૨૧૬. છિન્નકચીવરાનુજાનનકથા

૩૪૫. દીઘમરિયાદબદ્ધન્તિ દીઘેન મરિયાદેન બદ્ધં. ચતુક્કસણ્ઠાનન્તિ ચતુન્નં મગ્ગાનં સમોધાનસણ્ઠાનં. ઉસ્સહસિ ત્વન્તિ એત્થ ઉપુબ્બો સહધાતુ સમત્થત્થોતિ આહ ‘‘સક્કોસિ ત્વ’’ન્તિ. પપુબ્બો પન અભિભવનત્થો હોતિ ‘‘પસહતી’’તિઆદીસુ. યો નામાતિ યો આનન્દો આજાનિસ્સતિ નામ, સો આનન્દો પણ્ડિતોતિ યોજના. ‘‘કુસી’’તિ એતં નામં અધિવચનન્તિ યોજના. અનુવાતાદીનન્તિ આદિસદ્દેન પરિભણ્ડાદીનિ સઙ્ગણ્હાતિ. ‘‘અડ્ઢકુસી’’તિ એતન્તિ યોજના.

ગીવેય્યકન્તિ એત્થ ગીવાયં સુત્તસંસિબ્બિતં ગીવેય્યકન્તિ વચનત્થં દસ્સેન્તો આહ ‘‘ગીવાવેઠનટ્ઠાને’’તિઆદિ. ‘‘આગન્તુકપટ્ટ’’ન્તિ ઇમિના એય્યકપચ્ચયસ્સ સરૂપં દસ્સેતિ. એસેવ નયો જઙ્ઘેય્યકન્તિ એત્થાપિ. એતં નામન્તિ ‘‘ગીવેય્યકં, જઙ્ઘેય્યક’’ન્તિ એતં નામં. ઇતીતિ એવં. એતન્તિ ‘‘અનુવિવટ્ટ’’ન્તિઆદિ એતં. ‘‘અનુવિવટ્ટ’’ન્તિ એતં નામન્તિ યોજના. વિવટ્ટસ્સાતિ મજ્ઝિમખણ્ડકસ્સ. બાહન્તન્તિ એત્થ બાહાય ઉપરિ ઠપિતા અન્તા બાહન્તાતિ વચનત્થં દસ્સેન્તો આહ ‘‘બાહાયા’’તિઆદિ. તેસન્તિ ઉભિન્નમન્તાનં. એતન્તિ ‘‘બાહન્ત’’ન્તિ એતં.