૩. નગ્ગવગ્ગો

૧. પઠમસિક્ખાપદ-અત્થયોજના

૮૮૩. નગ્ગવગ્ગસ્સ પઠમે બ્રહ્મચરિયેન ચિણ્ણેનાતિ ચિણ્ણેન બ્રહ્મચરિયેન કિં નુ ખો નામાતિ અત્થો. ‘‘બ્રહ્મચરિયસ્સ ચરણેના’’તિ ઇમિના ચિણ્ણસદ્દસ્સ ચરણં ચિણ્ણન્તિ વચનત્થં દસ્સેતિ. ‘‘ન અઞ્ઞં ચીવર’’ન્તિ ઇમિના એવત્થં દસ્સેતિ, અઞ્ઞત્થાપોહનં વાતિ. પઠમં.

૨. દુતિયસિક્ખાપદં

૮૮૭. દુતિયે અનુત્તાનટ્ઠાનં નત્થીતિ. દુતિયં.

૩. તતિયસિક્ખાપદં

૮૯૩. તતિયે અનન્તરાયિકિનીતિ એત્થ નત્થિ અન્તરાયો એતિસ્સાતિ અનન્તરાયા, સા એવ અનન્તરાયિકિનીતિ વચનત્થં દસ્સેન્તો આહ ‘‘અનન્તરાયા’’તિ. તતિયં.

૪. ચતુત્થસિક્ખાપદં

૮૯૮. ચતુત્થે પઞ્ચાહન્તિ સમાહારદિગુ, ણિકપચ્ચયો સ્વત્થો. સઙ્ઘાટિચારોતિએત્થ કેનટ્ઠેન સઙ્ઘાટિ નામ, ચારસદ્દો કિમત્થોતિ આહ ‘‘પરિભોગવસેન વા’’તિઆદિ. તત્થ સઙ્ઘટિતટ્ઠેનાતિ સંહરિતટ્ઠેન. ઇમિના ‘‘કેનટ્ઠેન સઙ્ઘાટિ નામા’’તિ પુચ્છં વિસજ્જેતિ. ‘‘પરિવત્તન’’ન્તિ ઇમિના ‘‘ચારસદ્દો કિમત્થો’’તિ ચોદનં પરિહરતિ. પઞ્ચસૂતિ તિચીવરં ઉદકસાટિકા સંકચ્ચિકાતિ પઞ્ચસૂતિ. ચતુત્થં.

૫. પઞ્ચમસિક્ખાપદં

૯૦૩. પઞ્ચમે ‘‘ચીવરસઙ્કમનીય’’ન્તિએત્થ સઙ્કમેતબ્બં પટિદાતબ્બન્તિ સઙ્કમનીયન્તિ કમુધાતુસ્સ પટિદાનત્થઞ્ચ અનીયસદ્દસ્સ કમ્મત્થઞ્ચ, ‘ચીવરઞ્ચ તં સઙ્કમનીયઞ્ચે’તિ ચીવરસઙ્કમનીયન્તિ વિસેસનપરપદભાવઞ્ચ દસ્સેન્તો આહ ‘‘સઙ્કમેતબ્બં ચીવર’’ન્તિ. તત્થ ‘‘સઙ્કમેતબ્બં ચીવર’’ન્તિ ઇમિના કમ્મત્થઞ્ચ વિસેસનપરપદભાવઞ્ચ દસ્સેતિ. ‘‘પટિદાતબ્બચીવર’’ન્તિ ઇમિના કમુધાતુયા અત્થં દસ્સેતિ અધિપ્પાયવસેનાતિ. પઞ્ચમં.

૬. છટ્ઠસિક્ખાપદં

૯૦૯. છટ્ઠે ‘‘અઞ્ઞં પરિક્ખાર’’ન્તિએત્થ પરિક્ખારસ્સ સરૂપં દસ્સેન્તો આહ ‘‘યંકિઞ્ચી’’તિઆદિ. યંકિઞ્ચિ અઞ્ઞતરન્તિ સમ્બન્ધો. કિત્તકંઅગ્ઘનકન્તિ કિં પમાણેન અગ્ઘેન અરહં ચીવરં. દાતુકામત્થાતિ તુમ્હે દાતુકામા ભવથાતિ અત્થો. કતિપાહેનાતિ કતિપયાનિ અહાનિ કતિપાહં, યકારલોપો. કતિપયસદ્દોહિ દ્વિતિવાચકો રૂળ્હીસદ્દો, તેન કતિપાહેન. સમગ્ઘન્તિ અપ્પગ્ઘં. સંસદ્દો હિ અપ્પત્થવાચકોતિ. છટ્ઠં.

