૨૮. ચોરવત્થુકથા

૯૧. દિટ્ઠપુબ્બોતિ અઙ્ગુલિમાલો પુબ્બે દિટ્ઠો. અયન્તિ ચોરો. સોતિ અઙ્ગુલિમાલો. અઞ્ઞેસં સન્તિકા વચનં સુણન્તીતિ યોજના. તેતિ મનુસ્સા. ઉબ્બિજ્જન્તિપીતિ કાયેન ઉબ્બિજ્જન્તિપિ. ઉત્તસન્તિપીતિ ચિત્તેન ઉત્તસન્તિપિ. અઙ્ગુલિમાલો ભિક્ખૂહિ ન પબ્બાજિતો, નનુ ભગવતા પન સયં પબ્બાજિતો, અથ કસ્મા ‘‘ન ભિક્ખવે’’તિ વુત્તન્તિ આહ ‘‘ભગવા સયં ધમ્મસ્સામી’’તિ. ધમ્મસ્સામીતિ ચ ધમ્મસ્સ ઇસ્સરો, ધમ્મેન વા દેવમનુસ્સાનં ઇસ્સરો, અધિપતીતિ અત્થો. ભિક્ખૂનં અકરણત્થાય ભિક્ખૂનં સિક્ખાપદન્તિ યોજના. તત્થાતિ ‘‘ન ભિક્ખવે’’તિઆદિવચને. ‘‘ધજં બન્ધિત્વા’’તિઆદિના ધજસ્સ બન્ધનં ધજબન્ધો, ધજબન્ધો વિયાતિ ધજબન્ધો, ધજબન્ધો હુત્વા ચરતીતિ ધજબન્ધોતિ વચનત્થં દસ્સેતિ. તસ્માતિ યસ્મા ધજબન્ધો, તસ્મા. યોતિ ચોરો. પન્થદુહનં વાતિ પન્થે દુહનં વા. પઞ્ઞાયતિ ચાતિ એત્થ ચસદ્દો વાક્યસમ્પિણ્ડનત્થો. ન કેવલઞ્હિ વિચરતિયેવ, અથ ખો પઞ્ઞાયતિ ચાતિ અત્થો. ઇદન્તિ ચોરકમ્મં. રજ્જન્તિ રાજભાવં. સોતિ રાજપુત્તો. હીતિ સચ્ચં, યસ્મા વા. તસ્મિન્તિ રાજપુત્તે. પુબ્બેતિ પુબ્બકાલે. તન્તિ ચોરં. એવન્તિ ઇમિનાકારેન, જાનન્તિ ચેતિ યોજના. અદિસ્સમાનાતિ અત્તાનં અપઞ્ઞાયમાના. ઇદં સન્ધિચ્છેદાદિચોરે સન્ધાય વુત્તં, ન અમ્બલબુજાદિચોરે. પચ્છાપીતિ થેય્યકરણતો પચ્છાપિ. તેપીતિ ચોરેપિ.

