૧૧૬. વસ્સં અનુપગન્તબ્બટ્ઠાનકથા

૨૦૪. રુક્ખસુસીરેયેવાતિ રુક્ખસ્સ વિવરે એવ. વિવરઞ્હિ સુ સં ઇરતિ ગચ્છતીતિ સુસીરોતિ વુચ્ચતિ. પદરચ્છદનન્તિ ફલકેહિ છાદિતં. પવિસનદ્વારન્તિ પવિસનનિક્ખમનદ્વારં. પવિસનઞ્ચ નિક્ખમનઞ્ચ પવિસનન્તિ વિરૂપેકસેસેન કાતબ્બં. ખાણુમત્થકેતિ ખાણુનો ઉપરિ. વિટભીતિ વિટં અઞ્ઞમઞ્ઞવેધનં અપતિ ગચ્છતીતિ વિટપો, પકારસ્સ ભકારં, ઇત્થિલિઙ્ગજોતકઈપચ્ચયઞ્ચ કત્વા વિટભીતિ વુચ્ચતિ. તત્થાતિ અટ્ટકે. યસ્સાતિ ભિક્ખુનો, નત્થીતિ સમ્બન્ધો. પઞ્ચન્નં છદનાનન્તિ તિણપણ્ણઇટ્ઠકાસિલાસુધાસઙ્ખાતાનં (ચૂળવ. ૩૦૩) પઞ્ચન્નં છદનાનં. ઇદઞ્ચ યેભુય્યવસેન વુત્તં પદરચ્છદનાદીનમ્પિ ગહિતત્તા. દ્વારબન્ધનન્તિ દ્વારેન બન્ધિતબ્બં. છવકુટિકાતિ છવાનં સયનટ્ઠાને સુસાને કતા કુટિકા છવકુટિકાતિ વુચ્ચતિ. ટઙ્કિતમઞ્ચાદીતિઆદિસદ્દેન ટઙ્કિતપીઠં સઙ્ગણ્હાતિ. તત્થાતિ છવકુટિયં. અઞ્ઞં કુટિકન્તિ છવકુટિતો અઞ્ઞં કુટિકં. આવરણન્તિ ભિત્તિં. દ્વારન્તિ પવિસનનિક્ખમનદ્વારં. છત્તકુટિકા નામેસાતિ એસા છત્તેન કતા કુટિકા નામ. મહન્તેન કપલ્લેન કુટિકં કત્વાતિ સમ્બન્ધો.