૭. સત્તમસિક્ખાપદં

૯૧૧. સત્તમે ‘‘વિપક્કમિંસૂ’’તિ એત્થ વિવિધં ઠાનં પક્કમિંસૂતિ દસ્સેન્તો આહ ‘‘તત્થ તત્થ અગમંસૂ’’તિ. અમ્હાકમ્પિ આગમનન્તિ સમ્બન્ધો.

૯૧૫. કતિપાહેન ઉપ્પજ્જિસ્સતીતિ કતિપાહેન ચીવરં ઉપ્પજ્જિસ્સતિ. તતોતિ તસ્મિં ચીવરુપ્પજ્જનકાલેતિ. સત્તમં.

૮. અટ્ઠમસિક્ખાપદં

૯૧૬. અટ્ઠમે યે નાટકં નાટેન્તિ, તે નટા નામાતિ યોજના. ઇમિના નટકં નાટેન્તીતિ નટાતિ વચનત્થં દસ્સેતિ. યે નચ્ચન્તિ, તે નાટકા નામાતિ યોજના. ઇમિના સયં નટન્તીતિ નાટકાતિ વચનત્થં દીપેતિ. વંસવરત્તાદીસૂતિ એત્થ વંસો નામ વેણુ. વરત્તા નામ નદ્ધિકા. આદિસદ્દેન રજ્જુઆદયો સઙ્ગણ્હાતિ. યે લઙ્ઘનકમ્મં કરોન્તિ, તે લઙ્ઘકા નામાતિ યોજના. માયાકારાતિ એત્થ માયા નામ મયનામકેન અસુરેન સુરે ચલયિતું કતત્તા મયસ્સ એસાતિ માયા, તં કરોતીતિ માયાકારો, મયનામકો અસુરોયેવ. અઞ્ઞે પન રૂળ્હીવસેન ‘‘માયાકારા’’તિ વુચ્ચન્તિ. સોકેન ઝાયનં ડય્હનં સોકજ્ઝાયં, સુરાનં સોકજ્ઝાયં કરોતીતિ સોકજ્ઝાયિકો, મયનામકો અસુરોયેવ. અઞ્ઞે પન રૂળ્હીવસેન ‘‘સોકજ્ઝાયિકા’’તિ વુચ્ચન્તિ. ઇતિ ઇમમત્થં દસ્સેતું વુત્તં ‘‘સોકજ્ઝાયિકા નામ માયાકારા’’તિ. કુમ્ભથુણિકા નામાતિ એત્થ વિસ્સટ્ઠત્તા થવીયતીતિ થુણો, સદ્દો. કુમ્ભસ્સ થુણો કુમ્ભથુણો. તેન કીળન્તીતિ કુમ્ભથુણિકા, ઇતિ ઇમમત્થં દસ્સેતિ ‘‘ઘટકેન કીળનકા’’તિ ઇમિના. બિમ્બિસકન્તિ ચતુરસ્સઅમ્બણતાળનં, તં વાદેન્તીતિ બિમ્બિસકવાદકાતિ. અટ્ઠમં.

૯. નવમસિક્ખાપદં

૯૨૧. નવમે તેસન્તિ યે ‘‘ન મયં અય્યે સક્કોમા’’તિ વદન્તિ, તેસં. દસ્સતીતિ અચ્છાદેસ્સતીતિ. નવમં.

૧૦. દસમસિક્ખાપદં

૯૨૭. દસમે યસ્સાતિ કથિનસ્સ. ઉબ્ભારમૂલકોતિ ઉદ્ધારમૂલકો. સદ્ધાપરિપાલનત્થન્તિ કથિનુદ્ધારં યાચન્તસ્સ સદ્ધાય પરિપાલનત્થન્તિ. દસમં.

નગ્ગવગ્ગો તતિયો.