૭. આરઞ્ઞિકવત્તકથા

૩૬૮. આરઞ્ઞિકવત્તે એવં વિનિચ્છયો વેદિતબ્બોતિ યોજના. સેનાસના ઓતરિતબ્બન્તિ એત્થ અરઞ્ઞે રુક્ખમૂલાદીસુ નિસિન્નસ્સ વિહારાભાવતો સેનાસનં નામ વસનટ્ઠાનં સન્ધાય વુત્તન્તિ આહ ‘‘વસનટ્ઠાનતો નિક્ખમિતબ્બ’’ન્તિ.

પત્તં થવિકાય પક્ખિપિત્વાતિ એત્થ કથં પત્તો થવિકાય પક્ખિપિતબ્બોતિ આહ ‘‘સચે બહી’’તિઆદિ. તત્થ પત્તો પક્ખિપિતબ્બોતિ સમ્બન્ધો. ધોવિત્વા કત્વાતિ પદેસુ ‘‘પત્તં વોદક’’ન્તિ વિભત્તિપરિણામં કત્વા સમ્બન્ધિતબ્બં. તમ્પીતિ વેળુનાળિકમ્પિ. સમીપેતિ આરઞ્ઞકસ્સ સેનાસનસ્સ સમીપે. યથા ચ આરઞ્ઞકસ્સ અરણિસહિતં ઇચ્છિતબ્બં, એવં કન્તારં પટિપન્નસ્સાપિ અરણિસહિતં ઇચ્છિતબ્બન્તિ યોજના. ગણવાસિનોતિ ગણેન સહ વાસિનો, આરઞ્ઞકસ્સાતિ સમ્બન્ધો. તેનાતિ અરણિસહિતેન. ‘‘નક્ખત્તાનેવ નક્ખત્તપદાની’’તિ ઇમિના અસ્સયુજાદિનક્ખત્તાનેવ (અભિધાનપ્પદીપિકાયં ૫૮-૬૦ ગાથાસુ) દિસાભાગજાનનસ્સ, ચ સમયજાનનસ્સ ચ કારણત્તા નક્ખત્તપદાનિ નામાતિ દસ્સેતિ.