૮૭. પારિસુદ્ધિદાનકથા

૧૬૪. યેન કેનચિ અઙ્ગપચ્ચઙ્ગેન વિઞ્ઞાપેતીતિ પટિવચનં નિચ્છારેતુમસક્કોન્તો યેન કેનચિ અઙ્ગપચ્ચઙ્ગેન વિઞ્ઞાપેતિ. ઉભયથાતિ ઉભયેહિ કાયવાચાસઙ્ખાતેહિ આકારેહિ. કાયવાચાહિ વિઞ્ઞાપેતીતિ સમ્બન્ધો. સબ્બેતિ અખિલા ગિલાના. હત્થપાસેતિ સઙ્ઘસ્સ હત્થપાસમ્હિ. સચે દૂરે હોન્તીતિ સચે બહૂ ગિલાના અઞ્ઞમઞ્ઞં દૂરે હોન્તિ. તં દિવસન્તિ તસ્મિં સઙ્ઘઅપ્પહોનકદિવસે.

તત્થેવ પક્કમતીતિ એત્થ નિસ્સક્કત્થે થપચ્ચયોતિ આહ ‘‘તતોવા’’તિ, પારિસુદ્ધિહારટ્ઠાનતો એવાતિ અત્થો. ‘‘ગચ્છતી’’તિ ઇમિના કમુધાતુયા પદવિક્ખેપત્થં દસ્સેતિ, ‘‘કત્થચી’’તિ ઇમિના તસ્સ કમ્મં. સામણેરો પટિજાનાતીતિઆદીસુ પટિજાનનાકારત્થસ્સ ઇતિસદ્દસ્સ લોપભાવં દસ્સેન્તો આહ ‘‘સામણેરો અહ’’ન્તિ એવં પટિજાનાતી’’તિઆદિ. ભૂતંયેવાતિ વિજ્જમાનંયેવ. સબ્બત્થાતિ સબ્બેસુ ‘‘સિક્ખં પચ્ચક્ખાતકો પટિજાનાતી’’તિઆદીસુ.

સબ્બન્તિમેન પરિચ્છેદેન ચતુન્નં ભિક્ખૂનન્તિ સમ્બન્ધો. સબ્બત્થાતિ સબ્બેસુ ‘‘સઙ્ઘપ્પત્તો વિબ્ભમતી’’તિઆદીસુ. એત્થાતિ પારિસુદ્ધિહરણે. બહૂનમ્પીતિ એત્થ પિસદ્દેન એકેન એકસ્સાપિ, બહૂહિ એકસ્સાપિ, બહૂહિ બહૂનમ્પિ આહટા પારિસુદ્ધિ આહટાવ હોતીતિ દસ્સેતિ. સોતિ પારિસુદ્ધિહારકો ભિક્ખુ. યેસન્તિ ભિક્ખૂનં. તસ્સેવાતિ પારિસુદ્ધિહારકસ્સેવ. ઇતરા પનાતિ ઇતરેસં પારિસુદ્ધિ પન. બિળાલસઙ્ખલિકાતિ એત્થ બિળાલોતિ આખુભુજો. સો હિ બિળાસયં આખું ગણ્હિતું અલતિ સમત્થેતીતિ બિળાલોતિ વુચ્ચતિ. સઙ્ખલિકાતિ એતં સત્તાનં બન્ધનૂપકરણવિસેસસ્સ નામં. બિળાલસ્સ સઙ્ખલિકા તેન સમ્બન્ધસમ્બન્ધિભાવેન સમ્બન્ધત્તાતિ બિળાલસઙ્ખલિકા. ઇદં ઉપલક્ખણમત્તં યેસં કેસઞ્ચિ સઙ્ખલિકાય ગહેતબ્બત્તા. તાય સદિસા બિળાલસઙ્ખલિકા પારિસુદ્ધીતિ અત્થો. ઇદં પનેત્થ ઓપમ્મસંસન્દનં – યથા સઙ્ખલિકાય પઠમં વલયં દુતિયંયેવ વલયં પાપુણાતિ, ન તતિયં, એવમેવ પઠમં દિન્ના પારિસુદ્ધિ દુતિયમેવ પાપુણાતિ, ન તતિયન્તિ.

આગન્ત્વાતિ સઙ્ઘસ્સ હત્થપાસં આગન્ત્વા. પાળિયં સુત્તો ન આરોચેતીતિઆદીસુ હેત્વત્થે પચ્ચત્તવચનં. સુત્તેન નારોચેતીતિ હિ અત્થો. પારિસુદ્ધિહારકસ્સ અનાપત્તીતિ એત્થ આપત્તીતિ અન્વયત્થં અત્થાપત્તિતો દસ્સેન્તો આહ ‘‘સચે…પે… આપજ્જતી’’તિ. અસ્સાતિ ભિક્ખુસ્સ. ઉભિન્નમ્પીતિ પારિસુદ્ધિદાયકસ્સ, તંહારકસ્સ ચાતિ ઉભિન્નમ્પિ.