૪. તુવટ્ટવગ્ગો

૧. પઠમસિક્ખાપદ-અત્થયોજના

૯૩૩. તુવટ્ટવગ્ગસ્સ પઠમે ‘‘તુવટ્ટ નિપજ્જાય’’ન્તિ ધાતુપાઠેસુ (સદ્દનીતિધાતુમાલાયં ૧૮ ટકારન્તધાતુ) વુત્તત્તા ‘‘તુવટ્ટેય્યુન્તિ નિપજ્જેય્યુ’’ન્તિ વુત્તન્તિ. પઠમં.

૨. દુતિયસિક્ખાપદં

૯૩૭. દુતિયે એકત્થરણપાવુરણન્તિએત્થ ઉત્તરપદાનં દ્વન્દભાવં, પુબ્બપદેન ચ બાહિરત્થસમાસભાવં દસ્સેતું વુત્તં ‘‘એક’’ન્તિઆદિ. તત્થ ચેવ, ચસદ્દેહિ દ્વન્દભાવં દીપેતિ, ‘‘એતાસ’’ન્તિઇમિના બાહિરત્થસમાસભાવં. એતન્તિ ‘‘એકત્થરણપાવુરણા’’તિ એતં નામન્તિ. દુતિયં.

૩. તતિયસિક્ખાપદં

૯૪૧. તતિયે ઉળારકુલાતિ જાતિસેટ્ઠકુલા, ઇસ્સરિયભોગાદીહિ વા વિપુલકુલા. ગુણેહીતિ સીલાદિગુણેહિ. ‘‘ઉળારાતિ સમ્ભાવિતા’’તિ ઇમિના ઇતિલોપતુલ્યાધિકરણસમાસં દસ્સેતિ.

‘‘અભિભૂતા’’તિ ઇમિના ‘‘અપકતા’’તિ એત્થ કરધાતુ સબ્બધાત્વત્થવાચીપિ ઇધ અપપુબ્બત્તા વિસેસતો અભિભવનત્થે વત્તતીતિ દસ્સેતિ. એતાસન્તિ ભિક્ખુનીનં. ‘‘સઞ્ઞાપયમાના’’તિ ઇમિના સઞ્ઞાપનં સઞ્ઞત્તીતિ વચનત્થં દસ્સેતિ. હેતૂદાહરણાદીહીતિ એત્થ આદિસદ્દેન ઉપમાદયો સઙ્ગણ્હાતિ. ‘‘વિવિધેહિ નયેહિ ઞાપના’’તિ ઇમિના વિવિધેહિ ઞાપનં વિઞ્ઞત્તીતિ વચનત્થં દસ્સેતિ.

૯૪૩. ચઙ્કમને પદવારગણનાય આપત્તિયા ન કારેતબ્બોતિ આહ ‘‘નિવત્તનગણનાયા’’તિ. પદાદિગણનાયાતિ પદઅનુપદાદિગણનાયાતિ. તતિયં.

૪. ચતુત્થસિક્ખાપદં

૯૪૯. ચતુત્થે અનુત્તાનટ્ઠાનં નત્થીતિ. ચતુત્થં.

૫. પઞ્ચમસિક્ખાપદં

૯૫૨. પઞ્ચમે આણત્તા ભિક્ખુનીતિ યોજના. ઇદઞ્ચ પચ્ચાસન્નવસેન વુત્તં યંકિઞ્ચિપિ આણાપેતું સક્કુણેય્યત્તાતિ. પઞ્ચમં.

૬-૯. છટ્ઠાદિસિક્ખાપદં

૯૫૫. છટ્ઠ-સત્તમ-અટ્ઠમ-નવમેસુ અનુત્તાનવચનં નત્થીતિ. છટ્ઠ સત્તમ અટ્ઠમ નવમાનિ.

૧૦. દસમસિક્ખાપદં

૯૭૩. દસમે અહુન્દરિકાતિ તસ્મિં કાલે, દેસે વા સમ્બાધસ્સ નામમેતન્તિ આહ ‘‘અહુન્દરિકાતિ સમ્બાધા’’તિ.

૯૭૫. યથા ‘‘ઉત્તરિછપ્પઞ્ચવાચાહી’’તિ (પાચિ. ૬૨-૬૫) એત્થ પઞ્ચસદ્દો ન કોચિ અત્થો, વાચાસિલિટ્ઠત્થં લોકવોહારવસેન વુત્તો, ન એવમિધ, ઇધ પન અત્થો અત્થિ, પઞ્ચ યોજનાનિ ગચ્છન્તિયાપિ અનાપત્તિયેવાતિ આહ ‘‘પવારેત્વા…પે… અનાપત્તી’’તિ. પચ્ચાગચ્છતીતિ પટિનિવત્તેત્વા આગચ્છતીતિ. દસમં.

તુવટ્ટવગ્ગો ચતુત્થો.