૫. ચિત્તાગારવગ્ગો

૧. પઠમસિક્ખાપદ-અત્થયોજના

૯૭૮. ચિત્તાગારવગ્ગસ્સ પઠમે રઞ્ઞો કીળનટ્ઠાનં અગારં રાજાગારન્તિ વચનત્થં દસ્સેન્તો આહ ‘‘રઞ્ઞો કીળનઘર’’ન્તિ. ચિત્તં અગારં ચિત્તાગારં. આરામન્તિ નગરતો નાતિદૂરઆરામોતિ આહ ‘‘ઉપવન’’ન્તિ. ઉય્યાનન્તિ સમ્પન્નપુપ્ફફલતાય ઉદ્ધં ઉલ્લોકેત્વા મનુસ્સા યન્તિ ગચ્છન્તિ એત્થાતિ ઉય્યાનં. પોક્ખરણિન્તિ પોક્ખરં પદુમં નેતીતિ પોક્ખરણી. પઞ્ચપીતિ રાજાગારાદીનિ પઞ્ચપિ. સબ્બત્થાતિ દસ્સનત્થાય ગમને ચ ગન્ત્વા પસ્સને ચાતિ સબ્બેસુ.

૯૮૧. ‘‘અજ્ઝારામે’’તિઆદિના આરામે ઠિતાય આરામતો બહિ કતે રાજાગારાદિકે પસ્સન્તિયાપિ અનાપત્તીતિ દસ્સેતિ. તાનીતિ રાજાગારાદીનીતિ. પઠમં.

૨. દુતિયસિક્ખાપદં

૯૮૨. દુતિયે અનુત્તાનટ્ઠાનં નત્થીતિ. દુતિયં.

૩. તતિયસિક્ખાપદં

૯૮૮. તતિયે યત્તકન્તિ યત્તકં સુત્તન્તિ સમ્બન્ધો. અઞ્છિતન્તિ કડ્ઢિતં. તસ્મિન્તિ તત્તકે સુત્તેતિ સમ્બન્ધો. તક્કમ્હીતિ એત્થ તક્કોતિ એકો અયોમયો સુત્તકન્તનસ્સ ઉપકરણવિસેસો. સો હિ તકીયતિ સુત્તં બન્ધીયતિ એત્થ, એતેનાતિ વા તક્કોતિ વુચ્ચતિ, તસ્મિં. કન્તનતોતિ કન્તીયતે કપ્પાસાદિભાવસ્સ છિન્દીયતે કન્તનં, તતો.

૯૮૯. દસિકસુત્તાદિન્તિ એત્થ દસાતિ વત્થસ્સાવયવો. સો હિ દિય્યતિ અવખણ્ડીયતીતિ દસાતિ વુચ્ચતિ, તસ્સં દસાયં પવત્તં દસિકં, તમેવ સુત્તં દસિકસુત્તં. આદિસદ્દેન વક્ખમાનં દુક્કન્તિતસુત્તાદિં સઙ્ગણ્હાતીતિ. તતિયં.

૪. ચતુત્થસિક્ખાપદં

૯૯૨. ચતુત્થે આદિં કત્વાતિ ધોવનાદીનિ આદિં કત્વા. ખાદનીયાદીસૂતિ પૂવખાદનીયાદીસુ. રૂપગણનાયાતિ પૂવાદીનં સણ્ઠાનગણનાય.

૯૯૩. યાગુપાનેત્ત યાગુસઙ્ખાતે પાને. તેસન્તિ મનુસ્સાનં. વેય્યાવચ્ચકરટ્ઠાને ઠપેત્વાતિ માતાપિતરો અત્તનો વેય્યાવચ્ચકરટ્ઠાને ઠપેત્વાતિ. ચતુત્થં.

૫. પઞ્ચમસિક્ખાપદં

૯૯૬. પઞ્ચમે વિનિચ્છિનન્તીતિ અધિકરણં વિનિચ્છિનન્તી ભિક્ખુનીતિ યોજનાતિ. પઞ્ચમં.

૬. છટ્ઠસિક્ખાપદં

૯૯૯. છટ્ઠે અનુત્તાનવચનં નત્થીતિ.

૭. સત્તમસિક્ખાપદં

૧૦૦૭. સત્તમે ‘‘પુન પરિયાયે’’તિ એત્થ પરિયાયસદ્દો વારવેવચનોતિ આહ ‘‘પુન વારે’’તિ. મહગ્ઘચીવરન્તિ મહગ્ઘં આવસથચીવરન્તિ. સત્તમં.

૮. અટ્ઠમસિક્ખાપદં

૧૦૦૮. અટ્ઠમે અનિસ્સજ્જિત્વાતિ એત્થ બ્રહ્મદેય્યેન ન અનિસ્સજ્જનં, અથ ખો તાવકાલિકમેવાતિ દસ્સેન્તો આહ ‘‘રક્ખનત્થાયા’’તિઆદિ.

૧૦૧૨. પટિજગ્ગિકન્તિ રક્ખણકં. વચીભેદન્તિ ‘‘પટિજગ્ગાહી’’તિ વચીભેદં. રટ્ઠેતિ વિજિતે. તઞ્હિ રઠન્તિ ગામનિગમાદયો તિટ્ઠન્તિ એત્થાતિ રટ્ઠન્તિ વુચ્ચતીતિ. અટ્ઠમં.

૯. નવમસિક્ખાપદં

૧૦૧૫. નવમે સિપ્પસદ્દો પચ્ચેકં યોજેતબ્બો ‘‘હત્થિસિપ્પઞ્ચ અસ્સસિપ્પઞ્ચ રથસિપ્પઞ્ચ ધનુસિપ્પઞ્ચ થરુસિપ્પઞ્ચા’’તિ. તત્થ થરુસિપ્પન્તિ અસિકીળનસિપ્પં. મન્તસદ્દોપિ પચ્ચેકં યોજેતબ્બો ‘‘આથબ્બણમન્તો ચ ખીલનમન્તો ચ વસીકરણમન્તો ચ સોસાપનમન્તો ચા’’તિ. તત્થ આથબ્બણમન્તોતિ આથબ્બણવેદેન વિહિતો પરૂપઘાતકરો મન્તો. ખીલનમન્તોતિ સારદારુખીલં મન્તેન જપ્પિત્વા પથવિયં નિખણિત્વા ધારણમન્તો. વસીકરણમન્તોતિ મન્તેન જપ્પિત્વા પરસ્સ ઉમ્મત્તભાવમાપન્નકરણો મન્તો. સોસાપનમન્તોતિ પરસ્સ મંસલોહિતાદિસોસાપનમન્તો. અગદપયોગોતિ ભુસવિસસ્સ પયોજનં. આદિસદ્દેન અઞ્ઞેપિ પરૂપઘાતકરણે સિપ્પે સઙ્ગણ્હાતિ. યક્ખપરિત્તન્તિ યક્ખેહિ સમન્તતો તાણં. નાગમણ્ડલન્તિ સપ્પાનં પવેસનનિવારણત્થં મણ્ડલબન્ધમન્તો. આદિસદ્દેન વિસપટિહનનમન્તાદયો સઙ્ગણ્હાતીતિ. નવમં.

૧૦. દસમસિક્ખાપદં

૧૦૧૮. દસમે અનુત્તાનવચનં નત્થીતિ. દસમં.

ચિત્તાગારવગ્ગો પઞ્ચમો.