૧૧૨. પહિતેયેવઅનુજાનનકથા

૧૯૯. ભિક્ખુગતિકોતિ ભિક્ખુ એવ ગતિ પતિટ્ઠા એતસ્સાતિ ભિક્ખુગતિકોતિ વુત્તે ભિક્ખુનિસ્સિતકો પુરિસોતિ આહ ‘‘ભિક્ખૂહિ સદ્ધિં વસનકપુરિસો’’તિ. પલુજ્જતીતિ વિનસ્સતિ. ભણ્ડં છેદાપિતન્તિ એત્થ ભણ્ડસદ્દો પરિક્ખારત્થો એવ, ન મૂલધનત્થોતિ આહ ‘‘દબ્બસમ્ભારભણ્ડ’’ન્તિ. છેદાપિતન્તિ ચુરાદિગણિકધાતું ‘‘છિન્દાપિત’’ન્તિ રુધાદિગણિકધાતુયા વણ્ણેતિ. દજ્જાહન્તિ એકારલોપસન્ધીતિ આહ ‘‘દજ્જે અહ’’ન્તિ. ‘‘દજ્જેહ’’ન્તિપિ પાઠો. એવઞ્હિ સતિ અકારલોપસન્ધિ. દજ્જેતિ દદેય્યં, દદામિ વા. સઙ્ઘકરણીયેનાતિ સઙ્ઘસ્સ કાતબ્બેન કિચ્ચેન. તમત્થં દસ્સેન્તો આહ ‘‘યંકિઞ્ચી’’તિઆદિ. તત્થ યંકિઞ્ચિ કાતબ્બન્તિ યોજના. ચેતિયછત્તવેદિકાદીસૂતિ ચેતિયસ્સ છત્તે ચ વેદિકાય ચ. આદિસદ્દેન સુધાલિમ્પાદયો સઙ્ગણ્હાતિ. તસ્સાતિ સઙ્ઘકરણીયસ્સ. નિપ્ફાદનત્થં ગન્તબ્બન્તિ સમ્બન્ધો.

એત્થાતિ વસ્સૂપનાયિકક્ખન્ધકે. ‘‘અનિમન્તિતેના’’તિ પદં ‘‘ગન્તુ’’ન્તિ પદે ભાવકત્તા. ગન્તુન્તિ ગમિતું, ગમનં વા ‘‘ન વટ્ટતી’’તિ પદે કત્તા. પઠમંયેવાતિ ધમ્મસ્સવનતો પઠમમેવ. સન્નિપતિતબ્બં ઇતિ કતિકા કતા હોતીતિ યોજના. ભણ્ડકન્તિ ચીવરાદિભણ્ડકં. ગન્તું ન વટ્ટતીતિ સયમેવ ગન્તું ન વટ્ટતીતિ અત્થો દટ્ઠબ્બો. તેન વુત્તં ‘‘સચે પના’’તિઆદિ. તત્થાતિ તં વિહારં. ‘‘વટ્ટતી’’તિ ઇમિના વસ્સચ્છેદો ચ આપત્તિ ચ ન હોતીતિ દસ્સેતિ. અત્થાયપીતિ પિસદ્દેન ‘‘ભણ્ડકં ધોવિસ્સામી’’તિ અત્થં અપેક્ખતિ. નન્તિ અન્તેવાસિકં. વટ્ટતીતિ આચરિયસ્સ આણાય સત્તાહે અનતિક્કન્તે વટ્ટતિ, વસ્સચ્છેદો ચ આપત્તિ ચ ન હોતિ. સત્તાહે અતિક્કન્તે વસ્સચ્છેદોવ હોતિ, ન આપત્તીતિ અધિપ્પાયો.