૬. આરામવગ્ગો

૧. પઠમસિક્ખાપદ-અત્થયોજના

૧૦૨૫. આરામવગ્ગસ્સ પઠમે ઉપચારન્તિ અપરિક્ખિત્તસ્સ આરામસ્સ પરિક્ખેપારહટ્ઠાનં ઉપચારં.

૧૦૨૭. ‘‘સીસાનુલોકિકા’’તિ સામઞ્ઞતો વુત્તેપિ ભિક્ખુનીનમેવ સીસન્તિ આહ ‘‘ભિક્ખુનીન’’ન્તિ. યત્થાતિ યસ્મિં ઠાનેતિ. પઠમં.

૨. દુતિયસિક્ખાપદં

૧૦૨૮. દુતિયે અબ્ભન્તરોતિ અબ્ભન્તરે પરિયાપન્નો, જાતો વા. ‘‘સઙ્કામેસી’’તિ ઇમિના સંહરીતિ એત્થ હરધાતુયા સઙ્કમનત્થં દસ્સેતિ. ન્હાપિતાતિ કપ્પકા. તે હિ નહાપેન્તિ સોચાપેન્તીતિ ન્હાપિતાતિ વુચ્ચન્તિ. તન્તિ કાસાવનિવાસનન્તિ. દુતિયં.

૩-૪. તતિય-ચતુત્થસિક્ખાપદં

૧૦૩૬. તતિયચતુત્થેસુ અનુત્તાનટ્ઠાનં નત્થીતિ. તતિયચતુત્થાનિ.

૫. પઞ્ચમસિક્ખાપદં

૧૦૪૩. પઞ્ચમે ‘‘કુલે મચ્છરો’’તિ એત્થ મચ્છરનં મચ્છરોતિ વચનત્થો કાતબ્બો. ‘‘તં કુલં અસ્સદ્ધં અપ્પસન્ન’’ન્તિ કુલસ્સ અવણ્ણં ભાસતીતિ યોજના. ‘‘ભિક્ખુનિયો દુસ્સીલા પાપધમ્મા’’તિ ભિક્ખુનીનં અવણ્ણં ભાસતીતિ યોજના.

૧૦૪૫. ‘‘સન્તંયેવ આદીનવ’’ન્તિ સમ્બન્ધિયા સમ્બન્ધં દસ્સેતું વુત્તં ‘‘કુલસ્સ વા ભિક્ખુનીનં વા’’તિ ઇમિના દ્વીસુ અઞ્ઞતરમેવ ન સમ્બન્ધો હોતિ, અથ ખો દ્વયમ્પીતિ દસ્સેતીતિ. પઞ્ચમં.

૬. છટ્ઠસિક્ખાપદં

૧૦૪૮. છટ્ઠે ઓવાદાયાતિ એત્થ ન યો વા સો વા ઓવાદો હોતિ, અથ ખો ગરુધમ્મોયેવાતિ આહ ‘‘ગરુધમ્મત્થાયા’’તિ. સહ વસતિ એત્થ, એતેનાતિ વા સંવાસોતિ વચનત્થેન ઉપોસથપવારણા સંવાસો નામાતિ આહ ‘‘ઉપોસથપવારણાપુચ્છનત્થાયા’’તિ. ‘‘પુચ્છનત્થાયા’’તિ ઇમિના ‘‘સંવાસાયા’’તિ એત્થ ઉત્તરપદલોપભાવં દસ્સેતિ. એત્થાતિ ભિક્ખુનિવિભઙ્ગે, સિક્ખાપદે વા પાળિયં વાતિ. છટ્ઠં.

૭-૯. સત્તમ-અટ્ઠમ-નવમસિક્ખાપદં

૧૦૫૩. સત્તમટ્ઠમનવમેસુ અનુત્તાનવચનં નત્થિ. કેવલં પન ‘‘ઇમિસ્સાપી’’તિ પદં વિસેસો, ઇમિસ્સાપિ પાળિયાતિ અત્થોતિ. સત્તમટ્ઠમનવમાનિ.

૧૦. દસમસિક્ખાપદં

૧૦૬૨. દસમે દ્વે કાયા ઉપરિમકાયો હેટ્ઠિમકાયોતિ. તત્થ કટિતો ઉદ્ધં ઉપરિમકાયો, હેટ્ઠા હેટ્ઠિમકાયો. તત્થ ‘‘પસાખે’’તિ ઇદં હેટ્ઠિમકાયસ્સ નામન્તિ આહ ‘‘અધોકાયે’’તિ. હીતિ સચ્ચં. તતોતિ અધોકાયતો. ઇમિના પઞ્ચમીબાહિરત્થસમાસં દસ્સેતિ. રુક્ખસ્સ સાખા પભિજ્જિત્વા ગતા વિય ઉભો ઊરૂ પભિજ્જિત્વા ગતાતિ યોજના.

૧૦૬૫. ફાલેહીતિ એત્થ ઇતિસદ્દો આદ્યત્થો. તેન ‘‘ધોવા’’તિઆદીનિ ચત્તારિ પદાનિ સઙ્ગણ્હાતિ. આણત્તિદુક્કટાનીતિ હેટ્ઠા વુત્તેસુ અટ્ઠસુ દુક્કટેસુ વિનયદુક્કટમેવ. સેસેસૂતિ ભિન્દનતો સેસેસુ ફાલનાદીસૂતિ. દસમં.

આરામવગ્ગો છટ્ઠો.