૯૨. ભયેનાતિ ભયતો. એતે પનાતિ ભિક્ખૂ પન. લદ્ધાભયત્તાતિ રાજતો લદ્ધો અભયો ઇમેહીતિ લદ્ધાભયા, તેસં ભાવો લદ્ધાભયત્તં, તસ્મા. કારભેદકોતિ એત્થ કારસદ્દો રુક્ખવિસેસે =૦૯ ચ સક્કારે ચ બન્ધનાલયે ચ પવત્તતિ, ઇધ પન બન્ધનાલયેતિ દસ્સેન્તો આહ ‘‘કારં વુચ્ચતિ બન્ધનાગાર’’ન્તિ. બન્ધનાગારઞ્હિ કરોન્તિ તં પવેસિતે જને હિંસન્તિ એત્થાતિ ‘‘કારા’’તિ વુચ્ચતિ. ઇધાતિ ‘‘કારભેદકો’’તિપદે. દીપબન્ધનં વા હોતૂતિ યોજના. ઇમેહિ પદેહિ ન કેવલં બન્ધનાગારંયેવ કારા નામ હોતિ, અથ ખો અન્દુબન્ધનાદીનિપિ કારાયેવ નામાતિ દસ્સેતિ. યોતિ ચોરો. એતેસૂતિ બન્ધનેસુ. મુઞ્ચિત્વા વાતિ રજ્જુબન્ધનં નિબ્બેઠેત્વા વા. ઇમેહિ પદેહિ ન કેવલં કારાય ભિન્દનતો એવ કારભેદકો નામ હોતિ, અથ ખો છિન્દનમુઞ્ચનવિવરણેહિપિ કારભેદકોયેવ નામાતિ દસ્સેતિ. દીપન્તરન્તિ બન્ધનદીપતો અન્તરં અઞ્ઞં દીપન્તિ અત્થો. ચક્કવાળબન્ધનં ભિન્દિત્વા ચક્કવાળન્તરં ગતો અટ્ઠકથાયં ન વુત્તો. સોતિ નચોરકો. ગામનિગમપટ્ટનાદીનીતિ એત્થ પટ્ટનન્તિ નાવાપટ્ટનં, સકટપટ્ટનઞ્ચ. કેણિયાતિ રઞ્ઞો દાતબ્બઆયેન. તન્તિ કેણિં. નિધાનન્તિ નિક્ખણિત્વા ઠપિતં ધનં. ઉપસંહરિત્વાતિ રાજાદીનં સન્તિકં હરિત્વા. તન્તિ કસિકમ્માદીહિ સમ્પાદેત્વા જીવન્તં. તત્થેવાતિ બન્ધાપિતટ્ઠાનેયેવ.

૯૩. યત્થાતિ યસ્મિં ઠાને. યો કોચિ પલાતોતિ સમ્બન્ધો. નન્તિ યં કિઞ્ચિ જનં, લિખાપેતીતિ યોજના. પણ્ણે વાતિ કુસે વા. અસ્સાતિ જનસ્સ. દણ્ડન્તિ ધનદણ્ડં. લિખિતકોતિ લિખિતબ્બોતિ લિખિતો, સોયેવ લિખિતકો.

૯૪. યો પન કસાહિ હઞ્ઞતીતિ સમ્બન્ધો. ઇમિના અઞ્ઞેહિ કસાહિ હઞ્ઞતીતિ કસાહતોતિ વચનત્થં દસ્સેતિ. ‘‘અયમેવ તે દણ્ડો હોતૂ’’તિ ઇમિના કતં દણ્ડકમ્મં ઇમસ્સાતિ કતદણ્ડકમ્મોતિ વચનત્થં દસ્સેતિ. અલ્લવણોતિ તિન્તવણો. ઘાતેત્વાતિ હનિત્વા પહરિત્વાતિ અત્થો. ગણ્ડિગણ્ડિયોતિ ફોટફોટા. સન્નિસિન્નાસૂતિ ગણ્ડીસુ પકતિસરીરેન સમં નિસિન્નાસુ.

૯૫. કતદણ્ડકમ્મભાવો તાવ પુરિમનયેનેવ વેદિતબ્બો હોતુ, કથં પન લક્ખણાહતભાવો વેદિતબ્બોતિ આહ ‘‘યસ્સ પના’’તિઆદિ. તત્થ તત્તેનાતિ તાપેન. લક્ખણન્તિ સઞ્ઞાણં. સોતિ જનો. ભુજિસ્સોતિ ભુજો એતસ્સત્થીતિ ભુજિસ્સો (મ. નિ. ટી. ૨.૪૨૬). પરેહિ અપાલિતો ચ અનજ્ઝોહરાપિતો ચ હુત્વા સયમેવ અત્તાનં પાલનેન ચ ભોજનં અજ્ઝોહરણેન ચ સમન્નાગતોતિ વુત્તં હોતિ. અસ્સાતિ લક્ખણાહતસ્સ. વણાતિ અરૂનિ. તાનિ હિ યસ્મા વણન્તિ ગત્તાનિ વિચુણ્ણાનિ કરોન્તિ, તસ્મા વણાતિ વુચ્ચન્તિ. રૂળ્હાતિ તરુણમંસેન રુહા. તિમણ્ડલવત્થસ્સ લક્ખણાહતસ્સ જનસ્સાતિ સમ્બન્ધો.