૫૮. અલજ્જીનિસ્સયવત્થુકથા

૧૨૦. ‘‘અલજ્જીનં ઓવાદ’’ન્તિ પાઠસેસેન યોજિતે સામ્યત્થે સામિવચનમ્પિ યુજ્જતેવ. તં નયં અદસ્સેત્વા ‘‘ઉપયોગત્થે સામિવચન’’ન્તિ વુત્તં. ‘‘ભિક્ખૂહિ સભાગત’’ન્તિ ઇમિના ભિક્ખૂહિ સમાનો સીલાદિગુણસઙ્ખાતો ભાગો ઇમસ્સાતિ ભિક્ખુસભાગો, તસ્સ ભાવો ભિક્ખુસભાગતન્તિ વચનત્થં દસ્સેતિ. ‘‘લજ્જિભાવ’’ન્તિ ઇમિના ભાવપચ્ચયસ્સ સરૂપં દસ્સેતિ. નવટ્ઠાનન્તિ અભિનવટ્ઠાનં. ગતેન ભિક્ખુનાતિ સમ્બન્ધો.

થેરોતિ નિસ્સયદાયકો થેરો. ગહેતુકામોતિ નિસ્સયં ગહેતુકામો. આચારન્તિ નિસ્સયપટિપન્નસ્સ આચારં. તદહેવાતિ તસ્મિં ગતઅહનિ એવ. આભોગસ્સ કતત્તા, અરુણુગ્ગમનસ્સ ચ અજાનનત્તા વુત્તં ‘‘અનાપત્તી’’તિ. અરુણુગ્ગમનં અજાનન્તોપિ આભોગસ્સ અકતત્તા વુત્તં ‘‘અરુણુગ્ગમને દુક્કટ’’ન્તિ. ‘‘દ્વે તીણિ દિવસાની’’તિ પદેન ચતુ પઞ્ચ છ દિવસાનિપિ ગહેતબ્બાનિ લક્ખણહારનયેન અનિસ્સિતેન વસિતબ્બભાવેન સમાનફલત્તા. તેનાહ ‘‘સત્તાહં વસિસ્સામી’’તિ. લદ્ધપરિહારોતિ લદ્ધો પરિહારો આપત્તિઅપનયનં યેનાતિ લદ્ધપરિહારો.