૯૫. અનાપત્તિપન્નરસકાદિકથા

૧૭૨. તે ન જાનિંસૂતિ એત્થ જાનનાકારદસ્સનત્થં ‘‘સીમં ઓક્કન્તાતિ વા ઓક્કમન્તીતિ વા’’તિ વુત્તં. ઓક્કન્તાતિ વાતિ પવિસિત્થ ઇતિ વા. તેસન્તિ ચતુન્નં વા અતિરેકાનં વા ભિક્ખૂનં. વગ્ગા સમગ્ગસઞ્ઞિનોતિ એત્થ કસ્મા વગ્ગા, કસ્મા સમગ્ગસઞ્ઞિનોતિ આહ ‘‘તેસ’’ન્તિઆદિ. તત્થ તેસન્તિ અઞ્ઞેસં ભિક્ખૂનં. સીમં ઓક્કન્તત્તાતિ સીમં પવિસિતત્તા, વગ્ગા હુત્વાતિ સમ્બન્ધો. સમગ્ગો ઇતિ સઞ્ઞા સમગ્ગસઞ્ઞા, સા એતેસમત્થીતિ સમગ્ગસઞ્ઞિનો.

૧૭૫. કુક્કુચ્ચપકતાતિ પદસ્સ ‘‘ઇચ્છાપકતો’’તિ પદેન સમાનભાવં દસ્સેતું વુત્તં ‘‘યથા’’તિઆદિ. પુબ્બભાગેતિ ઉપોસથકમ્મતો પુબ્બભાગે. સન્નિટ્ઠાનં કત્વાપીતિ કપ્પતેવાતિ સન્નિટ્ઠાનં કત્વાપિ. ‘‘અભિભૂતા’’તિ ઇમિના પકતાતિ એત્થ પપુબ્બકરધાતુયા ઉપસગ્ગવસેન અભિભવનત્થં દસ્સેતિ.

૧૭૬. યથા હેટ્ઠા વગ્ગાવગ્ગસઞ્ઞીપન્નરસકાદીસુ દુક્કટં વુત્તં, એવમકત્વા કસ્મા ‘‘થુલ્લચ્ચય’’ન્તિ આહ ‘‘અકુસલબલવતાયા’’તિ.