૨૪. ઉપસમ્પાદેતબ્બછક્કકથા

૮૫. તન્તિ ઊનદસવસ્સપદં. સબ્બત્થાતિ સબ્બેસુ છક્કેસુ. તત્થાતિ છક્કેસુ. ‘‘પાતિમોક્ખાનિ વિત્થારેના’’તિ વુત્તત્તા વિભઙ્ગવસેન ગહેતબ્બાનીતિ આહ ‘‘ઉભતોવિભઙ્ગવસેન વુત્તાની’’તિ. માતિકાવિભઙ્ગવસેન સુટ્ઠુ વિભજિતબ્બાનીતિ સુવિભત્તાનિ, વાચુગ્ગતવસેન સુન્દરા પવત્તિ એતેસન્તિ સુપ્પવત્તીનિ, સુત્તતો અનુબ્યઞ્જનતો સુટ્ઠુ વિનિચ્છિતબ્બાનીતિ સુવિનિચ્છિતબ્બાનીતિ અત્થં દસ્સેન્તો આહ ‘‘માતિકાવિભઙ્ગવસેના’’તિઆદિ.