૧૭૦. યાગુમધુગોળકાદિકથા

૨૮૨. એકકોતિ એત્થ એકતો અસહાયત્થે કપચ્ચયોતિ આહ ‘‘નત્થિ મે દુતિયો’’તિ. સોતિ બ્રાહ્મણો. વયં કત્વાતિ પરિબ્બયં કત્વા, પટિયાદાપેસિ કિરાતિ યોજના. અનુમોદનગાથાયાતિ અનુમોદનપકાસકાય ગાથાય. ‘‘પત્થયતં ઇચ્છત’’ન્તિ પદાનં અલમત્થપયોગે સમ્પદાનત્તા વુત્તં ‘‘અલમેવ દાતુન્તિ ઇમિના સમ્બન્ધો’’તિ. સોયેવ ગહેતબ્બોતિ ‘‘દાતુ’’ન્તિભાવસ્સ કત્તુભાવેન સો એવ પાઠો ગહેતબ્બોતિ અત્થો.

૨૮૩. યા યાગુ પવારણં જનેતિ, સા યાગુ ભોજ્જયાગુ નામાતિ યોજના. યન્તિ કાલં. ‘‘આદિં કત્વા’’તિ ઇમિના યદગ્ગેનાતિ એત્થ અગ્ગસદ્દો આદ્યત્થો કિરિયાવિસેસનત્થે કરણવચનન્તિ દસ્સેતિ. ‘‘સગ્ગનિબ્બત્તકપુઞ્ઞ’’ન્તિ ઇમિના સગ્ગાતિ એત્થ ફલૂપચારં દસ્સેતિ. સોતિ ગુળો.

૨૮૪. તથારૂપેનાતિ તથાસભાવેન. ગુળસ્સ અનુરૂપસભાવેનાતિ અત્થો.