકાવા સેન ચા’’તિ એતં વચનં વુત્તન્તિ સમ્બન્ધો. ‘‘અભિક્ખુકે આવાસે વસ્સં વસેય્યા’’તિ (પાચિ. ૧૦૪૭) ઇદં વચનં સન્ધાયાતિ સમ્બન્ધો. ‘‘ભિક્ખુની’’તિઆદિના વુત્તાનીતિ સમ્બન્ધો. આદિસદ્દેન ‘‘સિક્ખમાના ચ સામણેરી ગિહિનિયા’’તિ પાઠં સઙ્ગણ્હાતિ.

પદસોધમ્મસમુટ્ઠાનવણ્ણના

૨૬૪. પદન્તિ ઇદં પદસોધમ્મસમુટ્ઠાનં નામ એકં સમુટ્ઠાનસીસં, સેસાનિ તેન સદિસાનિ. ‘‘તથા અત્થઙ્ગતેન ચા’’તિ એતં વચનં વુત્તન્તિ સમ્બન્ધો. ‘‘અત્થઙ્ગતે સૂરિયે ઓવદેય્યા’’તિ (પાચિ. ૧૫૪-૧૫૫) ઇદં વચનં સન્ધાયાતિ સમ્બન્ધો. અનોકાસો ચ…પે… સન્ધાય વુત્તન્તિ (પાચિ. ૧૨૧૯-૧૨૨૧) એત્થાપિ એસેવ નયો.

અદ્ધાનસમુટ્ઠાનવણ્ણના

૨૬૫. અદ્ધાનન્તિ ઇદં અદ્ધાનસમુટ્ઠાનં નામ એકં સમુટ્ઠાનસીસં, સેસાનિ તેન સદિસાનિ.

થેય્યસત્થસમુટ્ઠાનવણ્ણના

૨૬૬. થેય્યસત્થન્તિ ઇદં થેય્યસત્થસમુટ્ઠાનં નામ એકં સમુટ્ઠાનસીસં, સેસાનિ તેન સદિસાનિ. ‘‘બ્યૂહેન સત્તમા’’તિ ઇદં વચનં વુત્તન્તિ યોજના. તદનન્તરમેવાતિ તસ્સ સિક્ખાપદસ્સ અનન્તરમેવ, ‘‘આગત’’ઇતિ સમ્બન્ધો.

ધમ્મદેસનાસમુટ્ઠાનવણ્ણના

૨૬૭. ધમ્મદેસનાસમુટ્ઠાને સમુટ્ઠાનસીસં નત્થિ, સબ્બાનિ એકદસ સિક્ખાપદાનિ સમ્પિણ્ડેત્વા ધમ્મદેસનાસમુટ્ઠાનાનીતિ વુત્તાનિ. એવન્તિઆદિ નિગમનં. તેસન્તિ તેસં સિક્ખાપદાનં. સમ્ભિન્નસમુટ્ઠાનન્તિ સંસગ્ગસમુટ્ઠાનં. તિવિધન્તિ ભૂતારોચનચોરિવુટ્ઠાપનઅનનુઞ્ઞાતસમુટ્ઠાનવસેન તિપ્પકારં. તન્તિ નિયતસમુટ્ઠાનં, હોતીતિ સમ્બન્ધો. પુન તન્તિ નિયતસમુટ્ઠાનં, દસ્સેતુન્તિ સમ્બન્ધો. પુન તન્તિ વચનં. નેત્તિધમ્માનુલોમિકન્તિ એત્થ કાયવાચં નેતિ વિનેતીતિ નેત્તિ, કાયવાચં નેતિ વિનેતિ એત્થ, એતાયાતિ વા નેત્તિ. ધમ્મોતિ પાળિ. સા હિ યસ્મા અત્થં ધારેતિ, તસ્મા ધમ્મોતિ વુચ્ચતિ. નેત્તિયેવ ધમ્મો નેત્તિધમ્મો, તસ્સ અનુલોમિકં નેત્તિધમ્માનુલોમિકં. તેન વુત્તં ‘‘વિનયપાળિધમ્મસ્સ અનુલોમ’’ન્તિ.

ઇતિ સમુટ્ઠાનસીસવણ્ણનાય યોજના સમત્તા.