૫૬. અપત્તકાદિવત્થુકથા

૧૧૮. યો પિણ્ડો હત્થેસુ લબ્ભતીતિ યોજના. તદત્થાયાતિ તસ્સ પિણ્ડસ્સ અત્થાય. સેય્યથાપિ તિત્થિયાતિ એત્થ સેય્યથાપિસદ્દો ઉપમત્થો, તિત્થિયસદ્દો આજીવકનામકે તિત્થિયે હોતીતિ દસ્સેન્તો આહ ‘‘યથાપિ આજીવકનામકા તિત્થિયા’’તિ. તસ્મા આજીવકસઙ્ખાતે તિત્થિયે ઉપમં કત્વા ઉજ્ઝાયન્તીતિ આહ ‘‘સૂપબ્યઞ્જનેહી’’તિઆદિ. હીતિ સચ્ચં, યસ્મા વા. તેતિ આજીવકા. કમ્મં પન ન કુપ્પતીતિ પત્તચીવરેસુ અસન્તેસુપિ કમ્મવાચાય ‘‘પરિપુણ્ણસ્સ પત્તચીવર’’ન્તિ પરિકિત્તિતત્તા કમ્મં ન કુપ્પતીતિ અધિપ્પાયો.

યાચિતકેનાતિ એત્થ યાચિતો હુત્વા ગહિતો યાચિતકોતિ દસ્સેન્તો આહ ‘‘યાચિત્વા ગહિતેના’’તિ. ‘‘ઈદિસેન હી’’તિઆદિના દોસં દસ્સેતિ. તસ્માતિ યસ્મા આપત્તિ હોતિ, તસ્મા. તસ્સાતિ ઉપસમ્પદાપેક્ખસ્સ. નિરપેક્ખેહિ આચરિયુપજ્ઝાયાદીહીતિ યોજના. નિસ્સજ્જિત્વાતિ બ્રહ્મદેય્યેન નિસ્સજ્જિત્વા. અનધિટ્ઠાનુપગાનં પત્તચીવરાનં અપત્તચીવરત્તા વુત્તં ‘‘અધિટ્ઠાનુપગં પત્તચીવર’’ન્તિ. પણ્ડુપલાસન્તિ સમણુદ્દેસભાવાપેક્ખં. સો હિ રૂળ્હિવસેન પણ્ડુપલાસોતિ વુચ્ચતિ. અથ વા યથા પણ્ડુપલાસો ન હરિતો, નાપિ સુક્ખો હોતિ, એવં સોપિ પબ્બજાપેક્ખો ન ગિહી હોતિ, નાપિ સામણેરો, તસ્મા સમણુદ્દેસભાવાપેક્ખો ‘‘પણ્ડુપલાસો’’તિ વુચ્ચતિ.

વસન્તસ્સ પણ્ડુપલાસસ્સાતિ સમ્બન્ધો. અનામટ્ઠપિણ્ડપાતન્તિ ભિક્ખૂહિ અનામસિતબ્બગ્ગં પિણ્ડપાતં. સામણેરભાગસમકોતિ સામણેરેહિ લદ્ધેન ભાગેન સમં પવત્તો. અસ્સાતિ પણ્ડુપલાસસ્સ. સામણેરસ્સ સબ્બં પટિજગ્ગનકમ્મં કાતું વટ્ટતિ વિય, અસ્સ કાતું વટ્ટતીતિ યોજના.