૨૭૫. પાલિલેય્યકગમનકથા

૪૬૭. પાલિલેય્યકન્તિ પલિલવનસણ્ડે વસન્તહત્થિનાગં. ‘‘હત્થી’’તિ ચ ‘‘નાગો’’તિ ચ દ્વિન્નં સદ્દાનં પરિયાયભાવેન વુત્તત્તા અધિકત્થોતિ આહ ‘‘મહાહત્થી’’તિ. પુરતો પુરતો ગચ્છન્તેહિ તેહિ હત્થિઆદીહિ છિન્નગ્ગાનીતિ યોજના. ઓભગ્ગોભગ્ગન્તિ ભઞ્જિત્વા અધોપાતિતં ઓભગ્ગન્તિ દસ્સેન્તો આહ ‘‘ભઞ્જિત્વા ભઞ્જિત્વા પાતિત’’ન્તિ. ‘‘ઉચ્ચટ્ઠાનતો’’તિ ઇમિના અવત્યૂપસગ્ગસ્સ અધોત્થં નયેન દસ્સેતિ. એતસ્સાતિ હત્થિનાગસ્સ. તેતિ હત્થિઆદયો. તેહીતિ હત્થિઆદીહિ. પિવન્તેહિ તેહીતિ યોજના. કદ્દમોદકાનીતિ કદ્દમેન સંસટ્ઠાનિ ઉદકાનિ.

ઈસાદન્તસ્સાતિ એત્થ ઈસાય સદિસો દન્તો ઇમસ્સાતિ ઈસાદન્તોતિ દસ્સેન્તો આહ ‘‘રથઈસાસદિસદન્તસ્સા’’તિ. ‘‘રથઈસા’’તિ ઇમિના નઙ્ગલઈસં નિવત્તેતિ. યદેકોતિ યં એકો. યંસદ્દો કારણત્થોતિ આહ ‘‘યસ્મા’’તિ. અસ્સ નાગસ્સાતિ હત્થિનાગસ્સ. નાગેનાતિ બુદ્ધનાગેન.

યથાભિરન્તન્તિ એત્થ કિત્તકં કાલં રમતીતિ આહ ‘‘તેમાસ’’ન્તિ. એત્તાવતાતિ એત્તકેન તેમાસવિહરણેન. પત્થટા અહોસીતિ સમ્બન્ધો. સબ્બત્થાતિ સબ્બસ્મિં જમ્બુદીપતલે.

‘‘કોસમ્બિનિવાસિનો’’તિ ઇમિના કોસમ્બિયં નિવસન્તીતિ કોસમ્બકાતિ વચનત્થં દસ્સેતિ.