૫૫. અનુપજ્ઝાયકાદિવત્થુકથા

૧૧૭. તેન ખો પન સમયેનાતિ એત્થ તસદ્દસ્સ અનિયમનિદ્દેસભાવં દસ્સેન્તો આહ ‘‘યેન સમયેના’’તિ. સિક્ખાપદં અપઞ્ઞત્તં હોતીતિ ‘‘ન ભિક્ખવે અનુપજ્ઝાયકો ઉપસમ્પાદેતબ્બો’’તિ સિક્ખાપદં અપઞ્ઞત્તં હોતિ. ‘‘ઉપજ્ઝાયવિરહિત’’ન્તિ ઇમિના અનુપજ્ઝાયકન્તિ એત્થ અકારસ્સ વિરહત્થં દસ્સેતિ. ઉપજ્ઝાયવિરહિતં ઉપસમ્પદાપેક્ખન્તિ સમ્બન્ધો. ‘‘એવ’’ન્તિઆદિના દોસં દસ્સેતિ. ઉપજ્ઝં અગાહાપેત્વાતિ ‘‘ઉપજ્ઝાયો મે ભન્તે હોહી’’તિ (મહાવ. ૬૫; મહાવ. અટ્ઠ. ૬૪) ઉપજ્ઝં અગાહાપેત્વા. ઉપસમ્પાદેન્તસ્સ કારકસઙ્ઘસ્સાતિ યોજના. કમ્મં પનાતિ ઉપસમ્પદકમ્મં પન. ‘‘એસેવ નયો’’તિ ઇમિના ઉપસમ્પાદેન્તસ્સ આપત્તિ, કમ્મં પન ન કુપ્પતીતિ વચનં અતિદિસતિ.