૪૨. સિક્ખાપદદણ્ડકમ્મવત્થુકથા

૧૦૬. નાસનવત્થૂતિ લિઙ્ગનાસનાય અધિટ્ઠાનં, કારણન્તિ વુત્તં હોતિ. પચ્છિમાનં પઞ્ચન્નન્તિ યોજના. દણ્ડકમ્મવત્થૂતિ દણ્ડકમ્મસ્સ કારણં.

૧૦૭. અપ્પતિસ્સાતિ એત્થ ભિક્ખૂનં વચનસ્સ પટિમુખં આદરેન અસવનં ભિક્ખૂ જેટ્ઠકટ્ઠાને ન ઠપેન્તિ નામાતિ દસ્સેન્તો આહ ‘‘ભિક્ખૂ જેટ્ઠકટ્ઠાને’’તિઆદિ. ‘‘સમાનજીવિકા’’તિ ઇમિના અસભાગવુત્તિકાતિ એત્થ સભાગસદ્દો સમાનસદ્દપરિયાયો, વુત્તિસદ્દો જીવિકપરિયાયોતિ દસ્સેતિ. પરિસક્કતીતિ એત્થ સક્ક ગતિયન્તિધાતુપાઠેસુ (સદ્દનીતિધાતુમાલાયં ૧૬ ળકારન્તધાતુ) વુત્તત્તા પરિપુબ્બો સક્કસદ્દો ગત્યત્થોતિ આહ ‘‘પરક્કમતી’’તિ. કિન્તીતિ કિમેવ. ઇતિસદ્દો હેત્થ એવસદ્દત્થો, કેન એવ ઉપાયેનાતિ હિ અત્થો. અક્કોસતિ ચેવાતિ જાતિઆદીહિ અક્કોસતિ ચેવ. ભેદેતીતિ ભેદાપેતિ. આવરણં કાતુન્તિ એત્થ આવરણસદ્દો નિવારણસદ્દવેવચનોતિ આહ ‘‘નિવારણં કાતુ’’ન્તિ. યત્થાતિ યસ્મિં પરિવેણે, સેનાસને વા. વસ્સગ્ગેનાતિ વસ્સગણનાય. (તસ્સાતિ પરિવેણસેનાસનસ્સ. ઉપચારેતિ આસન્ને). મુખદ્વારિકન્તિ મુખસઙ્ખાતેન દ્વારેન અજ્ઝોહરિતબ્બં. ‘‘વદતોપી’’તિ ઇમિના વચીપયોગેન દુક્કટાપત્તિં દસ્સેતિ, ‘‘નિક્ખિપતોપી’’તિ ઇમિના કાયપયોગેન. અનાચારસ્સાતિ દણ્ડકમ્મે અનાચારસ્સ. એત્તકે નામ દણ્ડકમ્મેતિ એત્તકે નામ ઉદકાહરાપનાદિસઙ્ખાતે દણ્ડકમ્મે. ઇદન્તિ યાગુભત્તાદિં. લચ્છસીતિ લભિસ્સસિ. ‘‘એત્તકે નામ દણ્ડકમ્મે’’તિ વુત્તવચનસ્સ યુત્તિં દસ્સેન્તો આહ ‘‘ભગવતા હી’’તિઆદિ. દણ્ડકમ્મન્તિ દણ્ડેન્તિ દમેન્તિ એતેનાતિ દણ્ડો, સોયેવ કત્તબ્બત્તા કમ્મન્તિ દણ્ડકમ્મં આવરણાદિ. અપરાધાનુરૂપન્તિ વીતિક્કમસ્સ અપરાધસ્સ અનુરૂપં. તમ્પીતિ ઉદકદારુવાલિકાદિઆહરાપણમ્પિ. તઞ્ચ ખોતિ તઞ્ચ કરણં. ઓરમિસ્સતીતિ કાયેન ઓરમિસ્સતિ. વિરમિસ્સતીતિ વાચાય વિરમિસ્સતિ. ઉણ્હપાસાણે વાતિઆદીસુ વાસદ્દેન અઞ્ઞાનિપિ અત્તતાપનપરિતાપનાદીનિ કમ્માનિ સઙ્ગણ્હાતિ.