૪૮. તિત્થિયપક્કન્તકકથા

૧૧૦. પક્કમતીતિ પક્કન્તો, ‘‘પવિટ્ઠો’’તિ ઇમિના કમુધાતુયા પદવિક્ખેપત્થં દસ્સેતિ, ઇચ્છાકન્તિઅત્થે નિવત્તેતિ. સોતિ તિત્થિયપક્કન્તકો. તત્રાતિ તિત્થિયપક્કન્તકે. ઉપસમ્પન્નો ભિક્ખુ ગચ્છતીતિ સમ્બન્ધો. તેસન્તિ તિત્થિયાનં. ‘‘તિત્થિયો ભવિસ્સામી’’તિ પુબ્બેવ લદ્ધિગહિતત્તા વુત્તં ‘‘લિઙ્ગે આદિન્નમત્તે’’તિ. કુસચીરાદીનીતિ એત્થ કુસો વુચ્ચતિ સલાકા. ચીરોતિ પન્તિ, આવલીતિ અત્થો. કુસે રજ્જુના આવુનિત્વા કતો ચીરો કુસચીરો, સો આદિ યેસં તાનીતિ કુસચીરાદીનિ. આદિસદ્દેન ફલકચીરાદયો સઙ્ગણ્હાતિ. કુસતિણેહિ કતો ચીરો કુસચીરોતિપિ વદન્તિ. નગ્ગોતિ અચેલકો. આજીવકોતિ અચેલકવતમાદાય જીવતીતિ આજીવકો. તેસન્તિ આજીવકાનં. ઓવદિતો હુત્વાતિ સમ્બન્ધો.

કિન્તિ કિં વતં. લુઞ્ચાપેતીતિ અપનયાપેતિ. મોરપિઞ્છાદીનીતિ એત્થ પિઞ્છં વુચ્ચતિ પક્ખો. સો હિ પિઞ્છતિ આકાસે ગચ્છતિ અનેનાતિ પિઞ્છન્તિ વુચ્ચતિ. પિછિ ગતિયન્તિ ધાતુપાઠો. મોરસ્સ પિઞ્છં મોરપિઞ્છં, તં આદિ યેસં તાનીતિ મોરપિઞ્છાદીનિ. આદિસદ્દેન ઉલૂકપિઞ્છાદયો સઙ્ગણ્હાતિ. યાવ ન સમ્પટિચ્છતીતિ યાવ લદ્ધિં ન સમ્પટિચ્છતિ. નન્તિ વીમંસમાનં ભિક્ખું. લદ્ધીતિ તિત્થિયલદ્ધિ. રક્ખતીતિ તિત્થિયપક્કન્તકતો રક્ખતિ. લદ્ધિયા અભાવેન તિત્થિયપક્કન્તકો ન હોતીતિ અધિપ્પાયો. અચ્છિદ્દચીવરોતિ એત્થ આકારો કોધત્થો, અડ્ડત્થો વા હોતિ, છિદ્દસદ્દો દૂસનત્થો હોતિ. તસ્મા આકોધેન અડ્ડેન વા છિદ્દો દૂસિતોતિ અચ્છિદ્દોતિ અત્થો દટ્ઠબ્બો. ‘‘અચ્છિન્નો’’તિપિ પાઠો. અચ્છિદ્દં ચીવરમેતસ્સાતિ અચ્છિદ્દચીવરો. તિત્થાયતનન્તિ તિત્થીનં નિવાસટ્ઠાનં, તિત્થિયાનં ઉપસ્સયન્તિ અત્થો.