૨૭. રાજભટવત્થુકથા

૯૦. ઉચ્ચિનથાતિ એત્થ ચિધાતુયા વડ્ઢનત્થં દસ્સેન્તો આહ ‘‘વડ્ઢેથા’’તિ. સોતાપન્નત્તાતિ બિમ્બિસારરઞ્ઞો =૦૮ સોતાપન્નભાવતો. ઘાતેથાતિ જીવિતા વોરોપેથ. હનથાતિ પહરથ. તતોતિ ઉપજ્ઝાયતો. આચરિયો સેટ્ઠોતિ સમ્બન્ધો. તતોતિ આચરિયતો. ઇદન્તિ વચનં, આગતન્તિ સમ્બન્ધો. આહંસુ વોહારિકા મહામત્તા મુસાવાદેનાતિ યોજના. અમચ્ચોતિ સબ્બરાજકિચ્ચેસુ અમા સહ રઞ્ઞા ભવતીતિ અમચ્ચો. અમાસદ્દો સહત્થે નિપાતો. ‘‘અમા’’તિ નિપાતતો ભવત્થે અચ્ચપચ્ચયો (મોગ્ગલ્લાને ૪.૨૩ સુત્તે). મહામત્તોતિ મહન્તો મત્તા ઇસ્સરિયા એતસ્સાતિ મહામત્તો. મત્તાસદ્દો હેત્થ ઇસ્સરિયવાચકો. સેવકોતિ રાજાનં સેવતિ ભજતીતિ સેવકો. ભત્તવેતનભટોતિ ભત્તવેતનાનમત્થાય ભટો. તસ્સાતિ રાજભટસ્સ. પુત્તનત્તભાતુકાદયોતિઆદિસદ્દેન ભાગિનેય્યાદયો સઙ્ગણ્હાતિ. યો પનાતિ રાજભટો પન. નિય્યાતેતીતિ અપ્પેતિ. તં ઠાનન્તિ તં રાજભટટ્ઠાનં. યેન વાતિ કમ્મકારેન વા. યંકમ્મકારણાતિ યસ્સ કમ્મસ્સ કારણા. યો વાતિ રાજભટો વા. પબ્બજસ્સૂતિ પબ્બાજેહિ.