૨૦૯. સમત્તિંસવિરેચનકથા

૩૩૬. કિંપનાતિ એત્થ કિંસદ્દો અનિયમત્થો. લૂખો કિં, ન લૂખો કિન્તિ હિ અત્થો. ‘‘સિનેહપાનં પન તેમેતી’’તિ ચ ‘‘કરોતી’’તિ ચ સમ્બન્ધો. સબ્બત્થાતિ સકલકાયે. સિરાતિ કણ્ડરા. અયન્તિ જીવકો. ઓળારિકદોસહરણત્થન્તિ ઓળારિકસ્સ દોસસ્સ અપનયનત્થં. પકતત્તેતિ પકતિસઙ્ખાતે સભાવે સતીતિ સમ્બન્ધો. ભગવા ભન્તેતિ યોજના. કુતોતિ કસ્સ સન્તિકા. વટ્ટતિ નુ ખોતિ ચિન્તેસીતિ યોજના. તતોતિ ચિન્તનતો. સોણોતિ કોળિવીસસોણો, ભુઞ્જતીતિ સમ્બન્ધો. તતોતિ સોણસ્સ સન્તિકા. તસ્સાતિ સોણસ્સ. સોતિ સોણો. થેરસ્સાતિ મોગ્ગલ્લાનત્થેરસ્સ. ઇદં ‘‘પત્ત’’ન્તિપદે સામી, ‘‘અદાસી’’તિ પદે સમ્પદાનં. અઞ્ઞં પિણ્ડપાતન્તિ સમ્બન્ધો.

રાજાપિ ખો ભુઞ્જિતુકામો અહોસીતિ સમ્બન્ધો. યઞ્ચ સુજાતા અદાસિ, યઞ્ચ પરિનિબ્બાનકાલે ચુન્દો કમ્મારપુત્તો, ભાજનગતેસુ દ્વીસુયેવ તેસુ પિણ્ડપાતેસુ દેવતા ઓજં પક્ખિપન્તીતિ યોજના. અઞ્ઞેસૂતિ દ્વીહિ પિણ્ડપાતેહિ અઞ્ઞેસુ. ઇચ્છન્તિ રુચિં. સોતિ બિમ્બિસારો રાજા. તવેવાતિ તુય્હમેવ. તન્તિ ભગવતો વચનં. રાજા અકાસીતિ સમ્બન્ધો. તેતિ અસીતિકુલપુત્તસહસ્સા. એતદત્થમેવાતિ સોણસ્સ અરહત્તે પતિટ્ઠાપનત્થમેવ, ન રઞ્ઞો અનુગ્ગહત્થન્તિ અધિપ્પાયો.