મહાસઙ્ગામં

વોહરન્તેન જાનિતબ્બાદિવણ્ણના

૩૬૮-૭૪. મહાસઙ્ગામે એતેનેવ નયેન વેદિતબ્બન્તિ સમ્બન્ધો. વત્થુસઙ્કમનાકારં દસ્સેત્વા અવજાનનપટિજાનનાકારં દસ્સેન્તો આહ ‘‘યો પના’’તિઆદિ. યો પન વદતીતિ સમ્બન્ધો. એસેવાતિ એસો એવ, અવજાનનપટિજાનનભિક્ખૂતિ અત્થો.

૩૭૫. નીલાદિવણ્ણાવણ્ણવસેનાતિ નીલાદિવણ્ણવસેન ચ આરોગ્યત્થાદિઅવણ્ણવસેન ચ. સઞ્ચરિત્તં યસ્મા અનેન સિક્ખાપદેન ધનં અનુપદીયતિ, તસ્મા ધનમનુપ્પદાનન્તિ વુચ્ચતિ. પુબ્બપયોગોતિ પુબ્બે પયુજ્જિતબ્બો.

અગતિઅગન્તબ્બવણ્ણના

૩૭૯. બહુજનઅહિતાય પટિપન્નો હોતીતિ પાળિં વિત્થારેન્તો આહ ‘‘વિનયધરેન હી’’તિઆદિ. તત્થ વિનયધરેનાતિ અનુવિજ્જકેન, વિનિચ્છિતેતિ સમ્બન્ધો. ઓવાદૂપજીવિનિયોતિ ભિક્ખૂનં ઓવાદં ઉપનિસ્સાય જીવિનિયો. ઉપાસકાપીતિ રતનત્તયં પટિસ્સરણન્તિ ઉપાસકાપિ. દાયકાપીતિ ભિક્ખૂનં પચ્ચયદાયકાપિ. તેસન્તિ ઉપાસકાદીનં. તથેવાતિ યથા ઉપાસકાદયો દ્વિધા ભિજ્જન્તિ, તથેવ. તતોતિ આરક્ખદેવતાહિ પરન્તિ સમ્બન્ધો. તેનાતિ દ્વિધાકારણેન.

૩૮૨. ગહનનિસ્સિતોતિ એત્થ ગહનસદ્દો દિટ્ઠિપરિયાયોતિ આહ ‘‘મિચ્છાદિટ્ઠિઅન્તગ્ગાહિકદિટ્ઠિસઙ્ખાતં ગહન’’ન્તિ.

૩૯૩. તસ્સ અવજાનન્તોતિ એત્થ ‘‘તસ્સા’’તિ પદં ‘‘વચન’’ન્તિ પાઠસેસેન સમ્બન્ધિતબ્બન્તિ આહ ‘‘તસ્સ વચન’’ન્તિ. તસ્સાતિ નવકસ્સ. તન્તિ નવકં.

૩૯૪. ‘‘યંઅત્થાયા’’તિ એસો સદ્દો સમાસોતિ આહ ‘‘યદત્થાયા’’તિ. ‘‘તં અત્થ’’ન્તિ એસો સદ્દો લિઙ્ગવિપલ્લાસોતિ આહ ‘‘સો અત્થો’’તિ. અત્થસદ્દો હિ પુલ્લિઙ્ગો, પાળિયં ન પરિહાપેતબ્બન્તિ એત્થાપિ લિઙ્ગવિપલ્લાસો વેદિતબ્બો. સબ્બત્થાતિ સબ્બસ્મિં મહાસઙ્ગામે.

ઇતિ મહાસઙ્ગામવણ્ણનાય યોજના સમત્તા.