૬૩. ઉપસમ્પદાવિધિકથા

૧૨૬. તં ઉપજ્ઝન્તિ તં ઉપજ્ઝાયં. ‘‘ઉપજ્ઝા’’તિ ચ ‘‘ઉપજ્ઝાયો’’તિ ચ હિ અત્થતો એકં, બ્યઞ્જનમેવ નાનં યથા ‘‘સભા સભાય’’ન્તિ. એત્થ ઉપજ્ઝાસદ્દો રાજાદિગણો (રુપસિદ્ધિ ૫૯૯ સુત્તે; સદ્દનીતિ ૧૧૪૦ સુત્તે), ઉપજ્ઝાયસદ્દો પુરિસાદિગણો. સભાસદ્દો ઇત્થિલિઙ્ગો, સભાયસદ્દો પુલ્લિઙ્ગો વા નપુંસકલિઙ્ગો વા. ‘‘વિત્થાયન્તી’’તિ સદ્દો નામધાતૂતિ આહ ‘‘વિત્થદ્ધગત્તા હોન્તી’’તિ. વિત્થસદ્દો હિ દબ્બવાચકત્તા નામસદ્દો, વિકારેન થદ્ધો ગત્તો એતેસન્તિ વિત્થા, દ્ધકારસ્સ લોપં કત્વા, તતો આયપચ્ચયો હોતિ. યન્તિ યં અન્તરાયજાતં. તવ સરીરેતિ તુય્હં કાયે. ‘‘નિબ્બત્ત’’ન્તિ ઇમિના ‘‘જાત’’ન્તિ એત્થ જનધાતુયા જનનત્થં દસ્સેતિ, ‘‘વિજ્જમાન’’ન્તિ ઇમિના જનીધાતુયા પાતુભાવત્થં દસ્સેતિ. સન્તન્તિ સંવિજ્જમાનં. ઇતિઆદિ કથેતબ્બન્તિ યોજના.