૭. ગબ્ભિનિવગ્ગો

૧. પઠમસિક્ખાપદ-અત્થયોજના

૧૦૬૯. ગબ્ભિનિવગ્ગસ્સ પઠમે કુચ્છિં પવિટ્ઠો સત્તો એતિસ્સા અત્થીતિ કુચ્છિપવિટ્ઠસત્તા. ‘‘કુચ્છિ’’ન્તિપિ પાઠો. ઇમિના ગબ્ભિનીતિ એત્થ ગબ્ભસદ્દો કુચ્છિટ્ઠસત્તવાચકોતિ દસ્સેતિ. ગબ્ભસદ્દો (અભિધાનપ્પદીપિકાયં ૯૪૪ ગાથાયં) હિ કુચ્છિટ્ઠસત્તે ચ કુચ્છિમ્હિ ચ ઓવરકે ચ વત્તતીતિ. પઠમં.

૨. દુતિયસિક્ખાપદં

૧૦૭૩. દુતિયે થઞ્ઞં પિવતીતિ પાયન્તો, દારકો, સો એતિસ્સા અત્થીતિ પાયન્તીતિ દસ્સેન્તો આહ ‘‘થઞ્ઞં પાયમાનિ’’ન્તિ. દુતિયં.

૩. તતિયસિક્ખાપદં

૧૦૭૭. તતિયે નિત્થરિસ્સતીતિ વટ્ટદુક્ખતો નિત્થરિસ્સતિ.

૧૦૭૯. પાણાતિપાતા વેરમણિન્તિ એત્થ પાણાતિપાતા વિરમતિ ઇમાયાતિ વેરમણીતિ અત્થેન સિક્ખાપદં વેરમણિ નામાતિ આહ ‘‘પાણાતિપાતા વેરમણિસિક્ખાપદ’’ન્તિ. યં તં સિક્ખાપદન્તિ સમ્બન્ધો. સબ્બત્થાતિ ‘‘અદિન્નાદાના વેરમણિ’’ન્તિઆદીસુ સબ્બેસુ વાક્યેસુ. પબ્બજિતાય સામણેરિયાતિ સમ્બન્ધો. એતાસૂતિ છસુ સિક્ખાસૂતિ. તતિયં.

૪. ચતુત્થસિક્ખાપદં

૧૦૮૪. ચતુત્થે ‘‘વુટ્ઠાનસમ્મુતી’’તિ પદં ‘‘હોતી’’તિ પદે કત્તા, ‘‘દાતબ્બાયેવા’’તિ પદે કમ્મન્તિ. ચતુત્થં.

૫-૯. પઞ્ચમાદિસિક્ખાપદં

૧૦૯૫. પઞ્ચમાદીસુ નવમપરિયોસાનેસુ સિક્ખાપદેસુ અનુત્તાનટ્ઠાનં નત્થીતિ. પઞ્ચમછટ્ઠસત્તમટ્ઠમનવમાનિ.

૧૦. દસમસિક્ખાપદં

૧૧૧૬. દસમે વૂપકાસેય્યાતિ એત્થ કાસધાતુયા ગત્યત્થં દસ્સેન્તો આહ ‘‘ગચ્છેય્યા’’તિ. દસમં.

ગબ્ભિનિવગ્ગો સત્તમો.